«HALYK BANK» ەنگىزگەن جاڭا جۇيە

0 139

 مەملەكەت باسشىسى نۇرسۇلتان نازارباەۆ وتكەن جىلدىڭ باسىندا حالىققا ارناعان جولداۋىندا: «ءبىز تسيفرلىق تەحنولوگيانى قولدانۋ ارقىلى قۇرىلاتىن جاڭا يندۋستريالاردى وركەندەتۋگە ءتيىسپىز. بۇل – ماڭىزدى كەشەندى مىندەت. ەلدە 3D-پرينتينگ، ونلاين-ساۋدا، ءموبيلدى بانكينگ، تسيفرلىق قىزمەت كورسەتۋ سەكىلدى باسقا دا پەرسپەكتيۆالى سالالاردى دامىتۋ كەرەك» دەگەن. ەلباسىنىڭ وسى ءبىر تاپسىرماسىن ورىنداۋ بارىسىندا بىرنەشە اي بۇرىن استاناداعى قوعامدىق كولىكتەردە جولاقى تولەۋ جۇيەسى «Astra» كولىك كارتاسىمەن جۇزەگە اساتىن بولدى. وعان قوسىمشا SMS حابارلاما ارقىلى تولەم جاساۋ جۇيەسى دە ىسكە قوسىلدى. ال جاقىندا Halyk Bank ارقىلى QR-كودپەن تولەم جاساۋعا بولاتىن جۇيە جۇزەگە اسىرىلدى. ءبىز وسى تۇستا «Astana LRT» جشس ءباسپاسوز قىزمەتىنىڭ باسشىسى ­ناۋات ازانباەۆامەن بايلانىسقا شىعىپ، جاڭا باستامانىڭ قىر-سىرى تۋرالى مالىمەتتەرگە قانىق بولدىق.

– QR-كود جۇيەسىنىڭ ەنگىزىلگەنىنە بىرنەشە كۇن بولدى. قانداي وزگەرىستەر بار؟
– شىنى كەرەك، بۇل باستاما قىر­­كۇيەك ايىنان باستالدى. بىراق QR-كود استاناداعى قوعامدىق كولىكتىڭ بارىنە ىلىنبەگەندىكتەن، رەسمي تۇردە جاريالاعان جوقپىز. دەگەنمەن اۆتوبۋستاردىڭ 90 پايىزىندا ءىلىنىپ تۇرعانىن ايتا كەتكىم كەلەدى. بۇعان قوسا، 25 مىڭنان استام جولاۋشى جاڭا جۇيە ارقىلى جولاقى تولەپ ۇلگەردى. جالپى تولەم جۇيەسىنىڭ كەز كەلگەن ءتۇرىن ەلوردالىقتار جىلى قابىلداپ جاتىر. سەبەبى ءبىر عانا كولىك كارتاسىنىڭ ماڭايىندا شەشىلمەي جاتقان ماسەلەلەر جەتكىلىكتى. ماسەلەن، كارتاعا اۋدارىلعان اقشا دەر كەزىندە تۇسپەي، سونىڭ سالدارىنان قالا تۇرعىندارى اراسىندا تۇسىنىسپەۋشىلىكتەر تۋىنداپ جاتتى. ەندى، مىنە، Halyk Bank ارقىلى جاڭادان قوسىلعان QR-كودپەن تولەم جاساۋ سول كەدەرگىلەردىڭ الدىن الىپ جاتىر. ءبىر ايتا كەتەرلىگى، بانكتەر اراسىندا بۇل باستامانى ازىرگە Halyk Bank قانا قولعا الىپ وتىر.
– سوندا Halyk Bank ارقىلى QR-كودپەن تولەم جاساۋ قالاي جۇزەگە اسىرىلادى؟
– قازىر Halyk Bank پەن Qazkom بىرىگىپ كەتتى عوي. سوندىقتان قولىڭىزدا ەكى كارتانىڭ ءبىرى بولسا جەتكىلىكتى. ياعني جولاۋشى Homebank ءموبيلدى قوسىمشاسىن اشىپ، اۆتوبۋس سالونىنداعى QR-كود ءىلىنىپ تۇرعان تۇستى تابۋ كەرەك. اتالعان كودتى تەلەفونى ارقىلى سكانەرلەگەن سوڭ قوسىمشادا كورسەتىلگەن نۇسقاۋلىقتاردى ورىنداۋى قاجەت. ال تولەم راستالعان سوڭ ۇيالى تەلەفونعا ەلەكتروندى چەگى بار SMS-حابارلاما كەلەدى. سونان كەيىن ەلەكتروندى تۇبىرتەك جۇكتەپ الىنىپ، وعان تەلەفون ءنومىرى ەنگىزىلەدى. ال كىلت ءسوز رەتىندە Halyk Bank كارتاسىنىڭ سوڭعى ءتورت تسيفرىن پايدالانسا بولعانى. ەش قيىندىعى جوق. سول سياقتى Tele2 مەن Altel ابونەنتتەرى Halyk Bank كليەنتتەرى بولعان جاعدايدا، Homebank قوسىمشاسىن پايدالانا الادى.
– QR-كود ارقىلى تولەمگە قانداي دا ءبىر جەڭىلدىكتەر قاراستىرىلعان با؟
– جوق، جەڭىلدىك جاعى قاراس­تىرىلماعان. بىراق Halyk Bank-ءتىڭ باستاۋىمەن تولەم جۇيە­سىنىڭ ءتۇرى كوبەيىپ، تۇرعىندارعا ىڭعايلىلىق جاسالىپ وتىر. ەندى بۇرىنعىداي كولىك كارتاسىنا اقشا اۋدارۋ ءۇشىن ايالداماداعى اپپاراتتار الدىنداعى ۇزىن-سونار كەزەككە تۇرۋدىڭ قاجەتى جوق.
– جاڭا باستاما قانداي ءتا­جىريبەگە سۇيەنىپ ەنگىزىلدى؟
– بىرنارسەنى ايتايىن، ءبىز الىس-جاقىن شەتەلدەردەگى تاجىريبەگە سۇيەنگەن جوقپىز. تەك بىزدەگى ونلاين تولەم بىرەر جىل بۇرىن الماتى قالاسىندا جۇزەگە اسىرىلدى. بۇعان قوسىمشا، قىزىل­وردا قالاسىندا جولاقى «Oyby» ءموبيلدى قوسىمشاسى ارقىلى QR-كودپەن تولەنەدى. مىنە، ءبىز وسى ەكى قالاداعى تاجىريبەنى نەگىزگە الا وتىرىپ، بارىنشا ءتيىمدى جاقتارىن وزىمىزگە ەنگىزۋدى ءجون دەپ سانادىق.
– الداعى ۋاقىتتا تاعى قانداي تولەم جۇيەلەرى ىسكە قوسىلۋى مۇمكىن؟
– ازىرگە جوسپارىمىز – وسى. تەك جولاقىنى قولما-قول تولەگىسى كەلگەن جولاۋشى ەكى ەسە، ياعني 180 تەڭگەگە شىعىندالاتىنىن كەزەكتى رەت ەسكە سالايىن. جوعارىدا ايتىپ وتكەنىمدەي، QR-كودتى ازىرگە Halyk Bank قانا قولعا الىپ وتىر. بۇل باستاما الداعى ۋاقىتتا ەلىمىزدەگى وزگە دە بانكتەرگە ۇلگى بولىپ، يگى ءىستى ءارى قاراي جالعاستىرادى دەگەن ويدامىن.

پىكىر جازۋ

پوچتاڭىز جاريالانبايدى