ەرىكتى جاستاردىڭ كومەگى ەلورداعا كەرەك

0 115

جاستار

ەلوردادا ءجيى ۇيىمداستىرىلاتىن جاھاندىق شارالاردىڭ ابىرويلى وتۋىنە ەرىكتى جاستاردىڭ دا ەڭبەگى ۇلكەن ەكەنىن ەشكىم جوققا شىعارا المايدى. 2017 جىلى ەلىمىز ەكسپو حالىقارالىق كورمەسىن وتكىزگەلى وتىر. وسىعان بايلانىستى ەرىكتىلەر توبىن ىرىكتەيتىن «كوماندا-2017» جوباسى قولعا الىندى. ماسەلەنىڭ ءمان-جايىن وسى جۇمىستىڭ باسى-قاسىندا جۇرگەن «ەل قاناتى» قوعامدىق قورىنىڭ پرەزيدەنتى جاقىپ اسلامبەكتەن بىلگەن ەدىك.

– استانا قالاسى جاستار ءىسى جونىندەگى باسقارمانىڭ قولداۋىمەن قولعا الىنعان «كوماندا-2017» جوبا­سى­نىڭ مىندەت-ماقساتى جونىندە ايتىپ بەرسەڭىز؟

– استانا – مەملەكەتتىك ماڭىزدى شارالار وتەتىن ەلىمىزدىڭ باستى شاھارى. سون­دىق­تان، ەلوردا ەرىكتى جاستار­دىڭ كومەگىنە كوبىرەك مۇقتاج دەپ ويلايمىن. جاڭادان قولعا الىنىپ وتىرعان «كوماندا-2017» جوباسى ءىرى شارالار مەن مەرەكەلەردى وتكىزۋگە ەرىكتى تۇردە كومەككە كەلەتىن جاس­تار­دىڭ باسىن قوسادى. ءبىز ولاردىڭ قابىلەتىن ءارى قاراي ۇشتاپ، ءۇل­كەن شارالار كەزىندە اداممەن ءتىل تابىسا بىلۋگە، قاجەت كەزىندە دۇرىس شەشىم قابىلداي بىلۋگە باۋليتىن بولامىز. وسىعان باي­لا­نىستى كوماندانىڭ بارلىق مۇشە­لە­رىمەن ارنايى ترە­نينگ­تەر،­ سەمينارلار وتكى­زەمىز. وسىلايشا، ەكسپو كەزىن­دە قوناق­تار­دى قارسى الۋ، ولارعا ءجون سىلتەۋ سىندى ۇيىم­­داس­­تىرۋ جۇمىستارىنا قابى­­لەتتى جاستاردى دايىنداپ شىعار­ماقپىز.

– سوندا «كوماندا-2017» توبىنا قابىل­داناتىن جاس­تار­دىڭ بويى­نان قانداي قاسيەت­تى كورگىلەرىڭىز كەلەدى؟

– ەڭ باستىسى، كومانداعا مۇشە بولعىسى كەلگەن ادام ەلىنە پايدالى بولۋدى ءبىرىنشى پارىزى ساناۋى كەرەك. سودان كەيىن قاتىسۋشىلاردىڭ اشىقتىعىنا، اداممەن اڭگى­مە­لەسە الۋ قابىلەتىنە، تىلدەردى قانشالىقتى مەڭگەر­گە­نىنە باستى نازار اۋدارامىز. ءبىزدىڭ جۇرتشىلىققا كورسەتەتىن كومە­گىمىز تەگىن بولعاندىقتان، ەرىكتىلەر ادامي قاسيەتى جوعارى ازامات بولۋى ءتيىس. مۇنداي باستاما جاستاردىڭ ءارى قاراي تۇلعا رەتىندە دامۋىنا، كاسىبي ازامات رەتىندە قالىپتاسۋىنا سەپتىگىن تيگىزەدى دەپ ويلايمىز.

– تۇسىنگەنىم، بۇل جوباعا قاتىسۋعا كەز كەلگەن جاس ءوتى­نىش بىلدىرە الادى عوي?

– ارينە. ءبىز كوشباسشىلىققا ۇمتىلعان جاستاردى عانا ەمەس، قاراپايىم زامانداستارىمىزدى دا ورتامىزعا تارتقىمىز كەلەدى. جاستار الدىمەن وزدەرى وقيتىن ءبىلىم وردالارىنداعى جاستار ءىسى جونىندەگى كوميتەتكە حابارلاسىپ، سولاردىڭ ىرىكتەۋىنەن ءوتۋى قاجەت.

– ەندى العاشقى اسار­لا­رىڭىزدى نەدەن باستاعالى وتىرسىزدار؟

– ءبىز العاشقى كومەگىمىزدى وتان ءۇشىن وت كەشكەن اتا-اجە­لەرىمىزگە كورسەتپەكپىز. 9-مامىر – جەڭىس كۇنى قارساڭىندا «كوماندا-2017» توبى قارت­تار­دىڭ اۋلاسىن، ءۇيىن تازالاپ، قولعابىس جاسايتىن بولادى. سونداي-اق، مەيرامعا وراي گەورگي لەنتاسىن تابىستاۋعا ارنالعان اكتسياعا دا بەلسەندى اتسالىساتىن بولامىز.

 

قىمبات توقتامۇرات

 

پىكىر جازۋ

پوچتاڭىز جاريالانبايدى

18 − 2 =