ەلوردا ساحناسىنان قانداي ساڭلاقتاردى كورگىڭىز كەلەدى؟

0 110

ايگەرىم سەيىتماتوۆا،
ەۋرازيا ۇلتتىق ۋنيۆەرسيتەتىنىڭ ستۋدەنتى:

– «تالعامعا تالاس جوق» دەيدى. ءوز باسىم وپەرانى تىڭداعاندى ۇناتامىن. بىردە اپكەممەن بىرگە الماتىداعى اباي اتىنداعى مەملەكەتتiك اكادەميالىق وپەرا جانە بالەت تەاترىنا بارىپ، «قىز جىبەك» وپەراسىن تاماشالاعان ەدىم. سودان بەرى وسى جانردى جاقىن تارتامىن. بۇگىندە استانادا تۇراتىندىقتان كۇلاش بايسەيىتوۆا اتىنداعى ۇلتتىق وپەرا جانە بالەت تەاترىنىڭ قويىلىمدارىنا اندا-ساندا بارىپ تۇرامىن. وپەرا ءانشىسى رەتىندە مايرا مۇحامەدقىزىن ءسۇيىپ تىڭدايمىن. وپەرانىڭ جانكۇيەرى رەتىندە ماسكەۋدىڭ ۇلكەن تەاترىن استانادا كورگىم كەلەدى. كۇللى الەمدى مويىنداتقان ايگىلى تەاتر جاقىندا عانا ءوزىنىڭ 237-ءشى ماۋسىمىن اشتى. ءۇش ءجۇز جىلعا جۋىق تاريحى بار الىپ ۇجىمنىڭ ونەرىن ءوز استانامىزدىڭ ساحناسىنان تاماشالاعىم كەلەدى.

مەرەي مەيىربەكوۆ،
مەملەكەتتىك قىزمەتكەر:

– مەن قازاقتىڭ شەتەلدە جۇرگەن اتى دارداي ايگىلى جۇلدىزدارىنىڭ باسىن قوسىپ، استاناعا شاقىرعانىن قالار ەدىم. وزگەنىڭ داڭقىن اسىرىپ، شاشپاۋىن كوتەرىپ جۇرگەن قانشاما ءانشى، تۇلعالارىمىز ءجۇر شەتتە؟ سولاردىڭ ءبارىن ەلوردامىزعا جيناپ، ءوز اسپانىمىزدا جارقىراتار كۇن تۋسا، قۇبا-قۇپ. مىسالى، التىناي اسىلمۇراتوۆا، احمەت اگادي، الماس سەركەباەۆ، ت.ب. ءوز ەلىنەن قولداۋ تابا الماي، سىرتقا كەتىپ جاتقاندار ءالى دە بارشىلىق. ولاردىڭ كوپشىلىگى – جالاقىسى از، الەۋمەتتىك جاعدايى ماردىمسىز ونەر وكىلدەرى. ساڭلاقتارىمىزعا جاعداي جاساپ، قوشەمەتتەپ، كوتەرمەلەسەك، ولار دا قازاقستاننىڭ اتىن الەمگە تانىتۋعا بار كۇش-جىگەرىن سالارى انىق.

التىنگۇل رايحان،
مەدبيكە:

– شىنىمدى ايتسام، ءوز باسىم استانا كۇنىن اسىعا كۇتەمىن. سەبەبى، الەمگە ايگىلى نەبىر تالانتتى تۇلعالار ءدال وسى كۇنى ەلورداعا اعىلادى. «بيىل كىمدەر كەلەدى ەكەن؟» دەپ ءبىزدىڭ دە تاعاتىمىز قالمايدى. كەيبىرەۋلەر مۇنى سىن تەزىنە الىپ، اقشانى دالاعا شاشقانداي كورەدى. مەنىڭشە، ەشكىمنىڭ قولى جەتە بەرمەيتىن بەلگىلى تۇلعالاردى استانا ساحناسىندا كورۋ – ەلوردالىق تۇرعىندار ءۇشىن ۇلكەن تارتۋ دەر ەدىم. مەن ەلوردا ساحناسىنان يتاليالىق اتاقتى ءانشى حوسە كاررەراستى كورگىم كەلەدى. ونىڭ الەمدىك ايگىلى «ءۇش تەنوردىڭ» ءبىرى (پلاسيدو دومينگو، مارقۇم لۋچانو پاۆاروتتي) بولعانىن جۇرتشىلىق جاقسى بىلسە كەرەك. قايتالانباس تالانتىمەن كۇللى الەمدى مويىنداتقان ءانشىنىڭ دارا داۋىسى ەلوردامىزدا دا شىرقالسا دەيمىن.

پىكىر جازۋ

پوچتاڭىز جاريالانبايدى

four × 5 =