Латын әліпбиін таңдау – саяси шешім емес

0 102

«Қазақстан – 2050» стратегиялық жоспары жарияланғалы елімізді латын әліпбиіне кө­шіру мәселесі қызу пікірталастар тудыруда. Осы таңдаудың өзін Тәуелсіз Қазақ елінің гео­саяси бағытын өзгертетінінің белгісі ре­тінде қарастырушылар да бой көтерді.

Осыған орай, Елбасы Нұрсұлтан Назар­баев­ Алматыдағы резиденциясында­ әде­­биет және өнер қайраткерлеріне прези­дент­­­­тік және мемлекеттік стипендияларды тапсыру рәсімінде өз ойын былайша жет­кіз­ді:

– Бұл үдеріс (латын әліпбиіне көшу мәселе­сін айтып отыр. – ред.) жақсы дайындықпен және ойластырылып жүргізілуі қажет. Осы орайда, XX ғасырда кириллица алфавиті не­гізінде қазақ тіліндегі әдеби және ғылыми мұралардың ауқымды қоры әзірленгенін есте сақтағанымыз жөн. Ең маңыздысы, қазақ­стандықтардың болашақ ұрпағына ар­нал­­ған халықтың осынау қазынасы жоғалып кет­кен­ жоқ.­ Біз­ қа­зақ­ тілін латын әрпіне кө­­ші­ру­ жөнінде мемлекеттік комиссия құ­ра­мыз, – деді Нұрсұлтан Назарбаев.
Әрі қарай Қазақстанның әліпби ауыс­ты­ру тұрғысындағы мақсат-мүддесі ше­тел­дік се­рік­тестердің назарын аударып отыр­ға­ны­на тоқ­талған Президент:

– Кейбіреулер бұдан Қазақстанның геосаяси артықшылығының өзгеру «айғағын» көргендей болғаны мүлде негізсіз. Оған еш негіз жоқ. Бұл туралы мынаны айта аламын. Латын әрпіне көшу – қазақ тілін дамыту мен жаңғыртудағы ішкі қажеттілік. Қараңғы бөлмеден қара мысық іздеудің қажеті жоқ, оның үстіне, ол онда ешқашан болмаған. 20-40-шы жылдары латын әрпі қолданылғанын еске салып өтпекпін. Бұрынғы КСРО-ның одақтас он бес республикалары ішінен одақтың тарауына дейін үшеуінде ұлттық тіл латын тілі болып келген. Қазақстанның еуразиялық интеграцияға қатысуына келсек – бұл біздің принципті таңдауымыз. Біз дұрыс бағытта алға жылжып келеміз деп есептеймін, экономикалық интеграция бүкіл әлемнің міндеті болып саналады. Біздің дамып келе жатқан экономикамыз жаңа нарықты талап етеді, сондықтан, біз саяси емес, экономикалық интеграцияға қадам басып келеміз. Елдің саяси егемендігі мәселесі талқыланбайды, – деді.

Нәзира САЙЛАУҚЫЗЫ

Пікір жазу

Почтаңыз жарияланбайды

three × one =