KÖKEYTESTİ MÄSELELER KÖTERİLDİ

0 141

ZAH_4236

Keşe Esil awdanınıñ äkimi Säbïla Mustafïna öziniñ halıq aldındağı eseptik kezdeswin ayaqtadı. Köptegen kökeytesti mäseleler köterilgen alqalı jïınğa Astana äkiminiñ orınbasarı Andrey Lwkïn qatıstı

Awdan äkimi eñ aldımen 2014 jılda atqarılğan jumıstardı qorıtındıladı. Onıñ aytwınşa, üstimizdegi jılı 4 jalpı bilim, 6 mektepke deyingi bilim mekemesi aşıladı. Sonımen qatar, bïıl üş densawlıq saqtaw nısanı men ambwlatorïyalıq-emhana ortalığın salw josparlanıp otır. Bayandama oqılğan soñ, kezdeswge jïnalğandar özderin mazalağan suraqtarın qoyıp, ötinişterin bildirdi. Mısalı, ötken jılğı kezdeswde Sarayşıq 9-da avtokölikti qoyuğa tıyım salatın jol jürw belgisin ornatw mäselesi köterilgen eken. Alayda, «Kölik basqarması men qalalıq İşki ister departamentiniñ ökilderi kelip, män-jaydı öz közderimen körip, «mäseleni şeşemiz» dep wäde bergen. Alayda eşqanday oñ özgeris bolmay, Astana qalasınıñ Jolawşılar köligi jäne avtomobïl' joldarı basqarması ünsiz qaldı» deydi turğındar.

Al, «Sawran köşesindegi 5,7,9-üylerdiñ kireberisin qalpına keltirw jayın qozğasaq, PÏK qızmetkerleriniñ aytatını: «Sender är şarşı metrine 350 dollar tölep, päter satıp aldıñdar. Endi aqşanı özderiñ jïnap, jöndew jumıstarın jürgiziñder» deydi. Bul mäseleni şeşwdiñ basqa qanday tïimdi joldarı bar?» degen suraqtı estigen qala äkiminiñ orınbasarı Andrey Lwkïn qurılıstı kim jürgizetinin, turğındar qanşadan qosılw kerektigin Turğın üy ïnspekcïyası basqarmasınıñ basşısı Talğat Rısbekovke üş künniñ işinde anıqtawdı buyırdı.

Sonday-aq, qalalıqtardıñ birazı öz qawipsizdigine alañdawlı ekendikterin ayttı. Öytkeni, «Saranda» turğın üy keşeninde urlıq, päterdi buzıp kirw sïyaqtı qılmıstar jïi orın aladı eken. Buğan Säbïla Saparqızı: «Negizinen, «Saranda» turğın üy keşenine «Qazaqstan temir jolı» AQ, «QazTransGaz» AQ qızmetkerleri qonıstandı. Biz osı Ulttıq kompanïyalardıñ basşılığına «Qawipsiz qala» bağdarlamasına qatısıp, turğın üydiñ perïmetri boyınşa sırtqı beynebaqılaw qurılğısın ornatwdı usınayıq» dep jawap berdi. Budan bölek, jol qurılısı, köşelerdi jarıqtandırw, qoğamdıq kölikterdiñ qozğalısın jïiletw mäseleleri boyınşa qala turğındarı awdan äkimdigi tarapınan qanağattanarlıq jawaptar aldı. Al, qala äkiminiñ orınbasarı Andrey Lwkïn är aytılğan ötiniş ïesin kezdeswge qatısqan basqarma basşılarına bağıttap, olardan söz etilgen talap-tilekterdi tarazılap, üş künnen keşiktirmey, jazbaşa jawap berilwin talap etti.

 

Mädïna JAQIP

Pikir jazw

Poçtañız jarïyalanbaydı

six − 2 =