ەلوردانىڭ ەڭسەلى جوبالارى

0 117

مەملەكەت باسشىسى نۇرسۇلتان نازارباەۆتىڭ ايقىنداپ بەرگەن ۇلت جوسپارىن ورىنداۋعا باعىتتالعان «100 ناقتى قادامنىڭ» بىرىندە ەلىمىزدەگى وندىرىسكە يننوۆاتسيالار ەنگىزۋ جونىندە ايتىلعان. جاقىندا استانالىق ءماسليحاتتىڭ دەپۋتاتتارى «استانا – جاڭا قالا» ارنايى ەكونوميكالىق ايماعىندا ورنالاسقان وندىرىستىك ورىنداردى ارالاپ كوردى. ەلوردالىق دەپۋتاتتاردىڭ كوشپەلى توبى وسى ايماقتاعى جاڭا كاسىپورىنداردىڭ جۇمىسىمەن تانىستى. 

ERM_6933

الدىمەن دەپۋتاتتار «كازاحستان پاراماۋنت ينجينيرينگ» جشس-ءنىڭ بروندى دوڭگەلەكتى ماشينالاردى قۇراستىراتىن زاۋىتىنا ات باسىن تىرەدى. زاۋىت وتكەن جىلدىڭ سوڭىندا «كازاحستان ينجينيرينگ» ۇلتتىق حولدينگى جانە «Paramaunt Group» وڭتۇستىك افريكالىق كومپانيامەن بىرلەسىپ اشىلعان. ءوندىرىس جۇمىسىمەن تانىسقان دەپۋتتارعا زاۋىتتىڭ دايىن ءونىمى كورسەتىلدى. كورسە­تىلگەن ماشينالاردا 4 قورعانىس كلاسى بار، بۇل تەحنيكانىڭ باستى ماقساتى – جەكە قۇرامدى قورعاۋ. ماسەلەن، ءبىر ماشينانىڭ سالماعى شامامەن 13 توننا قۇرايدى. ساعاتىنا 100-120 كيلومەتر جۇرەدى.
– بروندى ماشينالار MRAP تەحنولوگياسى بويىنشا جاسالادى. ول مينالاردىڭ جارىلۋى مەن توسقاۋىلداعى شابۋىلداردان قورعايدى. ءبىزدىڭ ماشي­نالاردىڭ ءتۇبى V-بەينەلى، بۇل تەحنولوگيا وتكەن عاسىردىڭ 90-جىلداردىڭ باسىندا ويلاپ تابىلدى، – دەيدى «كازاحستان پاراماۋنت ينجينيرينگ» جشس-ءنىڭ باس ديرەكتورىنىڭ ورىنباسارى كوبەي جاڭبىرشى.
زاۋىتتىڭ وندىرىستىك قۋاتى جىلىنا 120 ماشينا جاساۋعا جوبالانعان. الايدا، قاجەت بولعان نەمەسە تاپسىرىس كۇشەيسە، 200-300 ماشيناعا دەيىن وندىرە الادى. وندا شامامەن 130 ادام ەڭبەك ەتەدى. قىزمەتكەرلەردىڭ ورتاشا ەڭبەكاقىسى 200 مىڭ تەڭگەنى قۇرايدى.
ودان كەيىن ءماسليحات دەپۋتاتتارى ەلىمىزدەگى اۋقىمدى «ا» كلاستى كولىكتىك-لوگيستيكالىق ورتالىققا باردى. كاسىپورىن 2014 جىلى قۇرىلعان. اۋماعى 49 گەكتاردى قۇرايتىن عيمارات قۇرعاق، كليماتتىق قويمالاردان، ديستريبيۋتورلىق ورتالىقتان، كونتەينەرلىك الاڭقايدان تۇرادى. سونداي-اق، بۇل جەردە تاۋاردى ۇزاق ۋاقىت ساقتاۋعا مۇمكىندىگى مول ارنايى كامەرالار ورنالاسقان.
– ءبىزدىڭ اۋماقتا بارلىق جاعداي جاسالعان. بۇل جەردە تاۋار ءوندىرۋشى جۇكتى جونەلتە الادى، ستانتسياعا، كەدەنگە بارۋدىڭ ەش قاجەتى جوق، اۋماقتا كەدەندىك بەكەت، فيتوسانيتارلار، كارانتين قىزمەتى ورنالاسقان. لوگيستيكالىق قىزمەت ءتۇرى بار. سونداي-اق، «كەنمارت» ديستريبيۋتورلىق ورتالىق جۇمىس ىستەيدى. ياعني، تاۋار وسىندا كەلەدى، كەدەندىك جۇمىس جۇرگىزىلەدى، ونى ساقتاۋعا، ساتۋعا جانە ەكسپورتقا شىعارۋعا دا بولادى، – دەپ ءتۇسىندىردى كومپانييا وكىلى ەۆگەني كيرشين.
وسى جەردە دەپۋتاتتار «استانا – كەدەندىك راسىمدەۋ ورتالىعى» كەدەندىك بەكەتىنىڭ دە جۇمىسىمەن تانىستى.
– ءبىز ءبىر تەرەزە قاعيداتى بويىنشا جۇمىس ىستەيمىز. مۇندا كەدەندىك قىزمەتپەن بايلانىستى بارلىق مەم­لەكەتتىك ورگانداردىڭ وكىلدەرى بار. ءبىز ماشينا كەلىپ توقتاعان ۋاقىتتا بارىنە ۇلگەرۋگە تىرىسامىز جانە ولار ءۇش ساعات ىشىندە بىزدەن تولىق كەدەندىك قۇجاتتامامەن شىعۋى كەرەك، – دەيدى بەكەت باسشىسى ەرلان كانافين.
تالقىلاۋ بارىسىندا دەپۋتاتتار قىزمەتكەرلەرگە قاجەتتى ەڭبەك شارتتارىن جاساۋعا باسا نازار اۋداردى.
شارا سوڭىندا ءماسليحات دەپۋتاتتارى «استانالىق شىنىپاكەت كومپانياسىنا» باردى.
كاسىپورىن وزگە وندىرىستەرگە قاراعاندا يندۋستريالدىق اۋماقتان تىس جەردە ورنالاسقان. دەپۋتاتتار الدىمەن كوم­پانيانىڭ جىلىتۋ جۇيەسىنە نازار اۋداردى. عيمارات پانەل ءوندىرىسى ەسەبىنەن جىلىتىلادى. كاسىپورىن 2006 جىلى اشىلعان. بۇگىندە وندا 136 ادام ەڭبەك ەتەدى. كومپانيا ءوز ونىمدەرىنە بەس جىل مەرزىمگە دەيىن كەپىلدىك بەرەدى.
دەپۋتاتتار وندىرىستىك تسەحتاردىڭ جۇمىسىمەن جاقىن تانىستى. كومپانيا ماماندارى وزدەرىنىڭ وزەكتى ماسەلەلەرىن دە جاسىرمادى. اسىرەسە، كوممۋنيكاتسيا مەن ينفراقۇرىلىمدى دامىتۋ قيىندىق تۋعىزىپ وتىرعان كورىنەدى. ماسەلەن، يندۋستريالدىق ايماقتا ورنالاسقان وزگە كاسىپورىندار سەكىلدى مەملەكەتتىك جەڭىلدىكتەردىڭ بولماۋى دا الاڭداتادى ەكەن.

ازامات ەسەنجول

پىكىر جازۋ

پوچتاڭىز جاريالانبايدى

seven + 20 =