ІРГЕЛІ ІЗДЕНІСТЕРГЕ БАСТАЙДЫ

0 102

Ашығын айту керек, еліміздегі игі өзгерістер тәуелсіздіктің нәтижесінде жүзеге асырылуда. Барлық саланың бойына қан жүгіріп, еңселі ғимараттар пайдалануға берілді. Алтын бағаналы мекен Астана Сарыарқа төрінен бой көтеріп, біздің ата-бабаларымыз армандап кеткен асыл мұраттар  ақиқатқа айналды. Кешенді бағдарламалар қабылданып, халықтың тұрмыс тіршілігі жақсара түсті. Заманауи техниканы меңгеруге сала қызметкерлері ден қойды. Жастарымыз шетелде білім алып, ел игілігіне қызмет жасап жатыр.

Білім, медицина, денсаулық са­­ласына мемлекетіміз жыл сайын қыруар қаражат бөліп, хал­қымыздың әл-ауқатын жақ­сартуға ерекше көңіл бөліп ке­леді. Ал, медицинадағы ір­ге­лі жетістіктерімз бен жаңалықта­рымыз біздің тиянақты жұмыс істеуіміздің сөзсіз дәлелі.
Бұрын жүрек-қан тамырларына отаны кеңірдектен кіндікке дейін тілу арқылы жасасақ, соңғы төрт жылдың бедерінде тамырға стент қою арқылы жүрек соғысын қалыпты деңгейге келтірдік. Яғни, адам денесіне пышақтың ізі түспейді. Мұндай жетістік айтулы мемлекеттердің еншісіне ғана тиесілі болып отыр.

Президентіміз Нұрсұлтан Назар­баев «Қазақстан-2050» Стратегиясы: қалыптасқан мем­лекеттің жаңа саяси бағы­ты» атты Жолдауында ұлт ден­саулығына ерекше маңыз беріп, мына мәселені қадап айтты: «Денсаулық сақтаудың ұлттық жүйесін ұзақ мерзімді жаңғырту аясында біз елдің барлық аума­ғына медициналық қызметтер сапасының бірыңғай стандарттарын енгізуге, сондай-ақ, медицина мекемелерінің материалдық-техникалық жабдықталуын бір­ың­ғай­ландыруға тиіспіз». Біз бұл айтылған тапсырмаға аса сер­гектікпен қарап, қызметті барынша оңтайландыруға тиіс­піз. Бұл тұрғыдағы жұмыстар ұлттық ғылыми медициналық орталығында сапалы деңгейде орындалуда.
Қоғам байлығы – адам тағдыры қай кезеңде де басты назарда тұрады. Олардың елімізге тигізер пайдасы ұшан-теңіз. Ал дәрігерлер міндетіне бар білгенін халқынан аянбау жүктелген.

Бегылан СТАМБОЛҰЛЫ,
Ұлттық ғылыми медициналық орталық интервенциялық кардиология бөлімшесінің меңгерушісі

Пікір жазу

Почтаңыз жарияланбайды

five + 14 =