ИНТЕГРАЦИЯ ИГІЛІГІН КӨРУІМІЗ КЕРЕК

0 112

1111

Сәрсенбі күні Орталық коммуникациялар қызметінде өткен брифингте Жоғары оқу орындары қауымдас-тығының президенті Рахман Алшанов пен Қазақстанның азаматтық альянсының президенті Нұрлан Ерімбетов интеграция жолында ұлттық кәсіпкерлікті дамыту тақырыбында сөз өрбітті.

«Бүгінгі таңда барлық озық елдер бір-біріне экономикалық тұрғыда тәуелді. Біз өзіміз бай­қамасақ та, күнделікті тұр­мы­сымызда инте­грациялық байланысқа түсіп жатырмыз. Бұл үрдіске жатырқай қарамай, болашақта дүниежүзілік сауда ұйымына өтетінімізді ескеріп, бүгінді ертеңмен сабақтастыра бизнес көздерін ашуды жос­парлауымыз қажет. Ол үшін өзіміздің Отандық инвесторлар Қазақстанда жаңа инно­вациялық кәсіпорындар салуы керек. Қазақстандық инвес­тор­лар жаңа ұсыныстар білдіріп, кәсіпкерлерге қолдау көрсетуі тиіс. Мысалы, Шве­циядағы шағын кәсіпорындардың 80 пайызы – инновациялық кәсіп­орындар екен. Ал, бізде бұл көрсеткіш тек 5-6 пайызды ғана құрайды. Кедендік одаққа және Еуразиялық кеңістікке қосылу тұрғысынан алғанда, инвес­тиция салудың мүмкіндігі зор және нарық рентабельдігі артады. Ұлттық инвесторлар кеңесінің отырысында Мемлекет басшысы да отандық бизнес-қауымдастықтың өкіл­дерін ұлттық экономикаға үлес қосуға ша­қырды. Яғни, елімізде инвестицияға сұраныс бар. Отандық бизнесте ресурс жеткілікті бола тұра, шетелдік инвесторларға сұраныс тудыруды тоқтатуымыз қажет» деді Рахман Алшанов.

Оның бұл ойымен келіспеске болмайды. Осы орайда «өз қа­за­ным қайнамай қарының тоймайды» деген аталарымыздың ақылды сөзі еріксіз еске түседі.

«Бәсекелі ортаға кіру өзімізге деген талапты күшейтеді, дамуды ынталандырады. Еуразиялық эконо­микалық одаққа деген көзқарас мәсе­лесіне тек бизнес тұрғысынан емес, тұтынушылардың талабы мен сұранысы бойынша зер салған жөн. Ең бас­тысы, интеграция ұлттық бренд­терімізді насихаттап, елдің экономикалық күшін бірік­ті­ретін басты бағыт болуы тиіс» дейді Қазақ­станның Азаматтық альянсының президенті Нұр­лан Ерімбетов.

 

Нұргүл МӘЛТІК

 

Пікір жазу

Почтаңыз жарияланбайды

19 − ten =