Küyşi – qurmetti professor

0 213

Qazaq ulttıq öner wnïversïtetinde «Arqanıñ dästürli küyşilik öneri. Muhametjan Tilewhan şığarmaşılığı» attı alqalı mäjilis ötti. Şara barısında küyşi-kompozïtorğa Qazaq ulttıq öner wnïversïtetiniñ Qurmetti professorı atağı berildi.

0L4A0094

Mäjilis tizginin «Dombıra» kafedrasınıñ professorı Janğalï Jüzbay ustadı. Otırıstı äygili änşi-ustaz, Qazaqstannıñ halıq ärtisi, Memlekettik sıylıqtıñ lawreatı Qayrat Baybosınov aşıp berdi. Änşi, öner zerttewşi, Qazaqstannıñ eñbek siñirgen ärtisi Serik Ospanov estelikterdi jañğırtıp, ännen şaşw şaştı.

Şara bïıl mereyli 75 jasqa kelgen Muhametjan Tilewhannıñ koncertine ulastı. Küyşi-kompozïtor Saydalı Sarı Toqanıñ, Dayrabaydıñ, Äşimtaydıñ, Tättimbettiñ, Tölegen Mombekovtiñ küylerin, öziniñ töl twındısı «Arman-ay» küyin şertti.

Şertpe küy şeberi keñes zamanında QazKSR eñbegi siñgen mädenïet qızmetkeri atağın aldı. Täwelsizdik kezeñinde Qazaqstannıñ eñbek siñirgen qayratkeri atandı. 1972 jılı Almatığa Jambıl Jabaevtıñ 125 jıldıq toyına arnayı şaqırılıp, Toqanıñ «Tört tolğaw» küyin orındap, Säbït Muqanov, Äbdilda Täjibaev, Ädï Şäripov, Raqımjan Qoşqarbaev, Rahmanqul Berdibay sekildi ädebïetimiz ben mädenïetimizdiñ körnekti tulğalarınıñ köñilinen şığıp, rïzalığına bölenedi.

Roza Bağlanova, Nurğïsa Tilendïev öz kezinde küyşi-kompozïtordıñ önerine qol soqtı. Käkimbek Salıqov, Jänibek Kärmenov küyşige öleñderin arnadı. Jïında osınday estelikter aytıldı. Qobızşı Rawşan Orazbaeva, küyşi Rımhan Äbilhanulı jılı lebizderin jetkizdi. Şaranı «Dombıra» kafedrasınıñ meñgerwşisi Batırlan
Äbenov tüyindedi.

 

 

Pikir jazw

Poçtañız jarïyalanbaydı

six − six =