Kelimbetov keñistigi

0 115

QR Bilim jäne ğılım mïnïstrliginiñ türki akademïyasında «Türki halıqtarınıñ ejelgi ädebï jädigerlikteri jäne Nemat Kelimbetov şığarmaşılığı» taqırıbında ğılımï-täjirïbelik konferencïya boldı. Ğalımdar, qalamger şığarmaşılığın är qırınan taldap, onıñ ölmes murasına layıqtı bağa berdi.
Elimizde – «Qurmet» ordenimen (2001 jılı), halıqaralıq därejede –F.Kafka atındağı Ewropa qoğamınıñ altın belgisimen (2010 jılı) marapattalğan Nemat Kelimbetov – türkitanwşı-ğalım, jazwşı, sonımen qatar, qoğam qayratkeri. Tağdırı tawqımet üstinde ötse de, qalamger eşqaşan moyımağan. Otız bes jasında kürdeli ota jasatqannan keyin uzaq jıldar boyı awrw azabın tarttı. Äytse de, tulğalıq iriligin saqtay bildi. Tän azabın tartıp, janı qïnalğan jıldarın da adam rwhın janïtın keremet körkem dünïege aynaldırdı.
Ğumırında «tağdırdıñ dawılı soqqan kezde tamırı tereñ adam ğana uşıp ketpey, aman qaladı» dep, bolmıs bïiktigi men tanım tereñdigine umtılğan ol qazaq ädebïetine tıñnan türen salğan. Kültegin däwirinen be-rirekten bastalıp jürgen ädebïet tarïhın sonaw saq, ğun däwirine deyin tarttı. Solayşa, öziniñ ğılımï däyekti eñbekterimen qazaqtıñ bertinde ğana payda bolğan, tamırsız halıq emes ekenin, qazaq tarïhınıñ, ädebïet tarïhınıñ san ğasırdı qamtïtının däleldedi. Sol eñbektiñ jemisi – «Ejelgi däwir ädebïeti» büginde stwdentterdiñ qolınan tüspeytin oqwlıqqa aynaldı.
Jïın barısında Şäkir Ibıraev, Ğarïfolla Esim, Sawıtbek Abdrahmanov, Şerwbay Qurmanbayulı, tağı da basqa qalam qayratkerleri, türkolog-ğalımdar bayandama jasağan. Jazwşı-ğalımnıñ şığarmaşılığın qamtığan kitap körmesi de uyımdastırıldı.
P.S.
Nemat Kelimbetov 1937 jıldıñ 4 säwiri küni twğan. Közi tiri bolsa, bïıl 75 jasqa tolar edi… Tulğanıñ twğan künine oraylastırılğan ğılımï konferencïyağa tuyağı – QR Ükimet basşısınıñ orınbasarı Qayrat Kelimbetov te kelip qatıstı.

Näzïra SAYLAWQIZI

Pikir jazw

Poçtañız jarïyalanbaydı

four − three =