Elektrondı kitaphana täwlik boyı qızmet körsetedi

0 335

Qazir Ulttıq akademïyalıq kitaphana qaşıqtan oqırmandarğa onlayn qızmet körsetwdi qolğa aldı. Kitaphana bazasındağı qazaqstandıq ulttıq elektrondı kitaphana kündelikti 24/7 rejïminde jumıs istep tur.

Qazaqstannıñ ulttıq elektrondı kitaphanası portalı ïnternet­ke kirw mümkindigi bar barlıq elge qoljetimdi. Ulttıq akademïyalıq kitaphanada 8000-nan astam sïrek basılımdar kontenti bar. Sonday-aq kitaphananıñ sïrek qorı biregey basılımdardı usınadı. Mäselen, Quran Täpsiri kitabı VIII ğasırda bastalıp, XIV-XV ğasırlarda ayaqtalğan. Qoljazba 500-den asa betten turadı. Kelesi biregey kitap – adam terisinen jasalğan qoljazba. Onıñ muqabası 1532 jılı şıqqan adam terisinen jasalğan jäne eski latın grafïkasında jazılğan. Francwz ğalımdarınıñ pikirinşe, ol Ewropadan äkelingen jäne Soltüstik Ïtalïyadan notarïaldıq jazbalardan turadı. Sïrek kitaptar qorında 1735 jılı Qıtay iliminen habar beretin kitaptardı da oqwğa boladı. Sıyğa alınğan qundı basılımdardıñ biri P.Gnedïçtiñ kitabı boldı (Kes­kindeme. Vayanïe.) T. 1-3, Mäskew, Sankt-Peterbwrg, 1907. Bul – QR Parlamenti Senatınıñ Törağası Darïğa ­Nazarbaevanıñ tartwı, eñ tolıq jäne üşinşi basılım. Sonımen qatar sïrek kitaptar qorında batıs ewropalıq jäne orıs ädebïetiniñ ülken kollekcïyası sanalatın Gogol'diñ basılımdarı, Pwşkïnniñ 1792 jılğı şığarmaların basıp şığarw jäne «Resey memleketiniñ tarïhı» attı Karamzïnniñ basılımdarı jïnaqtalğan. 1909 jılı şıqqan Ahmet Baytursınovtıñ «Qırıq mısal» kitabınıñ tüpnusqası, 1929 jılı şığarılğan qazaq tiliniñ «Älipbïi» attı ïllyustracïyalanğan oqwlıqtar da bar. Osı jäne basqa da basılımdardı ulttıq elektrondı kitaphanadan taba alasız. Karantïn kezeñinde onıñ qızmetine jaña biregey paydalanwşılar jüginip, oqırmandar sanı 40000-nan astı.
Qazirgi waqıtta elektrondıq reswrstıñ jalpı kölemi 60000-nan astam qujattardıñ e-köşirmelerin quraydı. Kitaphana öziniñ paydalanwşılarına jedel käsibï kömek körsetw üşin vïrtwaldı anıqtama qızmetin usınadı, ol aqparattı izdestirwde ıñğaylı jäne tïimdi. Sonımen qatar vïrtwaldı anıqtama rejïminde öz paydalanwşılarınıñ barlıq suraqtarına jawap beredi.
Qazaqstannıñ ulttıq elektrondı kitaphana qızmetin älemniñ 100-den astam elinen paydalanwşılar qoldanıp jatır. Olardıñ qatarında Resey, Qıtay, Türkïya, AQŞ elderi bar. Odan bölek, «Online-kitaphana» jobası iske qosıldı. Bul joba Qazaqstannıñ barlıq kitaphanaşıları men el azamattarına arnalğan. Qazirgi zamanğı jaña tehnologïyalar boyınşa ärtürli taqırıptağı kündelikti därister ötkizedi.
Büginde ulttıq kitaphana elimizge belgili aqın-jazwşılarmen onlayn-kezdeswdi qolğa aldı. Qazirge deyin oqırmandar jazwşı Darïya Jumageldïnovamen, abaytanwşı ğalım Kenjehan Matıjanovpen, satïrïk Köpek Ämirbekpen, aqın Däwletkerey Käpulımen onlayn jüzdesti. Sonday-aq jazwşılar Tolımbek Äbdirayım men Säwle Dosjanova balalarğa arnağan şığarmaların oqıp berdi. Budan bölek, akademïyalıq kitaphana basşısınıñ orınbasarı Nurjan Joldıbalïnov qazirgi zamanğa say jaña jäne IT-tehnologïyalar, elektrondı qujattardı saqtaw türleri, komp'yuterlik bağdarlamalar jäne t. b. taqırıptarda aptasına üş-tört ret onlayn sabaqtarın ötkizdi.
Sonımen qatar YouTube arnasında jäne älewmettik jelilerde Qazaqstannıñ eñbek siñirgen qayratkeri, qarımdı qalamger Köpen Ämirbektiñ «Abay – satïrïk» taqırıbında därisi jäne fïlologïya ğılımdarınıñ doktorı, professor Şäkir Ibıraev pen aqın Bayanğalï Älimjanovtıñ onlayn-suhbatı uyımdastırıldı. Bul ïgilikti şaralar äli de jalğasın taba beredi.

Pikir jazw

Poçtañız jarïyalanbaydı

4 × 5 =