حالىق اتىن قولجاۋلىققا اينالدىرمايىق…

0 239

قازىر «حالىق» ءسوزى، شەتەلشە ايتقاندا، «ترەند» (trend), قازاقشا ايتساق، «قولجاۋلىق» بولدى. وزىندە  جوعىن، قول جەتپەيتىن كەم جاعىن تۇگەندەگىسى كەلگەندەر «حالىق» دەپ اتاۋ قويىپ، ۇپاي جيناعىسى كەلەتىن سياقتى.

ولاي دەيتىنىم، جاقىندا عانا «حالىق العىسى» دەگەن توسبەلگى كوپشىلىكتى ءبىر جارىلقاپ تاستادى. قولى جەتكەندەر ءماز. شىنىمەن دە. جاي ەمەس، مۇقىم حالىقتىڭ العىسىن ارقالاپ ءجۇر ەكەن. بۇل، ارينە، سونداي «العىس» تيمەي قالعاننان تارىلىپ ايتىپ وتىرعان ءوزىمنىڭ جەكە پىكىرىم عوي. الايدا ماعان سالسا «حالىق العىسى» مەملەكەتتىڭ ەڭ بيىك، ەكىنىڭ ءبىرىنىڭ قولى جەتپەيتىن، ەرەن ەڭبەگىمەن، ماڭداي تەرىمەن، ەل الدىنداعى ادال قىزمەتىمەن الاتىن ماراپاتتىڭ بىرەگەيى بولعانىن قالار ەدىم. حالقىمنىڭ نارعاسقالارىنىڭ جۇرەگىنىڭ تۇسىندا حالىقتىڭ شىن العىسى جارقىراعاندا پەندەلىكتەن مەن دە ارىلىپ، قۋانار ەدىم.
ءمۇفتيات «حالىق ارنا» اشقالى جاتىر. قۇپ، ايتسە دە، اتىنان ۇلىق ءدىنىمىز اڭعارىلمايتىن ارنانىڭ بولاشاعى قالاي بولار ەكەن دەپ تاعى ويعا كەتتىم. ەندى «اسىل ارنا» ارنا اتىن ەمەس، مۇراعاتىن جاڭادان اشىلاتىن «حالىق ارناعا» بەرەدى دەيدى. «اسىل ارنانىڭ» قۇران ءسوزى، حاديستەرى مەن سول قۇراندى وقىپ-ۇيرەنۋگە ارنالعان باعدارلامالارى قۇپتارلىق ەدى. ءمۇفتيات تا وسى ارنانى اتىمەن دە، زاتىمەن دە الىپ، اسىلىن قالدىرىپ، جاسىعىن تاستاعاندا نە بولار ەدى؟! سەبەبى حالىقتىڭ ىشىندە ءدىنى بولەك، ءدىلى بولەكتەرى دە بار عوي…
ترەندتەن قالسىن با، كەشەگى قىزىل يمپەريانىڭ كوزىندەي بولىپ جۇرگەن بولشەۆيكتەر (كوممۋنيس­تەر) پارتياسى دا «حالىق» اتىن جامىلىپ شىعا كەلدى. كەڭ ۇعىممەن الىپ قاراساق، مىنا ءسىز بەن ءبىزدىڭ – بارشامىزدىڭ پارتيامىز. ءسىز بەن بىزدىكى. ايتا كەتەيىن، بۇل ۇدەرىستىڭ قىزىعى، بىزدەن حال سۇرامايدى، كوپتىڭ تىلەگىنە قارامايدى. سوندا ونىڭ قاي جاعى حالىقتىكى؟! جاڭا اتاۋلاردى، ۇيىمداردى تىركەيتىن قۇزىرلى ورىندار قايدا قاراپ وتىر؟ «حالىق» دەگەن قاسيەتتى ۇعىم ەمەس پە؟ حالىق نە ىستەي الادى؟ بىلمەيمىن.

 

 

پىكىر جازۋ

پوچتاڭىز جاريالانبايدى

17 + 19 =