Елімізде мәдениет сарайлары көп болса…

0 191

Ақжол МЕЙІРБЕКОВ, ҚР еңбек сіңірген әртісі:

– Аға, аты аңызға айналған «Дос-Мұқасан» ансамбліне қайта шақырғанда қалай қабылдадыңыз?
Мәриям, медбике
– Өзбекстанда институт бітіріп, «Дос-Мұқасанның» шақыруымен Алматыға көшіп келген едім. Сөйтіп, жетпісінші жылдардың аяғынан бастап, 1985 жылға дейін жеті жыл сол ұжымда жұмыс істедім. Одан кейін «Гүлдер» ансамблінің директоры болдым. «Сазген сазы», «Арқас» ансамблінде, Алматы облыстық фи­лар­мониясында ән салдым. Бірақ ешқа­шан «Дос-Мұқасанмен» байланысымыз үзілген жоқ. Тұрақты қызмет жаса­маға­ныммен, оқта-тек­те үлкен концерт­теріне қатысып, сах­наға бірге шығып тұратынбыз. Әрине, топтағы біраз жігіттердің бақилық болуы қасында бірге жүрген әріптес­тері үшін де ауыр қайғы. Аты аңызға айналған ансамбльдің шаңы­ра­ғын шайқал­тып кетті десем де болады. Осындай қиын сәтте қара шаңырақтың бір уығы болып, ауыртпалықтарын көтерісейін деп ілгерідегі өз орныма қайтып келдім. Маған артқан сенімді, ұсынысты жерге тастай алмадым. Оның үстіне, қолым бос уақытта жеке шығарма­шы­лық ізденістерімді жалғастыра беруге мүмкіндік жасап отыр.

– Өнер саласында жүргендерге, әсіресе, эстрада әншілеріне қатыс­ты айтылатын сын көп. Бүгін не көп – әнші көп. Бірақ, айтқан сыннан нәтиже шығарып жатса жақсы ғой. Айтыңызшы, сіздің эстрадада орындалып жатқан әндерге көңіліңіз тола ма?
Жансұлу, заңгер
– «Әннiң де естiсi бар, есерi бар, тың­даушының құлағын кесерi бар» деп Абай атамыз айтпақшы, бү­гiнде естi әннен есер әндер көптеу. Өзіңіз айтпақшы, бүгiн­де не көп, әншi көп. Мейлi, бола берсiн. Тек, сол әншiлер әннiң қадiр-қасие­тiн кетiрмей, жөнiмен орындаса деген тілек бар. Егер айтатын әннiң сөзi мен сазы үйлесiп жатса, оны тек дәс­түрлi бағытта ғана емес, эстрадамен, сим­фониялық оркестрмен, тiптi хормен орында. Өз еркiң. Бү­гiнде әннiң қадiрiн қашырып жүр­ген­дердiң қатары эстрадада көптеп саналатыны жасырын емес. Халықтың басым бөлiгi эстраданы көбiрек тыңдайды, сондықтан мәнді де мағы­налы әндерді орындасақ дейміз.

– Ақжол аға, сіздің «Айгөлек» деген әніңізді отбасымызбен тың­даймыз. Басқа қандай ән жаз­­дыр­дыңыз? Шығармашылық­та­ғы жа­ңа­лық­тарыңызды айта кетсеңіз.
Баян, студент
– «Қазақстаным» атты ән жаздырып жатырмын. Әнде даламыздың кең байтақтығы туралы айтылады. Оның алдында Ш.Сариевтің сөзіне жазылған «Далам менің» әнін жаз­дыр­ған бола­тынмын. Сәуірдің орта­сында осы әндерге бейнебаян түсі­руді жоспарлап отырмын. Кез кел­ген өнер иесі сияқты мен де сал­ған әнімнің сазы мен сөзі үйлесіп, тыңдау­­шы­­ның жүрегіне жеткенін қалай­мын. Сон­дықтан, мағыналы, пат­риот­тық ән­дерге басымдық беремін.

– «Дос-Мұқасан» тобының құ­ра­мы­на шақырту түскенде шешім­ді тез қабылдадыңыз ба?
Гүлсім, тыңдарман
– Шыны керек, біраз ойландым. Өйткені жеке өнер жолымды қалып­тастырып, емін-еркін жүріп үйреніп қалғанмын. Қайда барамын, қашан барамын, тіпті бармаймын десем де өзім білемін. Ал ұжымда жұмыс істегеннен кейін, ондай еркіндікпен, еркелікпен қоштасуға тура келеді. Мұнда бәрі ортақ, барлық мүдде бір мақсатқа жұмылдырылады. Ортақ репертуар таңдап, ортақ көзқараспен санасуың міндет. Екінші жағынан алғанда, мұндай ұсыныс екінің біріне жасала бермейді. «Дос-Мұқасанда» ән салу әркімнің бағына жазылмаған, кез келгенге бұйыра қоймайтын қуаныш. Ал мен үшін биік мәртебе, баға жетпес бақыт дер едім.

– «Дос-Мұқасан» тобы елорда жұртын шығармашылық кешіне қашан шақырады?
Мақсат
– Біз осы уақытқа дейін бірнеше концерт беріп үлгердік. Таразда, Шым­кентте, Көкшетауда болдық. Оның ішінде Астана да бар. Арасында ансамбльдің репертуарын қайта жазып, толықтырып жатырмыз. Үнемі дайындық үстіндеміз. Жанды дауыспен ән салу оңай емес. Студияда жұмыс істейміз. Барған жерімде «Дұрыс қадам жасапсыз. Қайтып келге­ніңіз жөн болған» деп жылы лебізін білдіріп жатқандар бар. Бұйыртса, бар күш-жігерімді аямай, тер төгемін деген ойдамын.

– Өз салаңыздың кәсіпқой маманысыз. Сіздіңше, қазақстандық шоу-бизнес қандай деңгейде дамып жатыр?
Самал, тыңдарман
– Бұл орайда менің көңіліме қон­бай­тын жайттар көп. Шоу-бизнес­тің деңгейі төмен. Басқасын айтпаған­ның өзінде елімізде эстрадалық ор­та­­лық жоқ. Филармониялар, Қа­зақ­­­кон­­­церт, театр деген­дер мемлекет­­тің қара­­ма­ғында болу керек. Оларға тиіс­­ті деңгейде қар­жы бөліну керек. Ай­талық, үлкен Алма­тыда бір ғана сарай бар. Ал, қала­ға келетін қонақ­тар­­ды қоса есеп­те­генде Алма­тыда екі миллион адам бар. Мұндай мега­полистерде 4-5 мәде­ниет сарайы болуы керек деп ойлаймын.

– 62 жасыңызда ролик теуіп, жұрт­ты таң қалдырдыңыз. Біз біл­­мей­тін басқа қандай қырлары­ңыз бар?
Гүлмира, қала тұрғыны
– «Астана» арнасында бастау ал­ған «Саған сенемін» жобасына қа­тыс­­­қанбыз. Бәйге шарты бойын­ша, нә­зік жан­дылар ойын үстелінің үстін­де ұтыс тігеді. Ерінің жүргі­зуші берген тапсыр­маны орындап шыға­тын­­ды­­ғына сенім­ділік танытқан әйел­­­дер ең жоғарғы межені береді. Ерлер бұл ше­­шім­ге қарсылық білдіре алмай­ды, өйт­кені, олар басқа бөлмеде отырады. Жеңгелерің маған зор сенім ар­тып, 1,5 жарым минут­та роликпен ке­дер­гі­лер­ден өтіп шық­сын деген тап­сыр­ма берген. Сол кезде белім ауы­рып, операциядан шықтым. Соған қара­мас­тан, тапсыр­­маны орын­дап, жеңіс­ке жеттік. «Жігіт­ке жеті өнер де аз» дейді ғой. Мен бар­­лық өне­рім­ді айта берсем, газетке сыймай кетеді.

– Киноға түсуге шақырып жатса, келісер ме едіңіз?
Дана, бастауыш сынып мұғалімі
– Әрине. Киноға түсу – арманым. Кезінде театр мамандығына тапсырып, түсе алмай қалғам. Егер киноға түсіп жатсам, ақсақалдың немесе ертегі айтатын шалдың рөлін сомдар едім. Кезінде Жұмат Шанин атындағы театрда эпизодтық рөлдерде ойнайтынмын.

– Екінші әйел алу мәселесіне қа­лай қарайсыз?
Нұрберген, қасапшы
– Екінші әйел алу мәселесі көтеріл­генде, өз ойымды ашық білдіретінім рас. Азаматтарымыздың жағдайы келіп, бәйбішесі рұқсат бе­ріп, бала-шағасы зардап шекпесе, қа­зақ­тың саны көбейіп жатса, несі айып? Ал ертең оны жылатып-еңіре­тіп тастап кетіп, баланы тірі жетім етіп, жауап­кершіліктен тайқып шы­ғып, тағы желік іздеуге көшсе, олай ал­ған тоқалы да, арам пиғылы да құры­­сын! Өйткенше, көбейтпегені ар­тық. Бұл менің жеке пікірім ғана.

– Астана жұртшылығына айтар тілегіңіз…
Ардана, қала тұрғыны
– Астаналықтарға тек жақсылық тілеймін. Екіншіден, Астана қаласы әкімдігіне алғыс айтқым келеді. Біздің елордада өткен концерттерімізге үне­мі қолдау білдіріп отырады.

Еркежан СӘТІМБЕК

Пікір жазу

Почтаңыз жарияланбайды

3 × five =