ЕҢ БАСТЫСЫ – ЕЛ БІРЛІГІ

Орталық коммуникациялар қызметінде Қазақстан халқы ассамблеясы Төрағасының орынбасары, Хатшылық меңгерушісі Ералы Тоғжановтың, Ассамблея Төрағасының орынбасары, ҚР Парламент Сенатының депутаты Анатолий Башмаковтың, Мәжіліс депутаты, Ассамблея кеңесінің мүшесі Надежда Нестерованың қатысуымен брифинг өтті.

«Өздеріңіз куә болғандай, «Қазақстан-2050: бейбітшілік, руханият және келісім мәде­ниеті» атты тақырыппен Қазақ­стан халқы ассамблеясының XXI сессиясы өтті.
Онда «Бүгінде біздің бірлігіміз – жаңа 2050 Стратегиясын жү­зеге асырудың шешуші факторы» деп баса айтқан Елбасы қоғамдағы келісім мен бірлікті дамытудың басты бағыттары мен қағидаттарын айқындап берді.

Оның ішіндегі ең негіз­гісі, этностық, тілдік, діни және әлеу­меттік айырмашы­лығына қара­мастан, бүкіл қазақ­стан­дық­тардың тең құқылығы. Олар экономикамыздың дамуы, ха­лықтың әл-ауқатының жақсаруы үшін ортақ жауапкершілік пен түрлі этнос мүшелерінің индус­трияландыруға, шағын және ор­та бизнесті дамытуға, ғылымға, білім беруге, денсаулық сақтауға, спортқа бір кісідей атсалысатыны айтылды.

Келесі бір маңызды бағыты деп, мемлекеттік тілдің рөлі, орыс тілінің ресми мәртебесін айшықтады. Конфессияаралық тағаттылық мәселелері басым­дық берілген бағыттардың бірі болып табылады.

«Ассамблея – бүкіл азамат­тардың бүкілхалықтық өкілдері мүдделерінің инновациялық моделі және біздің жас демокра­тияның табысты құралы» деп Елбасы оның ел бірлігін дамы­тудағы орны жайындағы ойын шегелеп айтып берді. Сонымен қатар, сессия жұмысында орталық органдар мен жергілікті жерлердегі ұлтаралық қарым-қатынас саласындағы қызметін жүйелендіру мәселесі айтылды. Тағы бір атап өтерлігі – келесі жыл – «Қазақстан халқы ассамблеясы жылы» деп аталып, ҚХА 20 жылдық мерейтойын қарсаңында өтетін айтулы шаралар алдағы уақыта да жалғасын табатынындығы. Бұл – мәні мен маңызы жағынан алғанда үлкен жаңалық. Ел бірлігінен асқан ешқандай құндылық жоқ. Бір­лігі бар елдің экономикалық, әлеу­меттік мәселелері шешіледі» деді Ералы Тоғжанов.

ҚР Парламент Сенатының депутаты Анатолий Башмаков Ассамблея төрағасының орынбасары ретінде жоспарланған жұмыстармен таныстырып өтті.

Айгүл УАЙСОВА