ىسكەرلىك ىلگەرىلەۋ كەپىلى

0 87

كەشە استانا قالاسى كاسىپكەرلەرىنىڭ ءىىى جىل سايىنعى كونفەرەنتسياسى ءوتتى. وعان شاھار باسشىسى ادىلبەك  جاقسىبەكوۆ قاتىستى. بۇل تۋرالى اكىمدىكتىڭ ءباسپاسوز قىزمەتى حابارلادى. 

جيىندا ءسوز العان «اتامەكەن» ۇلتتىق كاسىپكەرلەر پالاتاسىنىڭ توراعاسى تيمۋر قۇلىباەۆ كا­سىپكەرلىكتى قولداۋ جونىندەگى جۇ­مىستاردىڭ ناتيجەلەرىن جوعارى باعالادى. «ەلوردادا ىسكەرلىك كليماتتى دامىتۋ ءۇشىن قولايلى جاعداي جاسالعان. استانالىق تاجىريبەنى رەسپۋبليكانىڭ باسقا دا قالالارىنا قولداناتىن بولامىز» دەدى ول.

ەلوردا اكىمى ادىلبەك جاقسىبەكوۆ ەكونوميكالىق الەۋەتتىڭ ءوسۋى، قالا تۇرعىن­دا­رىنىڭ ءال-اۋقاتى مەن ءومىر ءسۇرۋ جايلىلىعى دەڭگەيىنىڭ ارتۋى، جاس استانانىڭ زاماناۋي كەلبەتى مەن ءيميدجى كاسىپكەرلىكتىڭ ىسكەرلىك بەلسەندىلىگىنە تىكەلەي بايلانىستى ەكەندىگىن اتاپ ءوتتى. سونداي-اق، ەلوردانىڭ باستى ەكونوميكالىق كور­سەت­كىشتەرىنە توقتالدى. ادىلبەك جاقسىبەكوۆتىڭ ايتۋىنشا، 2050 جىلعا قاراي شاعىن جانە ورتا بيزنەستىڭ جالپى ونىمدەگى ۇلەسىن كەم دەگەندە 50 پايىزعا جەتكىزۋ تۋرالى مەملەكەت باسشىسىنىڭ مىندەتى مەرزىمىنەن بۇرىن ورىندالدى. قازىرگى تاڭدا وسى تالاپ تۇرعىسىنان استانانىڭ ۇلەسى 61 پايىزعا جەتتى. شاعىن جانە ورتا كاسىپكەرلىكپەن ءاربىر ءۇشىنشى تۇرعىن، ياعني، 283 مىڭ استانالىق اينالىسادى. ەلوردا – ونەركاسىپتىك ءوندىرىس ءوسىمىنىڭ قارقىنى بويىنشا دا كوشباسشىلار قاتارىندا.

كونفەرەنتسيادا «بيزنەستىڭ جول كارتاسى – 2020» باعدارلاماسى ءساتتى ىسكە اسىرىلىپ جاتقانى ايتىلدى. استانا نەسيەلەردى كەپىلدەندىرۋدەن رەسپۋبليكادا ءبىرىنشى، ال سۋبسيديالاۋدان ەكىنشى ورىندا. وسىعان دەيىن جالپى قۇنى 88 ميلليارد تەڭگەنىڭ 504 جوباسى قولداۋ تاپتى.

ەلوردادا كاسىپكەرلەرگە قىزمەت كورسەتۋ ورتالىعى تابىستى جۇمىس ىستەۋدە. وندا اقپاراتتىق جانە كونسۋلتاتسيالىق قولداۋ بويىنشا قىزمەتتەر كەشەنى «ءبىر تەرەزە» قاعيداتىمەن تەگىن كورسەتىلەدى. بىلتىر مۇندا 13,5 مىڭ كونسۋلتاتسيالىق قىزمەت كورسەتىلگەن. بۇل رەتتە كومەككە جۇگىنگەندەردىڭ جارتىسىنان استامى قارجىلىق قولداۋ مەن وقىتۋ شارالارىنا قىزىعۋشىلىق تانىتقان.

باسقوسۋدا يندۋستريالدى پارك­تەگى بيزنەس وكىلدەرىنە بەرى­لەتىن باسىمدىقتار دا تالداندى. بۇگىندە №1 يندۋستريالدى پارك اۋماعىندا جالپى قۇنى 187,5 ميلليارد تەڭگەنىڭ 62 ينۆەستيتسيالىق جوباسى جۇزەگە اسىرىلۋ ۇستىندە. وسى كاسىپورىنداردىڭ بيۋدجەتكە تولەگەن سالىعى ەسەبىنەن پارك ينفراقۇرىلىمىنىڭ قۇرىلىسىنا جۇمسالعان قارجى تولىعىمەن اقتالدى. وعان قوسا، 3 مىڭنان استام جۇمىس ورنى قۇرىلدى. №1 يندۋس­تريالدى پارك اۋماعىندا قۇرىلىس، قوندىرعىلار، ماشينا جاساۋ، شيكىزات جانە ونەركاسىپ سالالارىنداعى جوبالار ىسكە اسىرىلسا، №2 پاركتە ەكولوگيالىق جانە يننوۆاتسيالىق باستامالارعا باسىمدىق بەرىلەدى. ەلوردا اكىمى كاسىپكەرلىك ورتا وكىلدەرىن وسى سالالارعا نازار اۋدارۋعا جانە يننوۆاتسيالىق بيزنەس يدەيالاردى بەلسەندى تارتۋعا شاقىردى.

astana-akshamy.kz

پىكىر جازۋ

پوچتاڭىز جاريالانبايدى

6 − one =