ەندوسكوپيانىڭ بولاشاعى زور

0 203

الەمدىك كوروناۆيرۋستىق پاندەميا مەديتسينا سالاسىنىڭ قانشالىقتى ماڭىزدى ەكەنىن كورسەتتى. ادامنىڭ باقىتتى، ۋايىمسىز ءومىر ءسۇرۋىنىڭ بىردەن-ءبىر كەپىلى – دەنساۋلىقتىڭ قانشالىقتى قاجەت ەكەنىن بىزگە تاعى ءبىر مارتە ۇقتىرعانداي بولدى.

گۋلميرا_1

جاقىندا نۇر-سۇلتان قالاسىنداعى قازاقستان رەسپۋبليكاسى پرەزيدەنتىنىڭ ءىس باسقارماسى مەديتسينالىق ورتالىعى اۋرۋحاناسى سھەسك-up بولىمشەسى ەندوسكوپيالىق كابينەتكە بارعان بولاتىنبىز. بۇل بولىمشەنى تاڭداۋىمىز دا بەكەر ەمەس. ەكولوگيا، دۇرىس تاماقتانباۋ، زياندى ادەتتەر جانە تاعى باسقا فاكتورلاردان اسقازان جانە اس قورىتۋ جۇيەسىنىڭ اۋرۋلارى اسقىنۋدا. ال ادام يممۋندىق جۇيەسىنىڭ 70 پايىزى ءدال وسى اس قورىتۋ، ىشەك جولدارىنىڭ دۇرىس قىزمەت اتقارۋىندا ەكەنىن ەسكەرسەك، مەديتسيناداعى اتالمىش سالانىڭ ءدال قازىر اسا ماڭىزدى ەكەنىن اتاپ وتكىمىز كەلەدى. ەندوسكوپيالىق تەكسەرىس جوعارى اتالعان اۋرۋلاردى ەمدەۋدە جانە اسا قاۋىپتى كەلەتىن اسقازان جانە توق ىشەك قاتەرلى ىسىگىنىڭ الدىن الۋدا كەلتىرەتىن پايداسى مول. بولىمشەدە ءبىزدى جوعارى ساناتتى ەندوسكوپيست دارىگەر گۇلميرا قۇلىبەكوۆا قارسى الدى. گۇلميرا ەركەبايقىزى ءسال كۇتە تۇرۋمىزدى سۇرادى. ويتكەنى ءدال وسى كەزدە ءبىر ناۋقاس جالپى ناركوز ارقىلى تەكسەرىستەن ءوتىپ بولىپ، ەندى ويانعان ءساتى ەكەن.

– بۇل – ەندوسكوپيا بولىمشەسىندەگى جاڭا ءادىس. كەي پاتسيەنتتەر تەكسەرىس الدىندا قورقىنىش سەزىمىن سەزەدى. سوندىقتان، انەستەزيولوگ دارىگەردىڭ قاتىسۋىمەن ناۋقاستى ناركوزبەن ۇيىقتاتۋ ارقىلى ەندوسكوپيالىق تەكسەرىستەن وتكىزەمىز. بۇگىن تۇسكە دەيىن بىرنەشە ادامدى تەكسەرىستەن وتكىزدىك. سولاردىڭ قاتارىندا كەي ازاماتتار وسى ءادىستى تاڭدادى،– دەيدى گۇلميرا ەركەبايقىزى.

دارىگەردىڭ ايتۋىنشا، ەندوسكوپيالىق تەكسەرىستەن قورقۋدىڭ ەش قاجەتى جوق. دامىعان ەلدەردە بۇل ءادىس كەڭ قولدانىسقا يە. اسىرەسە، قاتەرلى ىسىك اۋرۋلارىن الدىن الۋدا ءىش قۇرىلىستى ۋاقىتىلى تەكسەرىستەن وتكىزىپ تۇرعانى ءجون. ناتيجەسىندە ادام ءوز دەنساۋلىعى تۋرالى ناقتى دەرەكتەر الىپ، دەنى ساۋ ءومىر سۇرۋگە مۇمكىندىك الادى.

– ءبىزدىڭ دارىگەر رەتىندەگى مىندەتىمىز – ناۋقاستارعا ەندوسكوپيالىق تەكسەرىستىڭ پايداسىن ءتۇسىندىرۋ. كوپ ادامدار بۇل تەكسەرىس تۇرىنەن ۇرەيلەنەدى. ءبىز ناقتى عىلىمي دەرەكتەرگە سۇيەنە وتىرىپ، تەكسەرىس ناۋقاستىڭ دەنساۋلىعىنا پايدالى ەكەنىن تۇسىندىرەمىز. ايتىپ ءوتۋ كەرەك، ءبىزدىڭ سھەسك-up بولىمشەمىز – قر پرەزيدەنتىنىڭ ءىس باسقارماسى مەديتسينالىق ورتالىعى اۋرۋحاناسىنىڭ ەمحانالىق قىزمەتىنىڭ قۇرامداس بولىكتەرىنىڭ ءبىرى. مۇندا تىركەلگەن كونتينگەنتتى كەشەندى پروفيلاكتيكالىق تەكسەرۋ جانە اقىلى نەگىزدە پاتسيەنتتەرگە سھەسك-up باعدارلاماسى بويىنشا ورگانيزمنىڭ كەشەندى دياگنوستيكاسى جۇرگىزىلەدى. بولىمشەدە دارىگەرگە دەيىنگى كابينەتتەر، تەراپەۆت، ستوماتولوگ، حيرۋرگ، گينەكولوگ، وفتالمولوگ، ۋرولوگ كابينەتتەرى، قان الۋ كابينەتى، ەكگ كابينەتى، ۋدز دياگنوستيكا كابينەتى جانە ءبىزدىڭ ويانۋ پالاتاسى كىرەتىن ەندوسكوپيالىق كابينەت بار. زاماناۋي دياگنوستيكالىق جابدىقتارمەن جابدىقتالعان. ەندوسكوپيالىق جابدىقتاردىڭ بارلىعى جوعارى ساپالى جاپوندىق «OLYMPUS» فيرماسىنا تيەسىلى. ءبىزدىڭ ەمحانادا عانا ەلىمىزدەگى  جالعىز جابدىق ەحوسونوگرافيا اپپاراتى بار. ونى مەڭگەرۋ ءۇشىن دارىگەرلەرىمىز شەتەلدە ارنايى وقۋدان وتكەن. سوندىقتان، ءوزىنىڭ اس قورىتۋ جۇيەسىن تەكسەرەمىن دەگەن پاتسيەنتتەر ءۇشىن كەڭ كولەمدى قىزمەت كورسەتۋ تۇرلەرى ۇسىنىلعان. ءتىپتى، كوروناۆيرۋس پاندەمياسى ۋاقىتىندا ادامداردىڭ دەمالۋ ورگاندارىن تەكسەرۋگە ارنالعان برونحوسكوپيا ياعني برونحتاردى تەكسەرۋگە ارنالعان پروتسەدۋرالاردى وتكىزەمىز، – دەيدى دارىگەر.

شەتەلدە وقۋ دەمەكشى، جوعارى ساناتتاعى ەندوسكوپيست دارىگەر گۇلميرا قۇلىبەكوۆا – رەسەي، ليتۆا جانە باسقا دا شەت ەلدەردەن وقۋدان ءوتىپ، ءوز ماماندىعى بويىنشا ۇلكەن تاجىريبە جيناعان مەديتسينا عىلىمدارىنىڭ كانديداتى. الماتى مەديتسينالىق ۋنيۆەرسيتەتىن اياقتاعان، الماتى دارىگەرلەر ءبىلىمىن جەتىلدىرۋ ينستيتۋتىندا پروفەسسور ءسابيحان شىناربەكۇلى  بايجانوۆتان ءتالىم العان. اتالمىش كافەدرادا ءوز ماماندىعى بويىنشا ۇستازدىق ەتكەن. مەديتسينا سالاسىنداعى تاجىريبەسى 25 جىلدان اسىپ جىعىلادى. سونىڭ 20 جىلىن جوعارىدا اتالعان ەندوسكوپيا سالاسىندا حالىققا قالتقىسىز قىزمەت اتقارىپ كەلەدى. ەندوسكوپيا بويىنشا بىرقاتار عىلىمي ماقالالاردىڭ اۆتورى. «ۇلى دارىگەر ادامنىڭ تانىمەن قاتار، جانىن دا ەمدەيتىن دارىگەر» دەيدى حالىق دانالىعى. گۇلميرا ەركەبايقىزىمەن اڭگىمەلەسۋ بارىسىندا ەسكى ءداستۇر مەن جاڭا تەحنولوگيانى ۇشتاستىرا بىلگەن ەلوردانىڭ زاماناۋي دارىگەرلەرىنە تيەسىلى سيپاتتى بايقادىق. سۋىق تسيفرلار مەن قاتىپ قالعان ستاتيستيكانى ەمەس، نۇرلى ديدارىنان دارىگەرگە ءتان جىلۋلىق، ەرتەڭگى كۇنگە دەگەن سەنىمدىلىك جانە ناۋقاستارعا دەگەن شىنايى جاناشىرلىق سەزىمىن بايقادىق. بۇل – قاۋىپتى ىندەت پاندەمياسى ورشىگەن، مەديتسينا سالاسىنا تۇسكەن جاۋاپكەرشىلىك جۇگىنىڭ قىسىمى كەزىندە اق حالاتتىلارعا قاجەت قاسيەت. بالكىم، بۇل ونىڭ ومىرلىك ۇستانىمىنا بايلانىستى شىعار. گۇلميرا ەركەبايقىزى – قىزمەتىندە قۇرمەتكە يە مامان، وتباسىندا ادال جار، اياۋلى انا. ومىرلىك سەرىگى ەرجان سۇلتاناليەۆ تە – اسكەري مەديتسينا سالاسىنىڭ مايتالمانى. اق حالاتتىلار وتباسى ابىلاي، ءىنجۋ، ءال-حاميت ەسىمدى ءۇش بالا تاربيەلەپ ءوسىردى. نەمەرەلەرى ءوسىپ كەلەدى.

كەيىپكەرىمىز اجە اتانعانىمەن، بەلسەندى ومىرلىك ۇستانىمىندا جاستارعا ۇلگى بولادى. جىل سايىنعى استانا مارافونىنا قاتىسادى. اۋا رايى قولايلى كەزىندە ەلوردانىڭ سول جاعالاۋىنداعى جۇمىسىنا ۆەلوسيپەدپەن بارادى. ۇجىمنىڭ قوعامدىق ومىرىنە بەلسەنە قاتىسادى. ەڭ باستىسى، ءوز ماماندىعىن شىنايى جاقسى كورەدى. قىزمەتىنە اۋىر جۇمىس تۇرعىسىنان ەمەس، ومىرلىك ميسسياسى جانە سۇيىكتى ءىسى رەتىندە قارايدى.

دارىن سەيىتوۆ،

قازاقستان جۋرناليستەر

 وداعىنىڭ مۇشەسى

 

پىكىر جازۋ

پوچتاڭىز جاريالانبايدى

4 − three =