ЭКСПО ҚҰРЫЛЫСЫ БАСТАЛАДЫ

0 108

834d5b83e6e55165f72e2bcdd7b321d5

Алдағы маусым айында Халықаралық көрмелер бас ассамблеясында мамандандырылған көрменің басты құжаты – Тіркеу құжаты кеңінен қаралады. Қазақ елі халықаралық бюроның жалауын алғаннан кейін ЭКСПО-қалашығының құрылысын бастайды. Бұл туралы Орталық коммуникациялар қызметі алаңында өткен брифингте «Астана ЭКСПО – 2017» ұлттық компаниясының басқарма төрағасы Талғат Ермегияев мәлімдеді.

Талғат Ермегияевтің айтуынша, Елбасы Жолдауында айтылған  елі­міздің 2050 жылға дейінгі даму бағдарламасын жүзеге асыру «Ас­тана ЭКСПО-2017» ұлттық компа­ниясына тікелей байланысты. «Бес жылдыққа бөлінген бұл кезеңде мем­лекетіміз дамыған отыз мем­лекеттің қатарына кіруді мақсат етеді. Сонымен қатар, елдің страте­гия­лық, үдемелі-индустриялық, ин­новациялық даму қарқынын жедел­детуді көздейді. Президент тап­сыр­масының бізге тікелей қаты­сы бар. Өйткені, «Астана Экспо-2017»
ұлттық компаниясының негізгі қызметі – инновациялық жобалар арқылы елімізге инвестиция тарту, бәсекеге қабілетті экономиканы құруға барынша үлес қосу. «ЭКСПО-2017» көрмесі – қазақ тари­хындағы ең ірі халықаралық іс-шара. Салынған әрбір ғимарат өзімізде қалады және инновациялық идея­ларды ел игілігіне жарату үшін қызмет ету керек. Ендеше, жүзден астам мемлекет қатысатын тарихи
жобаны жоғары деңгейде өткізу үшін бар күш-жігерімізді жұмсайтын боламыз. Сәтін салса, ЭКСПО қалашы­ғы­ның құрылыс жұмыстары жақында басталады» дейді Т.Ермегияев.

Шынында, ЭКСПО көрмесі өтетін аумақ Астананың жаңа технологиялар мен инновациялар қолданатын бірегей бөлшегіне айналатын болады. Оның кешендерін тұрғызу мен көрмені өткізу шаралары респу­­бликалық бюджет есебінен қаржы­ландырылмақ. Бұған қоса, инвес­тиция тарту жөнінде келіссөздер жүргізілуде.

– ЭКСПО қалашығы тек электр энергиясы мен дәстүрлі қуат көз­де­рінің ғана емес, жаңартылатын энергия көздері есебінен де қамтамасыз етілетін алғашқы нысандардың бірі болуы тиіс. Қалашықта «Smart Grid» жүйесі қолданысқа енгізілетін болады. «Smart Grid» – қалашық ау­­мағында сумен жабдықтау және электр қуатымен қамтамасыз ету желілерін бақылай алатын «ақылды жүйе».  Бұл жүйе ЭКСПО аумағында орналасатын инфрақұрылымды, оның ішінде қауіпсіздік желісін де толық бақылай алады, – дейді «Астана ЭКСПО – 2017»  ұлттық ком­паниясының  басқарма төрағасы.

Белгілі болғандай, көрмеге дейін және көрмені өткізу кезінде елордада жиырма мыңдай жұмыс орны ашылады. Ал, «ЭКСПО – 2017» халықаралық көрмесін өткізудің мөлшерлі құны екі аптадан кейін белгілі болмақ.

 

Гүлмира АЙМАҒАНБЕТ

 

 

Пікір жазу

Почтаңыз жарияланбайды

one + twenty =