…كۇلكى قىمبات!

0 403

thumb-1400x733

ادام بالاسى قاشاندا كۇلكىنىڭ تاۋسىلماۋىن تىلەيدى. ويتكەنى يۋمور بار جەردە ءومىر بار. كۇلكى – كۇللى جامانشىلىق اتاۋلىعا، ءارتۇرلى دەرتكە قارسى قولدانىلاتىن قۋاتتى قارۋ. كۇلكىنىڭ ماقساتى – ادامدارعا باقىت سىيلاۋ، ادامدى تاربيەلەۋ. مىسىر حالقىنىڭ ەجەلگى اڭىزى بويىنشا قۇدايدىڭ كۇلكىسى الەمنىڭ جاراتىلۋىنا ىقپال ەتكەن كورىنەدى. كۇلكى ادام بالاسىن ۇلتىنا، جىنىسىنا، تەگىنە، الەۋمەتتىك جاعدايىنا قاراي ءبولىپ، الالامايدى. كىم دە بولسىن كەز كەلگەن ۋاقىتتا قالاۋىنشا كۇلىپ، كوڭىلىن جاسارتادى ءھام ءومىرىن ۇزارتادى. ەل باسىنا تونگەن قيىن كۇندەردە كۇلكى ەڭكىش تارتقان ەڭسەلەردى كوتەرۋگە، السىرەگەن رۋحتى كۇشەيتۋگە كومەكتەسكەن.

دەرەكتەرگە جۇگىنەر بولساق، كۇلكى كۇنىن تويلاۋ العاش فرانتسيادان باستاۋ العان. ەجەلگى ريمدىكتەر «اقىماقتار مەرەكەسىن»17 اقپاندا اتاپ وتكەن بولسا، ناۋرىزدىڭ 31-ىندە «قالجىڭداۋ سالتى» شىعىس ءۇندىستاندا ەتەك العان ەكەن. ال، رەسەيدىڭ پەتەربور قالاسىنىڭ تۇرعىندارى ءبىر كۇنى ادەتتە ءورت شىققاندا قاعىلاتىن دابىل داۋسىنان ويانادى. ابىگەرگە تۇسكەن حالىق ءورت وشاعىن كورە المايدى. سويتسە، بۇل ازىلكەشتەردىڭ ويىنى ەكەن. وقيعا 1 ءساۋىر كۇنى بولعان. وسى كەزدەن باستاپ بۇل ويىن حالىق قولداۋىنا يە بولىپ، كۇلكى كۇنىنە اينالادى. كۇلكى كۇنىنىڭ اتالۋى مەن ەرەكشەلىگىنە كەلەر بولساق، فرانتسيا، انگليا، امەريكادا بۇل – اقىماقتار كۇنى، يسپانيادا – دوكىرلەر، ءۇندىستاندا – توقىلداق، جاپونيادا – قۋىرشاقتار، شوتلانديادا «تەپكى كۇنى» دەپ اتالادى ەكەن. بۇل كۇنى اركىم تانىستارىنىڭ ارقاسىنا سەزدىرمەي «مەنى تەپ» دەگەن جازۋ ىلەدى دە، ونى سىرتتاي كۇلكىگە اينالدىرادى. اتى ايتىپ تۇرعانداي، بۇل كۇنگى قالجىڭعا ەشكىم رەنجىمەيدى. ءبىر قىزىعى بۇل مەيرام كوپتەگەن ەلدە تويلانعانىمەن، ەش جەردە رەسمي مەرەكە رەتىندە تىركەلىپ، دەمالىس جاريالانباعان ەكەن.

ءازىل-قالجىڭعا قاشاندا تەرىس قارامايتىن قازاق حالقى دا «كۇلكى كۇنىن» ەسكەرۋسىز قالدىرماعان. قىستىڭ قىسپاعىن، ەرتە كوكتەمنىڭ الاي-دۇلەي مىنەزىن قالجىڭمەن جۋىپ-شايعىسى كەلگەن حالىق ءبىر-ءبىرىنىڭ كوڭىلىن قالجىڭمەن كوتەرۋگە تىرىسادى. بىزدىڭشە، قازىرگى زاماندا بىرەۋدى كۇلدىرۋ ءۇشىن دە اسا زور قيال قابىلەت، ەرەكشە تالانت كەرەك شىعار… كۇلمەسحاندار ارامىزدا كوبەيىپ بارا جاتقان زاماندا كۇلدىرە ءبىلۋدىڭ ءوزى – ونەر!

سىزدە بۇل كۇنى ۇلكەن-كىشى، جاس-كارىنى ءبىر الداپ قويۋدى ۇمىتپاڭىز.

ەركەجان ساتىمبەك

 

 

پىكىر جازۋ

پوچتاڭىز جاريالانبايدى

18 − thirteen =