ЕЛДІГІМІЗДІ МАҚТАН ЕТЕМІЗ

Елорда мәртебесі оның тұрғындарына ерекше жауапкершілік жүктейді. Бүкіл қазақстандықтардың жарқын болашағын айқындайтын тағдырлы шешімдер ел астанасында­ қабылданады. Мемлекеттің қоғамдық-саяси тірлігі барша қазақстандықтарға серпін беріп, жақсы істердің жаңғырығы байтақ елімізге тарап жатады. Бұл ретте астаналықтың саяси мәдениеті бүкіл еліміздің айнасы десем, артық айтпаған болар едім.

Елордамызда 27 этномәдени бір­лес­тік ресми тіркелген. Олардың жұмысы негізінен ұлтаралық татулық пен ынтымақты, келісім мен бейбітшілікті сақтауға бағытталған. Мемлекетіміздегі тату-тәттіліктің салтанат құруы да біздің қызметімізден өзіндік көрініс табуда. Елордалық этномәдени бір­лес­тіктер қаланың қоғамдық тірші­лі­гі­нен ешқашан сырттап қалған емес. Керісінше, ауқымды істер­дің ортасында жүріп, халықтар досты­ғы­ның көрігін қыздыруда. Қазақ­стан халқының салт-дәстүрлері, тари­хы­ мен мәдениетін насихаттауда,­ Ел бірлігінің Доктринасы мен Қазақ­стан халқы ассамблеясының стра­те­гия­лық жоспарларын жүзе­ге асыруға бағытталған іс-шара­ла­ры­­мыз­бен мақтана аламыз. Көп­ ұлт­ты елор­да­мыз­дың достық туын алып жүргендер қатарында белгілі тұлғаларымыз бар. Олар – М.Гольдберг, С.Героев, Ш.Исмаилов. В.Салахов, М.Тохтибакаев. И.Берг, А.Романова, Т.Ширмер және басқалар. Бұл азаматтар өз этномәдени орта­лық­та­рын­дағы атқаратын міндеттерімен қатар, қалалық бірлестіктердің де жұмы­сына бір кісідей атсалысады.

Қалалық әкімдіктің қолдауымен өтетін түрлі шаралардың ортасында да осы азаматтардың жүретіні қуан­тады. Өткен жылдың орта шенін­де этномәдени орталықтар ара­­сын­­да шахматтан турнир өткіз­дік. Елордамыздың мерейтойы қар­са­ңы­на орайластырған шараға 16 жастан 86 жас аралығындағы 16 адам қатысты. Шахматшылар жеті айналым жасап, жеңімпаздар анықталды. Бірінші орынды – Андрей Кван, екінші орынды – Анна Лян, үшінші орынды Әшімтай Әбдрахманов иеленді. Жастардың шығармашылық бастауларын қолдайтын «Менің отбасым – менің байлығым» атты фотоконкурс та осындай маңызды уақиғалардың бірі болды. Отбасылық құндылықтарды дәріптейтін сайыстың мақсаты да жұртшылықтың назарын аудару болатын. Адами қасиеттерді, мейі­рім­ді­лік­ пен сүйіспеншіліктің көрінісін фото­обьективке таңбалаған үздік­тер­ді марапаттадық.

Жалпы, әлеуметтік жобаларды жүзеге асырар кезде кейінгі толқын жастардың бойында патриоттық сезім қалыптастырып, Отан сүюге тәрбиелеу – біздің басты ұстаны­мы­мыз. «Біздің Қазақстан» интел­лект-шоуы – осының бір дәлелі. Ішкі саясат басқармасының тапсыр­ма­сы­мен өткізілген шараның басты мақсаты – қазақ халқының тілі мен мәде­ниеті тарихына және салт-дәстүріне басқа ұлт өкілдерінің қызы­ғу­шы­лығын арттыруды көздеген еді. Сайысқа Л.Гумилев атындағы Еуразия ұлттық университеті және Назарбаев университетінің студенттері қатысты. Қазақтың мәдени мұрасы, өнері мен спорты басқа да ел тарихын қамтыған сұрақтарға жауап берген студент жастар білімімен қатар өне­рін­ де ортаға салды.

Біз, аға ұрпақ өкілдері, өзіміздің және балаларымыздың бойында отан­сүй­гіш­тік сезімдерін ұштауымыз керек. Еліміздің бүгіні мен өткенін зерделеп, оның құндылықтары мен игіліктеріне мақтаныш пен құрметі сезімін ұялата отырып, осы мақсатқа қол жеткізе аламыз.

Роза ПАК,

Астана қаласы корейлер­ этномәдени бірлестігі төрағасының орынбасары