ەل جەتىستىكتەرى پارتيامەن بايلانىستى

0 42

كەشە ەلوردادا ەلباسى نۇرسۇلتان نازارباەۆ Nur Otan پارتياسىنىڭ ايماقتىق فيليالدارى وكىلدەرىمەن كەڭەس وتكىزدى. كەڭەسكە پارلامەنت ماجىلىسىندەگى Nur Otan پارتياسى فراكتسياسىنىڭ دەپۋتاتتارى، ءماسليحات حاتشىلارى مەن فراكتسيالاردىڭ باسشىلارى قاتىستى.باياندامالاردى تىڭداعاننان كەيىن ەلباسى Nur Otan پارتياسىنىڭ قالىپتاسۋى مەن دامۋىنا ەلەۋلى ۇلەس قوسقان جانداردىڭ ەڭبەگىن ايرىقشا باعالادى. سونىمەن قاتار نۇرسۇلتان نازارباەۆ قازاقستاننىڭ تاۋەلسىزدىك جىلدارىنداعى جەتىستىكتەرىنە ەگجەي-تەگ­جەيلى توقتالىپ، ەلىمىزدىڭ بارلىق جەتىستىكتەرى Nur Otan پارتياسىنىڭ اتقارعان جۇمىستارىمەن تىعىز بايلانىستى ەكەنىن اتاپ ءوتتى.
پارتيا توراعاسى قازاقستان ­پرەزيدەنتى قاسىم-جومارت ­توقاەۆتىڭ اينالاسىندا قوعامدى شوعىرلاندىرۋدىڭ جانە مەملەكەت باسشىسى قويعان مىندەتتەردى ىسكە اسىرۋ جونىندە شارالار قابىلداۋ­دىڭ ماڭىزدىلىعىن ەسكە سالدى.
– سوڭعى جىلدارى قازاقستاننىڭ جالپى ىشكى ءونىمى 11 ميللياردتان 170,5 ميلليارد اقش دوللارىنا دەيىن ءوستى. ەگەر 90-جىلداردىڭ باسىندا حالىقتىڭ ۇشتەن ءبىرى كەدەيلىك شەگىندە بولسا، قازىر بۇل كورسەتكىش 4,6%-عا دەيىن تومەندەدى. شاعىن جانە ورتا بيزنەس­تىڭ ءجىو-دەگى ۇلەسى 27%-عا جەتتى، العاشىندا بىزدە جەكەمەنشىك بولماعان ەدى. ءبىز 300 ميلليارد دوللاردان استام تىكەلەي شەتەلدىك ينۆەستيتسيا تارتتىق. وسى جىلدار ارالىعىندا قازاقستاننىڭ ترانزيتتىك الەۋەتىن ەداۋىر نىعايتا الدىق، – دەدى ­نۇرسۇلتان نازارباەۆ. سونىمەن بىرگە، تۇڭعىش پرەزيدەنت قازاقستاننىڭ 2050 جىلعا دەيىنگى دامۋ ستراتەگياسىنىڭ نەگىزگى باسىمدىقتارىن ناسيحاتتاۋ مەن ءتۇسىندىرۋ جۇمىستارىن ۇيىمداستىرۋدىڭ ماڭىزدى ەكەنىن ايتتى.
نۇرسۇلتان نازارباەۆ شاعىن جانە ورتا بيزنەستىڭ ەل ەكونوميكاسىنداعى ۇلەسىن ارتتىرۋ مەن «ەڭبەك» باعدارلاماسىن جۇزەگە اسىرۋ جوسپارى جايىندا توقتالىپ بىلاي دەدى: «الداعى 2 جىلدا «ەڭبەك» باعدارلاماسى شامامەن 1,5 ميلليون ادامدى قامتيدى، 750 مىڭنان استام جۇمىس ورنىن قۇرۋ جوس­پارلانعان. 2020-2025 جىلدارى 1 ميلليونعا جۋىق پاتەر سالىنادى».
جيىن سوڭىندا ەلباسى ەلەكتورالدىق كەزەڭ الدىندا پارتيا جۇمىسىن كۇشەيتۋ ماڭىزدىلىعىنا قايتا ءبىر نازار اۋداردى. سونىمەن قاتار تۇڭعىش پرەزيدەنت Nur Otan پارتياسىنىڭ دامۋىنا ايتارلىقتاي ۇلەس قوسقان مۇشەلەرگە «بەلسەندى قىزمەتى ءۇشىن» مەدالىن تابىس ەتتى.

پىكىر جازۋ

پوچتاڭىز جاريالانبايدى

15 + 9 =