iKOMEK алтын көпірге айналды

0 18

«Astana» телеарнасының төтенше жағдай кезіндегі өзекті мәселелер жөнінде сөз қозғайтын «ELORDA LIVE» бағдарламасы бұл жолғы кезегін «төтенше жағдай кезіндегі iKOMEK 109 қызметінің жұмысы» деген тақырыпқа арнады. Студия қонағы болған Нұр-Сұлтан қаласы iKOMEK мониторинг және жедел әрекет ету орталығы жетекшісінің орынбасары Берік Ахметов сұхбат барысында iKOMEK қызметі төңірегіндегі сұрақтарға жауап берді.– iKOMEK қызметі астаналықтарға бейтаныс емес. Ол Нұр-Сұлтан қаласы әкімдігінің коммуналдық кәсіпорындарының барлық байланыс орталықтарын біріктіреді және қала тұрғындарына тәулік бойы қыз­мет етеді. Жай күндері бұл қыз­мет орталығына 500 мыңнан артық өтініш келіп түседі екен. Карантин кезінде бұл көрсеткіш азайды ма, әлде көбейді ме?
– Төтенше жағдай енгізілгелі iKOMEK орталығының қызметкерлері күніне орта есеппен 10-29 мың аралығында қоңырау қабылдап отыр. Бұл бұрынғыдан 2-3 есе көп. Келіп түсетін өтініштердің көбеюіне байланысты біз операторлардың санын 30-дан 62-ге көбейттік. Оның 9-ы үйде отырып, қашықтықтан жұмыс істейді.
– Өтініштерді тек телефон шалу арқылы ғана бере ала ма, әлде сайт арқылы да беруге бола ма?
– Өтініш берудің балама әдіс­тері көп. Атап айтқанда, 109 нөміріне тегін қоңырау шалудан бөлек, Қалалық әкімдік сайты (www.astana.gov.kz), Telegram чат-боты (https://t.me/nursultanikomek109_bot), iKOMEK 109 мобильді қосымшасы (PlayMarket https://play.google.com/store/apps/details?id=kz.techman.ikomek&pcampaignid=MKT-Other-global-all-co-prtnr-py-PartBadge-Mar2515-1 немесе Apple store https://itunes.apple.com/us/app/ikomek-109/id1447878430?mt=8), Smart Astana мобильді қосымшасы (PlayMarket|AppStore), 109@ikomekastana.kz электрондық мекенжайы арқылы да өтінімдер беруге болады.
– Өтініш көбейді дедіңіз, ендеше соның барлығына үлгеріп жауап беріп жатырсыздар ма? Өйткені төтенше жағдайға байланысты кейбір қызметкерлер қашықтықтан жұмыс істеп жатыр, кейбір коммуналдық қызмет көрсететін мекемелер жұмысын уақытша тоқтатты. Осы жағдайларға байланысты өтініштерге қалай жауап беріп жатырсыздар?
– Қазір жұрттың бәрі үйде отыр. Мысалы, тұрғындар «Астана су арнасына» шағым бермекші болса, олар қазір қабылдамайды. Қоғамдық көліктер де жүрмейді. Осындай жағдайда олар 109-ға қоңырау шалып, шағымдана алады. Осыған сәйкес бізге қоңырау шалатындар көбейді де, біз жоғарыда айтқанымыздай, операторлардың санын көбейттік. Демек, біз түскен ұсыныстарға толығымен жауап қайтарып жатырмыз.
– Өтініш берушілердің санының артуы iKOMEK-тің техникалық қызметіне кері әсерін тигізген жоқ па?
– Бұл мәселені біз алдын ала ескеріп, телефон арқылы хабарласу арналарын 70-тен 120-ға дейін көбейттік. Бұл – бір уақытта 120 адам өтініш бере алады деген сөз. Бұл – телефон шалған кезде кезек күтіп тұрып қалатын жағдайды азайттық деген сөз. Күтсе де 5 минуттан аспайды.
– Өтіншті қабылдайтын уақыттың шегі бар ма? Мәселен, бір адамға 2-3 минут деген секілді.
– Ол уақыт хабарласушының айтатын мәселесіне байланыс­ты болады. Мәселен, карантин кезінде қалаға кіру және шығу мәселелеріне байланысты қоңырау шалатындар көп. Оған біздің операторлар 2 тілде жауап бере алады, яғни қазақша сұраса қазақша, орысша сұраса, орысша жауап береді. Демек, қоңырауға жауап беру уақытымыз 1-5 минут аралығында деп айтуға болады.
– Карантиннен бұрын қала тұр­ғындарын білім беру инфрақұрылымы саласына, кө­лік-коммуникация саласына қатысты сұрақтар жиі мазалайтын. Ал қазіргідей төтенше жағдай кезінде тұрғындар қандай сұ­рақтармен жүгінеді?
– Карантин кезінде әлеуметтік көмекке, азық-түлікке, қаржылық мәселелерге қатысты сұрақтар көбейді. «Төтенше жағдай кезінде қандай мекемелер жұмыс істейді? Емханалар сағат нешеге дейін жұмыс істейді? Қандай көлікпен баруға болады?» деген мәселелер төңірегінде қоңырау шалады.
– iKOMEK тәулік бойы жұмыс істейді дедіңіз, сонда үзіліссіз, тәулік бойы жауап бере ме?
– Біздің орталық 365 күн тәулік бойы жұмыс істейді. Тұрғындардың кез келген уақытта хабарласуына болады.
– Хабарласқан тұрғындардың мәселелері жауапсыз қалатын кездері бола ма?
– Әрбір қоңырау біздің ішкі жүйе­ге енгізіледі. Оны біз күнделікті қадағалап отырамыз. Мәселен, пәлен жерде құдықтың аузы ашық жатыр, соны жабу керек деген өтініш түссе, бұл – 1-7 күн аралығында шешілетін мәселе. Шешілгеннен кейін біз өтініш берушіге істің нәтижесін хабарлаймыз. Ал жол салынса, көпір тұрғызылса деген сияқты ұзақ мерзімді қажет ететін жұмыс­тарға байланысты өтініштердің жауабы біраз уақытқа созылатыны рас. Өйткені оған қаражат, уақыт қажет. Міне, осы жағдайларға байланысты кейбір тұрғындар «өтінішіміз жауапсыз қалды» деп ағат түсінеді. Анығында біз ешкімнің өтінішін жауапсыз қалдырмаймыз.
– 109 қызметінің қызмет өнімділігін жетілдіре түсу жағын да үнемі қарастырып отырасыз­дар ма? Мысалы, осындай қызметтің шетелдік тәжірибесіне көп үңілесіздер ме?
– 2018 жылы бұл орталық құрылғанда бізге үлгі болатын тәжірибені АҚШ-тан көрдік. Ол – 911 қызметі. Бірақ ол біздің 112-ге ұқсайды. Сонымен қатар бұл елде 311 бірыңғай байланыс орталығы бар. Ол аталған елдің 300-ден астам қаласында қызмет көрсетеді, халық жедел сұрақтардан басқа көптеген сұрақтарына осы байланыс орталығы арқылы жауап ала алады. Біз iKOMEK-ті осыған негіздеп іске қостық.
– Елорда өзге өңірлерге үлгі болатын бас шаһармыз ғой. iKOMEK-тің ұтымды қызмет көрсетудей артықшылығын басқа қалалар да пайдаланып жатыр ма? Қарапайым тұрғындардан осы орталықтың қызметін жетілдіруге байланысты ұсыныстар да түсе ме?
– 2019 жылы Мемлекет басшысы Қасым-Жомарт Тоқаев біздің орталыққа келіп, iKOMEK-тің жұмысымен танысты. Осыдан кейін көп уақыт өтпей басқа қалаларға да осындай байланыс орталығын ашу жөнінде тапсырма берді. Менің білуімше, қазіргі таңда Түркістанда, Қостанайда, Павлодарда, Таразда, Қарағандыда ашылды. Бұл көрсеткіш болашақта тіпті көбейеді деп ойлаймын.
Ал қарапайым халықтан біздің қызметімізге байланысты ұсыныстар да түседі. Біз оның бәрін өз мүмкіндігімізді жетілдіру үшін пайдаланамыз.

Пікір жазу

Почтаңыз жарияланбайды

four × 5 =