ەلوردانىڭ ايناسى

0 108

«Astana aqshamy» جانە «ۆەچەرنيايا استانا» گازەتتەرى وتىز جىلدىق بەلەسىن باعىندىردى. بۇل ءبىر قاراعاندا قاس-قاعىم ءسات سەكىلدى! الايدا تاريح تارازىسىنا سالساق، وتىز جىلدا ەكى باسىلىمدا ءتور قالانىڭ جىلناماسى جازىلدى. سوناۋ كسرو زامانىنان بەرى شىعا باستاعان باسىلىم باس قالانىڭ ايناسىنا اينالدى. باس شاھار بولعانعا دەيىنگى، ەلورداعا اينالعاننان كەيىنگى تاريح 30 جىلدىق جىلنامادا تاسقا باسىلدى. بۇرىنعى استانانىڭ، بۇگىنگى نۇر-سۇلتاننىڭ تاريحى – تاۋەلسىز قازاقستاننىڭ تاريحى. كۇن سايىن كوركەيگەن جاس ەلوردامىزدىڭ كەشەگىسى مەن بۇگىنىن بىلگىسى كەلگەن وقىرمان وسى ەكى گازەتتىڭ بەتتەرىنەن وقي الادى.

وتىز جىلدىق مەرەيتويدىڭ قارساڭىندا جۋرناليستەر گازەتتىڭ سارعايعان پاراقتارىن اشىپ، ءار جىلدارى جازىلعان دۇنيەلەرگە (ماقالا، سۇحبات، رەپورتاج، سۋرەتتەمە، وچەرك، كوسەمسوز جانە ت.ب.) ءبىر مارتە كوز جۇگىرتتى. گازەتتەردىڭ ءاربىر نومىرىندە قوعامداعى ەڭ كوكەيتەستى، كۇردەلى، وتكىر ماسەلەلەر كوتەرىلىپ، وقىرمانداردىڭ كوڭىلىنەن شىعىپ وتىرعان. سوناۋ 90-شى جىلداردان تاۋەلسىزدىگىمىز نىعايا تۇسكەن بۇگىنگى كۇنگە دەيىن باس قالادا وتكەن نەبىر ايشىقتى، ماڭىزدى وقيعالارعا كۋا بولىپ، سولاردىڭ بارلىعىن پاتشا كوڭىلدى وقىرمانعا دەر كەزىندە جەتكىزىپ وتىرىپپىز. بۇل – ۇلكەن جەتىستىك، ەرەن ەڭبەك! دەمەك قوس باسىلىم – ەلوردانىڭ ايناسى دەۋگە بولادى.
ماسەلەن، 30 جىلدا «Astana aqshamy»-نىڭ اتاۋى بىرنەشە رەت وزگەردى. باس رەداكتورلار دا اۋىسىپ وتىردى. الايدا گازەتتىڭ باستى ۇستانىمى، اقيقاتتى تۋ ەتكەن باعدارى وزگەرگەن جوق. كەرىسىنشە، باس قالاعا اينالعاننان كەيىن جۋرناليستەردىڭ جاۋاپكەرشىلىگى ارتىپ، مارتەبەسى بيىكتەدى. بۇرىنعى بىرنەشە مىڭداعان تۇرعىنى بار قالادان الىپ مەگاپوليسكە اينالعان شاھاردىڭ شامشىراعى بولىپ قالىپتاس­تى. ەڭ باستىسى، باسىلىمدار وزىنە ادال، سەنىمدى، تۇراقتى وقىرماندارىمەن بىرگە جاساپ كەلەدى.
استانالىق مارتەبەسىنە ساي اقشامدىقتار كوتەرمەيتىن، ءبىزدىڭ جۋرناليستەردىڭ قالامىنا تىس قالاتىن تاقىرىپ تا، ماسەلە دە جوق. باس قالانىڭ ەكونوميكاسى، الەۋمەتتىك جانە قوعامدىق ومىرىندەگى ايتۋلى وقيعالار، وزەكتى پروبلەمالار ەشقاشان گازەتتەردىڭ بەتىنەن تۇسكەن ەمەس. ويتكەنى بۇل – بۇگىنگى كۇننىڭ شىندىعى. ءبىزدىڭ جۋرناليستەر سول شىندىقتى ار-يمانىنا سۇيەنىپ، باتىل جازۋدى ءوزىنىڭ قاسيەتتى بورىشى دەپ سانايدى.
«قاي ەلدىڭ ءباسپاسوزى مىقتى، سول ەلدىڭ بولاشاعى جارقىن» دەپ الاش ارداقتىسى مىرجاقىپ دۋلاتۇلى ايتقانداي، باس قالانىڭ باسىلىمى وركەندەگەن سايىن، تاۋەلسىزدىگىمىز دە جارقىن بولارى ءسوزسىز. ەڭ باستىسى، ويلى وقىرماندارىمىزعا بىزبەن بىرگە جاساي بەرىڭىزدەر دەمەكپىن!

جارقىن ءجۇمادىلوۆ،
«ELORDA AQPARAT»
جشس ديرەكتورى

پىكىر جازۋ

پوچتاڭىز جاريالانبايدى

3 × 5 =