كوكەيتەستى ماسەلەلەر كوتەرىلدى

0 142

ZAH_4236

كەشە ەسىل اۋدانىنىڭ اكىمى ءسابيلا مۇستافينا ءوزىنىڭ حالىق الدىنداعى ەسەپتىك كەزدەسۋىن اياقتادى. كوپتەگەن كوكەيتەستى ماسەلەلەر كوتەرىلگەن القالى جيىنعا استانا اكىمىنىڭ ورىنباسارى اندرەي لۋكين قاتىستى

اۋدان اكىمى ەڭ الدىمەن 2014 جىلدا اتقارىلعان جۇمىستاردى قورىتىندىلادى. ونىڭ ايتۋىنشا، ۇستىمىزدەگى جىلى 4 جالپى ءبىلىم، 6 مەكتەپكە دەيىنگى ءبىلىم مەكەمەسى اشىلادى. سونىمەن قاتار، بيىل ءۇش دەنساۋلىق ساقتاۋ نىسانى مەن امبۋلاتوريالىق-ەمحانا ورتالىعىن سالۋ جوسپارلانىپ وتىر. بايانداما وقىلعان سوڭ، كەزدەسۋگە جينالعاندار وزدەرىن مازالاعان سۇراقتارىن قويىپ، وتىنىشتەرىن ءبىلدىردى. مىسالى، وتكەن جىلعى كەزدەسۋدە سارايشىق 9-دا اۆتوكولىكتى قويۋعا تىيىم سالاتىن جول ءجۇرۋ بەلگىسىن ورناتۋ ماسەلەسى كوتەرىلگەن ەكەن. الايدا، «كولىك باسقارماسى مەن قالالىق ىشكى ىستەر دەپارتامەنتىنىڭ وكىلدەرى كەلىپ، ءمان-جايدى ءوز كوزدەرىمەن كورىپ، «ماسەلەنى شەشەمىز» دەپ ۋادە بەرگەن. الايدا ەشقانداي وڭ وزگەرىس بولماي، استانا قالاسىنىڭ جولاۋشىلار كولىگى جانە اۆتوموبيل جولدارى باسقارماسى ءۇنسىز قالدى» دەيدى تۇرعىندار.

ال، «ساۋران كوشەسىندەگى 5,7,9-ۇيلەردىڭ كىرەبەرىسىن قالپىنا كەلتىرۋ جايىن قوزعاساق، پيك قىزمەتكەرلەرىنىڭ ايتاتىنى: «سەندەر ءار شارشى مەترىنە 350 دوللار تولەپ، پاتەر ساتىپ الدىڭدار. ەندى اقشانى وزدەرىڭ جيناپ، جوندەۋ جۇمىستارىن جۇرگىزىڭدەر» دەيدى. بۇل ماسەلەنى شەشۋدىڭ باسقا قانداي ءتيىمدى جولدارى بار؟» دەگەن سۇراقتى ەستىگەن قالا اكىمىنىڭ ورىنباسارى اندرەي لۋكين قۇرىلىستى كىم جۇرگىزەتىنىن، تۇرعىندار قانشادان قوسىلۋ كەرەكتىگىن تۇرعىن ءۇي ينسپەكتسياسى باسقارماسىنىڭ باسشىسى تالعات رىسبەكوۆكە ءۇش كۇننىڭ ىشىندە انىقتاۋدى بۇيىردى.

سونداي-اق، قالالىقتاردىڭ ءبىرازى ءوز قاۋىپسىزدىگىنە الاڭداۋلى ەكەندىكتەرىن ايتتى. ويتكەنى، «ساراندا» تۇرعىن ءۇي كەشەنىندە ۇرلىق، پاتەردى بۇزىپ كىرۋ سياقتى قىلمىستار ءجيى ورىن الادى ەكەن. بۇعان ءسابيلا ساپارقىزى: «نەگىزىنەن، «ساراندا» تۇرعىن ءۇي كەشەنىنە «قازاقستان تەمىر جولى» اق، «قازترانسگاز» اق قىزمەتكەرلەرى قونىستاندى. ءبىز وسى ۇلتتىق كومپانيالاردىڭ باسشىلىعىنا «قاۋىپسىز قالا» باعدارلاماسىنا قاتىسىپ، تۇرعىن ءۇيدىڭ پەريمەترى بويىنشا سىرتقى بەينەباقىلاۋ قۇرىلعىسىن ورناتۋدى ۇسىنايىق» دەپ جاۋاپ بەردى. بۇدان بولەك، جول قۇرىلىسى، كوشەلەردى جارىقتاندىرۋ، قوعامدىق كولىكتەردىڭ قوزعالىسىن جيىلەتۋ ماسەلەلەرى بويىنشا قالا تۇرعىندارى اۋدان اكىمدىگى تاراپىنان قاناعاتتانارلىق جاۋاپتار الدى. ال، قالا اكىمىنىڭ ورىنباسارى اندرەي لۋكين ءار ايتىلعان ءوتىنىش يەسىن كەزدەسۋگە قاتىسقان باسقارما باسشىلارىنا باعىتتاپ، ولاردان ءسوز ەتىلگەن تالاپ-تىلەكتەردى تارازىلاپ، ءۇش كۇننەن كەشىكتىرمەي، جازباشا جاۋاپ بەرىلۋىن تالاپ ەتتى.

 

ءمادينا جاقىپ

پىكىر جازۋ

پوچتاڭىز جاريالانبايدى

2 + 4 =