ەلەكتروندى كىتاپحانا تاۋلىك بويى قىزمەت كورسەتەدى

0 331

قازىر ۇلتتىق اكادەميالىق كىتاپحانا قاشىقتان وقىرماندارعا ونلاين قىزمەت كورسەتۋدى قولعا الدى. كىتاپحانا بازاسىنداعى قازاقستاندىق ۇلتتىق ەلەكتروندى كىتاپحانا كۇندەلىكتى 24/7 رەجيمىندە جۇمىس ىستەپ تۇر.

قازاقستاننىڭ ۇلتتىق ەلەكتروندى كىتاپحاناسى پورتالى ينتەرنەت­كە كىرۋ مۇمكىندىگى بار بارلىق ەلگە قولجەتىمدى. ۇلتتىق اكادەميالىق كىتاپحانادا 8000-نان استام سيرەك باسىلىمدار كونتەنتى بار. سونداي-اق كىتاپحانانىڭ سيرەك قورى بىرەگەي باسىلىمداردى ۇسىنادى. ماسەلەن، قۇران ءتاپسىرى كىتابى VIII عاسىردا باستالىپ، XIV-XV عاسىرلاردا اياقتالعان. قولجازبا 500-دەن اسا بەتتەن تۇرادى. كەلەسى بىرەگەي كىتاپ – ادام تەرىسىنەن جاسالعان قولجازبا. ونىڭ مۇقاباسى 1532 جىلى شىققان ادام تەرىسىنەن جاسالعان جانە ەسكى لاتىن گرافيكاسىندا جازىلعان. فرانتسۋز عالىمدارىنىڭ پىكىرىنشە، ول ەۋروپادان اكەلىنگەن جانە سولتۇستىك يتاليادان نوتاريالدىق جازبالاردان تۇرادى. سيرەك كىتاپتار قورىندا 1735 جىلى قىتاي ىلىمىنەن حابار بەرەتىن كىتاپتاردى دا وقۋعا بولادى. سىيعا الىنعان قۇندى باسىلىمداردىڭ ءبىرى پ.گنەديچتىڭ كىتابى بولدى (كەس­كىندەمە. ۆايانيە.) ت. 1-3, ماسكەۋ، سانكت-پەتەربۋرگ، 1907. بۇل – قر پارلامەنتى سەناتىنىڭ توراعاسى داريعا ­نازارباەۆانىڭ تارتۋى، ەڭ تولىق جانە ءۇشىنشى باسىلىم. سونىمەن قاتار سيرەك كىتاپتار قورىندا باتىس ەۋروپالىق جانە ورىس ادەبيەتىنىڭ ۇلكەن كوللەكتسياسى سانالاتىن گوگولدىڭ باسىلىمدارى، پۋشكيننىڭ 1792 جىلعى شىعارمالارىن باسىپ شىعارۋ جانە «رەسەي مەملەكەتىنىڭ تاريحى» اتتى كارامزيننىڭ باسىلىمدارى جيناقتالعان. 1909 جىلى شىققان احمەت بايتۇرسىنوۆتىڭ «قىرىق مىسال» كىتابىنىڭ تۇپنۇسقاسى، 1929 جىلى شىعارىلعان قازاق ءتىلىنىڭ «ءالىپبيى» اتتى يلليۋستراتسيالانعان وقۋلىقتار دا بار. وسى جانە باسقا دا باسىلىمداردى ۇلتتىق ەلەكتروندى كىتاپحانادان تابا الاسىز. كارانتين كەزەڭىندە ونىڭ قىزمەتىنە جاڭا بىرەگەي پايدالانۋشىلار جۇگىنىپ، وقىرماندار سانى 40000-نان استى.
قازىرگى ۋاقىتتا ەلەكتروندىق رەسۋرستىڭ جالپى كولەمى 60000-نان استام قۇجاتتاردىڭ ە-كوشىرمەلەرىن قۇرايدى. كىتاپحانا ءوزىنىڭ پايدالانۋشىلارىنا جەدەل كاسىبي كومەك كورسەتۋ ءۇشىن ۆيرتۋالدى انىقتاما قىزمەتىن ۇسىنادى، ول اقپاراتتى ىزدەستىرۋدە ىڭعايلى جانە ءتيىمدى. سونىمەن قاتار ۆيرتۋالدى انىقتاما رەجيمىندە ءوز پايدالانۋشىلارىنىڭ بارلىق سۇراقتارىنا جاۋاپ بەرەدى.
قازاقستاننىڭ ۇلتتىق ەلەكتروندى كىتاپحانا قىزمەتىن الەمنىڭ 100-دەن استام ەلىنەن پايدالانۋشىلار قولدانىپ جاتىر. ولاردىڭ قاتارىندا رەسەي، قىتاي، تۇركيا، اقش ەلدەرى بار. ودان بولەك، «Online-كىتاپحانا» جوباسى ىسكە قوسىلدى. بۇل جوبا قازاقستاننىڭ بارلىق كىتاپحاناشىلارى مەن ەل ازاماتتارىنا ارنالعان. قازىرگى زامانعى جاڭا تەحنولوگيالار بويىنشا ءارتۇرلى تاقىرىپتاعى كۇندەلىكتى دارىستەر وتكىزەدى.
بۇگىندە ۇلتتىق كىتاپحانا ەلىمىزگە بەلگىلى اقىن-جازۋشىلارمەن ونلاين-كەزدەسۋدى قولعا الدى. قازىرگە دەيىن وقىرماندار جازۋشى داريا جۇماگەلدينوۆامەن، ابايتانۋشى عالىم كەنجەحان ماتىجانوۆپەن، ساتيريك كوپەك امىربەكپەن، اقىن داۋلەتكەرەي كاپۇلىمەن ونلاين جۇزدەستى. سونداي-اق جازۋشىلار تولىمبەك ءابدىرايىم مەن ساۋلە دوسجانوۆا بالالارعا ارناعان شىعارمالارىن وقىپ بەردى. بۇدان بولەك، اكادەميالىق كىتاپحانا باسشىسىنىڭ ورىنباسارى نۇرجان جولدىبالينوۆ قازىرگى زامانعا ساي جاڭا جانە IT-تەحنولوگيالار، ەلەكتروندى قۇجاتتاردى ساقتاۋ تۇرلەرى، كومپيۋتەرلىك باعدارلامالار جانە ت. ب. تاقىرىپتاردا اپتاسىنا ءۇش-ءتورت رەت ونلاين ساباقتارىن وتكىزدى.
سونىمەن قاتار YouTube ارناسىندا جانە الەۋمەتتىك جەلىلەردە قازاقستاننىڭ ەڭبەك سىڭىرگەن قايراتكەرى، قارىمدى قالامگەر كوپەن امىربەكتىڭ «اباي – ساتيريك» تاقىرىبىندا ءدارىسى جانە فيلولوگيا عىلىمدارىنىڭ دوكتورى، پروفەسسور شاكىر ىبىراەۆ پەن اقىن بايانعالي ءالىمجانوۆتىڭ ونلاين-سۇحباتى ۇيىمداستىرىلدى. بۇل يگىلىكتى شارالار ءالى دە جالعاسىن تابا بەرەدى.

پىكىر جازۋ

پوچتاڭىز جاريالانبايدى

2 + eighteen =