ماس كۇيدە ماشينا جۇرگىزگەندەرگە اياۋشىلىق جوق

0 30

قر ءىىم ءباسپاسوز قىزمەتى بەرگەن مالىمەتكە قاراعاندا، وتكەن جىلى جولداردا پوليتسيا قىزمەتكەرلەرى ماس كۇيىندە كولىك جۇرگىزگەن 26 مىڭنان استام جۇرگىزۋشىنى (11 اي – 26 319) ۇستاعان، ال 2018 جىلى ونداي جۇگەنسىز جۇرگىزۋشىلەر قاتارى 28151 ادام بولعان.ماس كۇيىندە كولىك جۇرگىزگەندەر 495 جازاتايىم وقيعاعا سەبەپشى بولىپ، سالدارىنان 98 ادام قايتىس بولىپ، 716 ادام جاراقات الدى. بيىلدان باستاپ مۇنداي قىلمىستاردى جازالايتىن قىلمىستىق نورمالاردىڭ سانكتسيالارى قاتاڭداتىلىپ وتىر. ەندى ازاماتتاردىڭ دەنساۋلىعىنا زيان كەلتىرىلسە، ماس جۇرگىزۋشى بەس جىلعا دەيىن باس بوستاندىعىنان جانە 10 جىلعا كولىك قۇرالىن جۇرگىزۋ قۇقىعىنان ايىرىلادى، ال قايتىس بولعان جاعدايدا 10 جىلعا دەيىن باس بوستاندىعىنان ايىرۋ جازاسىنا تارتىلادى. نۇر-سۇلتان قالالىق پوليتسيا دەپارتامەنتى ءباسپاسوز قىزمەتىنىڭ مالىمەتىنە قاراعاندا، 11 قاڭتاردان بەرى ماس كۇيىندە كولىك جۇرگىزگەن 8 ادام ۇستالعان. قازىرگى ۋاقىتتا نۇر-سۇلتان قالالىق دەپارتامەنتىنىڭ ارنايى قابىلداۋ ورنىندا 6 جۇرگىزۋشى 15 تاۋلىككە، 2 جۇرگىزۋشى 20 تاۋلىككە قامالعان، ولاردىڭ سەگىزى دە جۇرگىزۋشى كۋالىگىنەن ايىرىلادى.

«سەرگەككە» سەرگەك بول!

نەسىن ايتاسىز، بۇگىنگى تاڭدا جول ەرەجەسىنە بايلانىستى جاڭا زاڭ قوعامدا قىزۋ تالقىلانىپ جاتىر. الەۋمەتتىك جەلىلەردە «سەرگەكتىڭ» جۇمىسىنا كوڭىلتولماۋشىلىق، ءتىپتى نارازىلىق بىلدىرگەن پىكىرلەر قانشاما؟ «سەرگەك» اتتى العاشقى جوبا 2017 جىلى نۇر-سۇلتاندا العاش ىسكە قوسىلىپ، قوسىلعان كەزدەن باستاپ جاقسى ناتيجەلەر كورسەتكەن. ءىىم اپك توراعاسىنىڭ ورىنباسارى الىبەك كەڭىسباەۆ بارلىق مۇددەلى مەملەكەتتىك ورگانداردىڭ، پوليتسيا دەپارتامەنتىنىڭ بىرلەسكەن جۇمىسىنىڭ ارقاسىندا قالا جولدارىنداعى ءولىم-ءجىتىمدى ەكى ەسە ازايتۋعا قول جەتكىزگەنىن ايتادى. «سەرگەك» تۇماندا، قاردا، جاڭبىردا ياعني كەز كەلگەن اۋا رايىندا جۇمىس ىستەي الادى. 10 قاڭتاردان باستاپ نۇر-سۇلتاندا الكوگولدى كۇيدە كولىك قۇرالىن جۇرگىزۋ جاۋاپكەرشىلىگىنىڭ كۇشەيۋىنە بايلانىستى جەدەل-الدىن الۋ شارالارى وتكىزىلۋدە. ەلوردالىق ىشكى ىستەر دەپارتامەنتىنىڭ مالىمدەۋىنشە، «سەرگەك» فوتو-ۆيدەو تۇزەتۋ جۇيەسىن ەنگىزۋ جازاتايىم وقيعالاردىڭ سانىن ايتارلىقتاي ازايت­قان. سونىمەن قاتار، جۇرگىزۋشىلەر اراسىندا كولىك ءتارتىبى جاقسارعان.
ەلوردالىق ىشكى ىستەر دەپارتامەنتى جول-كولىك وقيعالارى كوبىرەك بولاتىن ۋچاسكەلەردى اتادى. جول-كولىك وقيعالارىنىڭ تالداۋى بويىنشا، جول-كولىك وقيعالارىنىڭ ءجيى كەزدەسەتىن تۇرلەرى – جۇرگىزۋشىلەردىڭ جاياۋ جۇرگىنشىلەر وتكەلىنەن ءوتۋ ەرەجەلەرىن بۇزۋى، كوبىنەسە مۇنداي بۇزۋشىلىقتار قابانباي باتىر داڭعىلى بويىندا، №10 ۇيگە قاراما-قارسى ۋچاسكەدە تىركەلەدى. كەلەسى جول اپاتى ىقتيمالدىعى بار كوشە – سارايشىق داڭعىلى م-1 كوپىرى. ال بوگەنباي باتىر كوشەسى مەن جەڭىس داڭعىلىنىڭ قيىلىسىندا ورىن الاتىن جول اپاتىنىڭ نەگىزگى سەبەبى – قيىلىس­تاردى كەسىپ ءوتۋ، جول ەرەجەلەرىن بۇزۋ. بۇل ەڭ الدىمەن كولىك كەپتەلىسىنە بايلانىستى.

بالدىق جۇيە ءتيىمدى مە؟

كوپشىلىكتىڭ پىكىرىنشە، «سەرگەكتىڭ» «تىم سەزىمتالدىعى» مەن ايىپپۇلداردىڭ مولشەرى قارا حالىققا ءتيىمدى ەمەس. جاڭا ەرەجەنى «قالتا قاعۋدىڭ» ءبىر ءتاسىلى دەپ ءتۇسىنىپ جاتقاندار دا جەتەرلىك. ال كەيبىر ءتارتىپ ساقشىلارىنىڭ پىكىرىنشە، ەرەجە بۇزۋشىلارعا ايىپپۇل جول قوزعالىسى ەرەجەلەرىن بۇزعانى ءۇشىن، سونىڭ ىشىندە كامەرالارمەن جازبا، جيناۋ پۋنكتتەرى ارقىلى بالدىق جۇيەمەن سالىنۋى كەرەك. ياعني جۇرگىزۋشى بەلگىلەنگەن شەكتەن اسىپ كەتسە، ونى جۇرگىزۋشى كۋالىگىنەن ايىرۋ ۇسىنىلادى.
جالپى مۇنداي ايىپپۇلدار جۇيەسى ۋكراينادا 2015 جىلدان باستاپ قولدانىلىپ كەلەدى جانە وسى جىلدان باستاپ ارمەنيادا پايدا بولعان. مىسالى، ۋكراينادا ءار جۇرگىزۋشىگە جىل سايىن 150 ۇپاي بەرىلەدى، ال جول ەرەجەسىن ورەسكەل بۇزعانى ءۇشىن ولار بىردەن 50 بالل الىپ تاستايدى. ال ارمەنيادا ءار جۇرگىزۋشىگە ءبىر جىلعا توعىز ۇپاي بەرىلەدى. ەگەر ءبىر جىل ىشىندە اۆتوكولىك جۇرگىزۋشىسى ۇپايلارىن سارقىپ السا، ول التى ايعا جۇرگىزۋشى كۋالىگىنەن ايىرىلادى جانە ءۇش ايدان كەيىن تەوريالىق ەمتيحان تاپسىرىپ كۋالىگىن قالپىنا كەلتىرە الادى ەكەن.
بۇل، ارينە، ءالى دە تالقىعا تۇسەتىن، ۇلكەن مىنبەرلەردە جان-جاقتى قارالاتىن ماسەلە. قالاي بولعاندا دا، باستى ماقسات – جۇرگىزۋشىلەردى جول قوزعالىسى ەرەجەلەرىنە اسا مۇقيات بولۋعا شاقىرۋ.

پىكىر جازۋ

پوچتاڭىز جاريالانبايدى

1 × two =