كولىگىڭ اۋىر بولسا، ابايلاپ ءجۇر

0 62

ەلىمىزدەگى رەسپۋبليكالىق ماڭىزى بار جولداردىڭ ساپاسى قانداي؟ جۇك كولىكتەردىڭ تاس جولعا باتىپ كەتۋ وقيعاسىنىڭ جيىلەۋىنە نە سەبەپ؟ كەشە ارنايى ۇيىمداستىرىلعان ءباسپاسوز ءماسليحاتىندا وسى ماسەلەلەر تالقىلاندى.

– جول ساپاسىنىڭ جىلدان جىلعا ناشارلاۋىنا جۇك كولىك جۇرگىزۋشىلەرىنىڭ جىل­دام­دىق­تى عانا ەمەس، تيەپ ا­لعان زاتتارىنىڭ سالماعىن دا شا­مادان تىس ارتتىرىپ الۋى اسەر ەتەدى. ولاردىڭ اراسىندا قىتايدان شىققان جۇكتى ءوزى اۋداراتىن كولىكتەردىڭ ۇلەسى كوبىرەك، – دەيدى نۇر-سۇلتان قالاسى بويىنشا كولىكتىك با­قىلاۋ ينسپەكتسياسى اۆتوموبيل كولىگىندەگى باقىلاۋ ءبولى­مىنىڭ باسشىسى الىبەك بيماعانبەتوۆ.
اتاپ ايتارلىعى، تەك قانا ەلوردادا 3000-نان اسا جۇك كو­­لىگى تىركەلگەن بولسا، سونىڭ 2500-ءىنىڭ سالماعى اسفالت جولدا جۇرۋگە سايكەس كەلمەيدى. ءالى­بەك بيماعانبەتوۆتىڭ سوزىنە جا­قىن­دا كيەۆكا مەن وساكاروۆكا كەنت­تەرى ارالىعىندا بولعان جاع­داي دالەل. جۇك كولىگىنىڭ ءوزى 22 توننا بولسا، تيەپ العان زاتى 40 توننادان اسىپ، ناتيجەسىندە تاس جول كوتەرە الماي بەلشەسىنەن جەرگە كىرىپ كەتكەن بولاتىن. وعان كوكتەمگى ىلعالدان كەيىنگى اسفالت استىنداعى توپىراقتىڭ بوساۋى دا اسەر ەتىپتى. وبلىس­تىق ما­ڭىزى بار جولداردا مۇن­داي كولىك­تەردىڭ جۇرۋىنە تىيىم سالىنعان.
جيىن بارىسىندا قوزعالعان تاعى ءبىر ماسەلە، جۇك تاسيتىن كولىكتىڭ كوبىندە تاۋار-كولىك قۇجاتى بولماي جاتادى ەكەن. وسى سەبەپتى، بىلتىر 452 جۇرگىزۋشى جاۋاپقا تارتىلىپ، ولارعا 19 ملن 841 مىڭ تەڭگە ايىپپۇل سالىنعان. سونداي-اق وتكەن جىلعى تەكسەرىس كەزىندە ەلوردا ماڭىنداعى قوسشى مەن تالاپكەر ەلدى مەكەندەرىندە 3107 سالماعى اسا اۋىر جۇكتى ءوزى اۋداراتىن كولىكتەردەن 541 زاڭ بۇزۋشىلىق انىقتالعان. ولارعا باس-اياعى 43 ملن 207 مىڭ تەڭگە ايىپپۇل سالىنىپتى. ءباسپاسوز جيىنىندا تەكسەرىس كەزىندەگى ءتۇرلى پروبلەمالار ارنايى بەينە ارقىلى كورسەتىلدى.
بىلتىر جىل بويى كولىكتىك باقىلاۋ ينسپەكتسياسى مەن ەلوردالىق اكىمشىلىك پوليتسيا باسقارماسى تىعىز بايلانىستا بولىپ، زاڭ بۇزۋشىلىققا باراتىن جۇك كولىكتەرىن انىقتاۋدى ءجىتى نازارعا العان. وسى رەتتە 2000-نان اسا اۋىر كولىكتەر تەكسەرىستەن ءوتىپ، ءتيىستى ەرەجەنى ساقتاماعاندارى جاۋاپقا تارتىلدى.
قازىر كولىكتىك باقىلاۋ ينسپەكتسياسى مەن نۇر-سۇلتان اكىمدىگى بىرىگىپ، بيىلعا ارنالعان جول كارتاسىن دايىنداپ شىعاردى. ەندى جوعارىدا كوتەرىلگەن ماسەلەلەر شەشىمىن تابادى دەگەن ءۇمىت بار.

پىكىر جازۋ

پوچتاڭىز جاريالانبايدى