КҮН ТӘРТІБІНДЕ – БЕЙБІТШІЛІК ПЕН КЕЛІСІМ МӘДЕНИЕТІ

Ертең Тәуелсіздік сарайында Қазақстан Республикасының Президенті Нұрсұлтан Әбішұлы Назарбаевтың төрағалығымен Қазақстан халқы ассамблеясының «Қазақстан – 2050» стратегиясы: бейбітшілік, руханият­ және келісім мәдениеті» атты ХХІ сессиясы өтеді. Атаулы шараның ұйымдастыру барысы жайында Қазақстан халқы ассамблеясы төрағасының орынбасары – Хатшылық меңгерушісі Ералы Тоғжановтан сұрап білген едік.

– Ассамблеяны құру туралы идеяны алғаш рет Елбасы 1992 жылы Қазақстан халқы­ның бірінші құрылтайында жария­лаған болатын.

Бүгінде Ассамблея консти­ту­ция­лық орган болып табылады. Ал оның жоғарғы органы – ел Президентінің төрағалығымен өтетін сессиясы.

Қазақстан халқы ассамблея­сы­ның он тоғыз жылдық жұмы­сын­да, оның сессияларын­да мемлекет өміріндегі маңызды мәселелер қаралды, атап айт­қанда, жаңа Конституцияны қабылдау жөнінде референдум бастамашылығы, Қазақ­стан­ның егеменді мемлекет ретінде қалыптасып, даму стра­те­гиясы, Қазақстан Рес­пуб­­ли­­ка­сының тілдерді қол­дану мен дамытудың мем­ле­кеттік бағдарламасы, «Қоғамның идеялық ұйысуы – Қазақстанның дамуының бас­ты шарты» тұжырымдамасы, Қазақстанының Ел бірлігі доктринасы осы ассамблея сессияларында қаралғанын білесіздер.

– Кезекті сессия жұмы­сына кімдер шақырылды?

– Биылғы кезекті сессия «Қазақстан – 2050» стратегиясы: бейбітшілік, руханият және келісім мәдениеті» тақырыбында өтеді. Оның жұмысына барлық аймақтарғы ассамблея мүшелері, респуб­ли­калық және өңірлік этно­мәдени бірлестіктердің төра­ға­лары, Парламент депу­­тат­тары, орталық атқа­ру­шы органдардың, саяси партиялардың, діни бірлес­тік­тер­дің, үкіметтік емес ұйым­дар­дың басшылары, шет елдердің дипломатиялық миссиялары, ғылыми және шығар­ма­шылық интеллигенция және БАҚ өкілдері, ұзын-саны 1300-ден астам адам қатыспақ.

– Қалыптасқан дәстүр бойынша сессия қарсаңында да түрлі шаралар өткізіледі ғой.

– Иә. ҚХА-ның ХХІ сессиясы қарсаңында Ассамблея кеңесінің кеңейтілген отырысы өтеді. Тұрақты қызмет ететін Қазақстан халқы ассамблеясы Кеңесіне республикалық этномәдени бірлестік өкілдерінен, қоғам қайраткерлерінен, Парламент депутаттарынан, министрлер мен облыс әкімдерінен құралған 64 адам мүше болады.

Сессия бағдарламасы аясында аймақтардан келетін делегаттар үшін бекітілген орталық мемлекеттік органдар басшыларымен, Ассамблеядан сайланған ҚР Парламенті Мәжілісі депутаттарымен кездесулер өткізіліп, Астана қаласының көрікті жерлеріне экскурсиялар ұйымдастырылады.

Айгүл УАЙСОВА