ەڭبەكپەن ەرتە ەسەيدىك

0 175

ۇلى جەڭiستi جاقىنداتقان ارداگەرلەردىڭ ەرلiگi, ونەگەگە تولى ءومiرi ارادا قانشا جىل وتسە دە، ۇرپاقتان-ۇرپاققا ۇلگi رەتiندە ايتىلا بەرەدi. ويتكەنى، جەڭiس مەرەكەسi – جەر باسىپ جۇرگەن بارشا ادامزات بالاسى ءۇشىن ۇلكەن توي.

1941-45 جىلدارى ۇلى وتان سوعىسى كەزىندە جاۋدى جەڭۋگە تەك مايدان دالاسىنداعى كەسكىلەسكەن شايقاستار مەن «ەلىم» دەپ ەڭىرەگەن ەرلەردىڭ ەرەن ەرلىكتەرى عانا ەمەس، سونىمەن قاتار تىلداعى ەڭبەكتىڭ ءدۇبىرى دە ءوز اسەرىن تيگىزدى.

ءبىز ول كەزدە ەتەك-جەڭىن جيىپ ۇلگەرمەگەن جاس بالا ەدىك. سوعان قاراماستان، مايداندى ازىق-تۇلىكپەن، كيىم-كەشەكپەن قامتاماسىز ەتۋ ءۇشىن كۇندىز-ءتۇنى ايانباي ەڭبەك ەتتىك. اپامىز شولكە توقىسا، ءجىبىن اپەرىپ، كيىم تىكسە، ينەسىن ساباقتاپ، قولىمىزدان كەلگەنىنشە قولعابىس ەتتىك. قىرمانعا شىعىپ، بەلىمىز بۇگىلگەنشە جۇمىس ىستەگەن ساتتەرىمىز دە از بولعان جوق. اش-جالاڭاش جۇرگەن كەزدەرىمىزدە كەيىمەدىك، «تەك جاۋدى جەڭسەك، بەيبىتشىلىككە قول جەتكىزسەك ەكەن» دەپ ارماندادىق.

«بارلىعى – مايدان ءۇشىن، بارلىعى – جەڭىس ءۇشىن»، «تىلدا دا سوعىستاعىداي!»، «ءوزىڭ ءۇشىن عانا ەمەس، مايدانعا اتتانعان جولداسىڭ ءۇشىن!» دەگەن ۇرانعا قوسىلىپ، ورىمدەي بولساق تا، ءوزىمىز قۇرالىپتاس ەر بالالاردان ءبىر ەلى قالىسپاي ەڭبەك ەتىپ، تەك اكەلەرىمىز بەن اعالارىمىزدىڭ سوعىستان جەڭىسپەن ورالۋىن عانا ويلادىق. ءسوز جوق، تىلداعى قىز- كەلىنشەكتەردىڭ وسىنداي رۋحى مەن وتانعا دەگەن سۇيىسپەنشىلىگى جەڭىستىڭ جاقىنداي تۇسۋىنە ىقپال ەتتى.

قۇدايعا شۇكىر، بۇگىندە ەل امان، جۇرت تىنىش. كەشەگى قيىندىقتاردىڭ ءبارى ارتتا قالىپ، بەيبىت زاماندا، بەرەكە-بىرلىكتە ءومىر ءسۇرىپ جاتقانىمىزعا مىڭ مارتە تاۋبە ەتەمىز.

قازىرگى تاڭدا حالىقتىڭ ءال-اۋقاتىن ارتتىرۋ باعىتىندا جىل سايىن جاڭا مىندەتتەر بەلگىلەنىپ، مەملەكەت باسشىسىنىڭ تىكەلەي قامقورلىعى ارقاسىندا قازاقستاندىقتاردىڭ جاعدايى جاقسارىپ كەلەدى. استانامىز كۇن سايىن كوركەيىپ، كۇللى الەمگە تانىلدى. ەندiگi تiلەگىم، قازاق ەلiندە ەرلiك پەن ەڭبەكتiڭ، تاتۋلىق پەن دوستىقتىڭ تۋى ماڭگiلiك جەلبiرەي بەرسە ەكەن!

ەر ازاماتتارمەن بiرگە قاناتتاسىپ، قايرات كورسەتكەن اپالارىمىزدىڭ ەرەن ەرلiگi, ەڭبەگi ەشۋاقىتتا ۇمىتىلماق ەمەس. مايدان دالاسىندا قازا تاپقان، تىلدا ەرەن ەڭبەك ۇلگىسىن كورسەتكەن جەرلەستەرىمىزدىڭ ەسىمى عاسىردان عاسىرعا ماڭگى جاساي بەرمەك.

شەپي ءالىموۆا،
تىل ەڭبەككەرى،«كۇمىس القا» يەگەرى

پىكىر جازۋ

پوچتاڭىز جاريالانبايدى

2 × 3 =