ЭЛЕКТРОНДЫҚ ЖҮЙЕ ЕНГІЗІЛДІ

0 167

Елордадағы өткен жылы ғана жөндеуден өткізілген №15 мектеп-ли­цейде балалардың толыққанды білім алуына тиісті жағдай жасалған.

Мұнда қазір 1320 оқушы бар. Былтырғы жылдың көрсеткіші бойынша бес түлегі «Алтын белгі» иегері атанған. Түрлі бай­қау­ларда топ жарғандарын да санамалап кел­тіруге болады. Бастысы, білім ошағы биыл элек­трондық оқыту жүйесін енгізіпті. Онда сабақ кестесі мен сабақ жоспары, үй тапсырмасы, оқушының үлгерімі, мектепке келуі тайға таңба басқандай байқалып тұрады. Орыс сыныбына қазақ тілі пәнінен дәріс беретін Аманкүл Қазбекова он екі жылдықтың 6-7 сыныптарына оқулық және әдістемелік құрал жазып шыққан. Бұл дүниелердің игілігін республикамыздағы жүз мектеп көруде.

– Қазақ тілінің аясын кеңейту өзімізге байланысты. Орыс сыныбында оқитын қазақ балалары ана тілін білмейді. Отбасында оны қа­рым-қатынас құралына айналдырмағасын, тіл ұзарту аса қиынға соғады. Менің ойымша, осы сыныпта оқитын балаларды ҰБТ кезінде қазақ тілінен сынақтан өткізуіміз керек,-дейді ұстаз А. Қазбекова. Жаны бар сөз. Тілдік мәселе мемлекеттік деңгейде кө­теріліп тұрған тұста айтылған пікір аяқсыз қалмайды деп ойлаймыз.

Мемлекет басшысы өткен жылы тарих пәніне қатысты сын айтып, кемшіліктің бетін ашып көрсеткен еді. Айтылған ескертуден қорытынды шығарған ұстаздар қауымы қазір Білім және ғылым министрлігінің нұс­­қау­лығымен бекітілген арнайы әдістемелік құралдармен оқытады. Тарих,­ қоғам пән­дер­інің мұғалімі Сәуле Ыдырысованың мә­лім­деуінше, оқушылар түсінігіне ау­ыр­ келетін сөздерді жұмсартып, қайта сүз­гі­ден өткізіп оқытып келген. Болашақта ға­­лымдардың қолынан сүбелі оқулықтар шы­ға­тынына сенімді. Әзірге осы олқылықтың орнын осында біраздан бері жүйелі жұмыс жасап келе жатқан «Дебат» пікір-сайыс клубы толықтырып келеді. Клуб мүшелері түрлі тақырыпқа байланысты ой-пікірлерін ашық айтып, қорытынды жасайды. Оның ішінде құқық пәніне қатысты мәселелер де қамтылады.

Алпыс екі жылдық тарихы бар №15 мек­теп-лицейдің оқушылары жыл сайын пәндік олим­пиададан жүлдесіз келген емес. Нақты айт­қанда, оқушылар ұстаздарымен кеңесіп, ғылыми жұмыстармен шұғылданады. Мә­се­лен, М.Мақатаев өлеңдеріндегі қаратпа сөздерді талдап, М.Дулати шығармасындағы құ­қықтық және әлеуметтік көзқарас мә­се­лесін әзірлеген.

 Әмірхан АЛМАҒАНБЕТОВ

Пікір жазу

Почтаңыз жарияланбайды

nineteen − 2 =