EÑBEKPEN ERTE ESEYDİK

0 174

Ulı Jeñisti jaqındatqan ardagerlerdiñ erligi, önegege tolı ömiri arada qanşa jıl ötse de, urpaqtan-urpaqqa ülgi retinde aytıla beredi. Öytkeni, Jeñis merekesi – jer basıp jürgen barşa adamzat balası üşin ülken toy.

1941-45 jıldarı Ulı Otan soğısı kezinde jawdı jeñwge tek maydan dalasındağı keskilesken şayqastar men «elim» dep eñiregen erlerdiñ eren erlikteri ğana emes, sonımen qatar tıldağı eñbektiñ dübiri de öz äserin tïgizdi.

Biz ol kezde etek-jeñin jïıp ülgermegen jas bala edik. Soğan qaramastan, maydandı azıq-tülikpen, kïim-keşekpen qamtamasız etw üşin kündiz-tüni ayanbay eñbek ettik. Apamız şölke toqısa, jibin äperip, kïim tikse, ïnesin sabaqtap, qolımızdan kelgeninşe qolğabıs ettik. Qırmanğa şığıp, belimiz bügilgenşe jumıs istegen sätterimiz de az bolğan joq. Aş-jalañaş jürgen kezderimizde keyimedik, «tek jawdı jeñsek, beybitşilikke qol jetkizsek eken» dep armandadıq.

«Barlığı – maydan üşin, barlığı – Jeñis üşin», «Tılda da soğıstağıday!», «Öziñ üşin ğana emes, maydanğa attanğan joldasıñ üşin!» degen uranğa qosılıp, örimdey bolsaq ta, özimiz quralıptas er balalardan bir eli qalıspay eñbek etip, tek äkelerimiz ben ağalarımızdıñ soğıstan jeñispen oralwın ğana oyladıq. Söz joq, tıldağı qız- kelinşekterdiñ osınday rwhı men Otanğa degen süyispenşiligi jeñistiñ jaqınday tüswine ıqpal etti.

Qudayğa şükir, büginde el aman, jurt tınış. Keşegi qïındıqtardıñ bäri artta qalıp, beybit zamanda, bereke-birlikte ömir sürip jatqanımızğa mıñ märte täwbe etemiz.

Qazirgi tañda halıqtıñ äl-awqatın arttırw bağıtında jıl sayın jaña mindetter belgilenip, Memleket basşısınıñ tikeley qamqorlığı arqasında qazaqstandıqtardıñ jağdayı jaqsarıp keledi. Astanamız kün sayın körkeyip, külli älemge tanıldı. Endigi tilegim, qazaq elinde erlik pen eñbektiñ, tatwlıq pen dostıqtıñ twı mäñgilik jelbirey berse eken!

Er azamattarmen birge qanattasıp, qayrat körsetken apalarımızdıñ eren erligi, eñbegi eşwaqıtta umıtılmaq emes. Maydan dalasında qaza tapqan, tılda eren eñbek ülgisin körsetken jerlesterimizdiñ esimi ğasırdan ğasırğa mäñgi jasay bermek.

Şepï ÄLİMOVA,
tıl eñbekkeri,«Kümis alqa» ïegeri

Pikir jazw

Poçtañız jarïyalanbaydı

1 × 5 =