عالىمعا قۇرمەت كورسەتتى

0 52

ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ايتۋلى عالىم، جۋرناليستيكا ماسەلەلەرىن زەرتتەۋ ينس­تيتۋتىنىڭ ديرەكتورى، UNESCO پروفەسسورى نامازالى وماشۇلىنىڭ جەتپىس جاسقا تولۋىنا ارنالعان «ەلىمىزدىڭ مەدياكەڭىستىگى: ىزدەنىستەر مەن جوبالار» اتتى حالىقارالىق عىلىمي-تاجىريبەلىك كونفەرەنتسيا بولىپ ءوتتى.

جاقسىلار باس قوسقان جيىن­دى اتالعان وقۋ ورنى­نىڭ رەكتورى ەرلان سىدىقوۆ اشىپ، جۇرگىزىپ وتىردى. الدىمەن مەرەيتوي يەسىن قۇتتىقتاۋعا كەلگەن ازاماتتار ءسوز الدى. مەملەكەتتىك حاتشى قىرىمبەك كوشەرباەۆتىڭ قۇتتىقتاۋ حاتىن پرەزيدەنتتىڭ كەڭەسشىسى، بەلگىلى عالىم، جۋرناليست باۋىرجان ومارۇلى تاپسىردى. سونداي-اق پرەزيدەنت اكىمشىلىگى باسشىسىنىڭ ءبىرىنشى ورىنباسارى ماۋلەن اشىمباەۆتىڭ قۇتتىقتاۋىن پرەزيدەنتتىڭ ءباسپاسوز حاتشىسى بەرىك ءۋالي، Nur Otan پارتياسى باسشىلىعىنىڭ قۇتتىقتاۋىن پارتيا حاتشىسى ارمان قىرىقباەۆ، پارلامەنت ءماجىلىسى توراعاسىنىڭ قۇتتىقتاۋ حاتىن ءماجىلىس دەپۋتاتى دارحان مىڭباي وقىپ بەردى. اقپارات جانە قوعامدىق دامۋ ءمينيسترى داۋرەن اباەۆ تا ارداقتى ازاماتقا ىزگى لەبىزىن ءبىلدىردى.
سونداي-اق تالانتتى اقىندار نەسىپبەك ايتۇلى مەن باۋىرجان جاقىپ عيبراتتى عالىمنىڭ تۇلعاسىن ولەڭمەن سومداپ، توگىلتىپ جىر وقىدى. نامازالى اعامىز ۇزاق جىلدار بويى الماتىداعى ءال-فارابي اتىنداعى قازاق ۇلتتىق ۋنيۆەرسيتەتىندە قىزمەت ىستەدى. سوندىقتان الاتاۋدىڭ ەتەگىندەگى اسەم شاھاردىڭ سالەمىن الىپ كەلگەن قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ دەكانى ساعاتبەك مەدەۋبەكوۆ ۇلاعاتتى ۇستازعا ءىلتيپاتىن كورسەتتى.
كونفەرەنتسيا بارىسىندا كورنەكتى اقىن ءجۇرسىن ەرمان «بىرەگەي (تۇلعاتانۋ ورايىندا)»، ج.بالاساعۇن اتىنداعى قىرعىز ۇلتتىق ۋنيۆەرسيتەتىنىڭ پروفەسسورى ابىعانى حاليلوۆ «قازاق جانە قىرعىز جۋرناليستيكا عىلىمىنىڭ جەتەكشىسى»، حالىقارالىق اقپاراتتىق-تەحنولوگيالار ۋنيۆەرسيتەتىنىڭ پروفەسسورى ايازبي بەيسەنقۇلوۆ «جۋرناليستيكا عىلىمىنىڭ مەكتەبى جانە ن.وماش­ۇلى ەڭبەگى»، فيلولوگيا عى­لىمدارىنىڭ دوكتورى، پروفەسسور تۇرسىن جۇرتباي «اقىلى مەن قايراتىن قاتار ۇستاپ»، پروفەسسور راحىمجان تۇرىسبەك «بەرىك ۇستانىم مەن تەرەڭ پاراسات» تاقىرىبىندا ارنايى بايانداما جاسادى. سونىمەن بىرگە مەرەيتوي يەسى جايلى «وتكىر ءسوزدىڭ الماس كەزدىگى» اتتى دەرەكتى فيلم كورسەتىلىپ، ءال-فارابي اتىنداعى قازاق ۇلتتىق ۋنيۆەرسيتەتى عىلىمي كەڭەسىنىڭ بەكىتۋىمەن «ونەگەلى ءومىر» سەرياسى اياسىندا جارىق كورگەن نامازالى وماشۇلى تۋرالى كىتاپتىڭ تانىستىرىلىمى بولدى.

پىكىر جازۋ

پوچتاڭىز جاريالانبايدى

16 + twenty =