«Еуропалық сапа» – елорда мектебінде!

0 119

Газетіміздің өткен нөмірінде Еуропа бизнес Ассамблеясының «Сократтар комитеті» елорданың №60 мектеп-лицейіне «Еуропалық сапа» марапатын тапсырып, ЕБА болжамы бойынша жетекші оқу орталықтарының ресми халықаралық тізбесіне енгізуге ұсыныс жасағанын жазған едік. Ал, кеше осы оқу ордасының директоры Эльмира Суханбер­диеваның өзіне жолығып, аз-кем әңгімелесудің сәті түсті.

– Біздің мектептің мұндай мақтаулы ма­ра­патқа бір-ақ күнде қол жет­кізе салмағаны белгілі. Же­тіс­ті­гі­мізді бағалаған жоғарғы шешім үміт­керлерді жан-жақты іріктеудің негізінде оқу ордасының ұсынылып отырған қызметтер саласындағы рейтінгісі мен саясатын ескере отырып қабылданған. Бұны 2012 жыл бойы атқарылған үлгілі жұмыс­та­рымыздың бірден-бір нәти­жесі дей аламын. Сон­дай-ақ, №60 мектеп-лицейінде оқыған бала­лардың дені алыс-жақын шетелдерде жоғары білім алып жатыр. Оқушыларымыз бір­неше жыл бойы халықаралық білім олимпиадаларына белсенді түрде қатысып, ерекше көзге түсуде. Алдағы «ЭКСПО-2017» халықаралық көрмесі де олардың зор қызығу­шы­лығын арттырып отыр, – дейді Эльмира Аман­гел­діқызы.

Ендігі ретте кейбір еуропалық ата-ананың өз балаларын халық­аралық деңгейде танымал­дылығы артқан елордалық ерекше мектепке оқуға жібергісі келетіні сөзсіз. Егер олар осындай ниетте болса, «Еу­ро­па­лық сапа» марапатын иеленген барлық оқу ордаларының ресми халықаралық тізімінен Астана қаласының №60 мектеп-лицейін оңай таба алады.

Сондықтан да мектеп директоры Эльмира Амангелдіқызы: «Бұл марапатты иеленген сәтте маған ең алдымен хабарласып, арнайы құттықтаған Астана қаласының әкімдігі мен ата-аналарға айтар ал­ғысым шексіз. Енді алдыңғы орынға шыққан мектебімізді осы биіктен түсіріп алмауға бар ынта-ықыласымызды сала кірісе бер­мекпіз. Біз үшін өткен жылдың өте табысты болғанына тоқтала кетсек, «Алтын белгіге» үміткер 11 оқушымыздың 9-ы өз білімдерін ақтап шықты, 10 оқушы мектепті үздік баға­мен тәмамдады және соның нәти­жесінде көбісі «Назарбаев уни­верситетіне» оқуға түсті. Басқа да шәкірттеріміздің «Еуропалық сапа» марапатына лайық деңгейде оқып, абырой-беделімізді жоғары ұстап тұруларын тілеймін!» деген ақжарма сөзін ағынан жарыла айтты.

Өйтпегенде ше?!. Арыстан кейпі бейнеленген сегіз жұлдызды дөңгелек медаль №60 мектеп-лицейге білім беру жүйесіндегі оң өзгерістер мен оқу үдерісін ұйымдастыру жағынан Еуропа ел­дері­нің оқу орындарындағы үлгілі мүмкіндіктерден кем соқпай­тындығын және мұғалімдер білік­тілігі мен кәсіби деңгейінің, ғылыми зерттеу жүргізу мен жаңа техно­логияларды әзірлеп, енгізудің ха­лықаралық бағдарламаларға то­лық сәйкес келетіндігін мойын­дағандықтан берілді ғой. Лондонда өткен Бизнес көшбасшылары саммиті аясында естелік атрибутика мен аталым брэндісін бел­сенді пайдалану құқығын иелену дегеніңіз – екінің біріне бұйыра бермес бақ! Құтты болсын!

Еркеғали БЕЙСЕНОВ

Пікір жазу

Почтаңыз жарияланбайды

2 × five =