Mas küyde maşïna jürgizgenderge ayawşılıq joq

0 30

QR İİM baspasöz qızmeti bergen mälimetke qarağanda, ötken jılı joldarda polïcïya qızmetkerleri mas küyinde kölik jürgizgen 26 mıñnan astam jürgizwşini (11 ay – 26 319) ustağan, al 2018 jılı onday jügensiz jürgizwşiler qatarı 28151 adam bolğan.Mas küyinde kölik jürgizgender 495 jazatayım oqïğağa sebepşi bolıp, saldarınan 98 adam qaytıs bolıp, 716 adam jaraqat aldı. Bïıldan bastap munday qılmıstardı jazalaytın qılmıstıq normalardıñ sankcïyaları qatañdatılıp otır. Endi azamattardıñ densawlığına zïyan keltirilse, mas jürgizwşi bes jılğa deyin bas bostandığınan jäne 10 jılğa kölik quralın jürgizw quqığınan ayırıladı, al qaytıs bolğan jağdayda 10 jılğa deyin bas bostandığınan ayırw jazasına tartıladı. Nur-Sultan qalalıq polïcïya departamenti baspasöz qızmetiniñ mälimetine qarağanda, 11 qañtardan beri mas küyinde kölik jürgizgen 8 adam ustalğan. Qazirgi waqıtta Nur-Sultan qalalıq departamentiniñ arnayı qabıldaw ornında 6 jürgizwşi 15 täwlikke, 2 jürgizwşi 20 täwlikke qamalğan, olardıñ segizi de jürgizwşi kwäliginen ayırıladı.

«Sergekke» sergek bol!

Nesin aytasız, bügingi tañda jol erejesine baylanıstı jaña zañ qoğamda qızw talqılanıp jatır. Älewmettik jelilerde «Sergektiñ» jumısına köñiltolmawşılıq, tipti narazılıq bildirgen pikirler qanşama? «Sergek» attı alğaşqı joba 2017 jılı Nur-Sultanda alğaş iske qosılıp, qosılğan kezden bastap jaqsı nätïjeler körsetken. İİM ÄPK törağasınıñ orınbasarı Älibek Keñisbaev barlıq müddeli memlekettik organdardıñ, Polïcïya departamentiniñ birlesken jumısınıñ arqasında qala joldarındağı ölim-jitimdi eki ese azaytwğa qol jetkizgenin aytadı. «Sergek» tumanda, qarda, jañbırda yağnï kez kelgen awa rayında jumıs istey aladı. 10 qañtardan bastap Nur-Sultanda alkogol'di küyde kölik quralın jürgizw jawapkerşiliginiñ küşeyuine baylanıstı jedel-aldın alw şaraları ötkizilwde. Elordalıq İşki ister departamentiniñ mälimdewinşe, «Sergek» foto-vïdeo tüzetw jüyesin engizw jazatayım oqïğalardıñ sanın aytarlıqtay azayt­qan. Sonımen qatar, jürgizwşiler arasında kölik tärtibi jaqsarğan.
Elordalıq İşki ister departamenti jol-kölik oqïğaları köbirek bolatın wçaskelerdi atadı. Jol-kölik oqïğalarınıñ taldawı boyınşa, jol-kölik oqïğalarınıñ jïi kezdesetin türleri – jürgizwşilerdiñ jayaw jürginşiler ötkelinen ötw erejelerin buzwı, köbinese munday buzwşılıqtar Qabanbay batır dañğılı boyında, №10 üyge qarama-qarsı wçaskede tirkeledi. Kelesi jol apatı ıqtïmaldığı bar köşe – Sarayşıq dañğılı M-1 köpiri. Al Bögenbay batır köşesi men Jeñis dañğılınıñ qïılısında orın alatın jol apatınıñ negizgi sebebi – qïılıs­tardı kesip ötw, jol erejelerin buzw. Bul eñ aldımen kölik keptelisine baylanıstı.

Baldıq jüye tïimdi me?

Köpşiliktiñ pikirinşe, «Sergektiñ» «tım sezimtaldığı» men ayıppuldardıñ mölşeri qara halıqqa tïimdi emes. Jaña erejeni «qalta qağwdıñ» bir täsili dep tüsinip jatqandar da jeterlik. Al keybir tärtip saqşılarınıñ pikirinşe, ereje buzwşılarğa ayıppul jol qozğalısı erejelerin buzğanı üşin, sonıñ işinde kameralarmen jazba, jïnaw pwnktteri arqılı baldıq jüyemen salınwı kerek. YAğnï jürgizwşi belgilengen şekten asıp ketse, onı jürgizwşi kwäliginen ayırw usınıladı.
Jalpı munday ayıppuldar jüyesi Wkraïnada 2015 jıldan bastap qoldanılıp keledi jäne osı jıldan bastap Armenïyada payda bolğan. Mısalı, Wkraïnada är jürgizwşige jıl sayın 150 upay beriledi, al jol erejesin öreskel buzğanı üşin olar birden 50 ball alıp tastaydı. Al Armenïyada är jürgizwşige bir jılğa toğız upay beriledi. Eger bir jıl işinde avtokölik jürgizwşisi upayların sarqıp alsa, ol altı ayğa jürgizwşi kwäliginen ayırıladı jäne üş aydan keyin teorïyalıq emtïhan tapsırıp kwäligin qalpına keltire aladı eken.
Bul, ärïne, äli de talqığa tüsetin, ülken minberlerde jan-jaqtı qaralatın mäsele. Qalay bolğanda da, bastı maqsat – jürgizwşilerdi jol qozğalısı erejelerine asa muqïyat bolwğa şaqırw.

Pikir jazw

Poçtañız jarïyalanbaydı

12 + 11 =