«ЭКО-ТАКСИ» ІЗГІЛІКТЕН АЙНЫҒАН ЕМЕС

Бізді «Эко-такси» орталығының басқарушы директоры Әділхан Жақыпбековтың өзі күтіп алған болатын. Газе­ті­міздің өткен нөмірлерінде де осы тақырып қозғал­ған­дықтан болар, әп дегеннен әңгімеміз жараса кетті.

«Девальвацияға байланысты сатылымдағы барлық нәрсенің күрт қымбат­тағанын білеміз. Автобөл­шек­тер­ден бастап жанармай бағасы да аспандап кетті. Бірақ, біз сондай қиын жағдай­ларға қарамастан, такси тұтыну­шы­ларына арнап енгізген белгілі бір тұрақты тарифімізден әлі де болса бас тартпақ емеспіз. Соған бай­ланысты тұтынушылардың да саны күн өткен сайын артып келеді. Тіпті, көліктеріміздің қаңтарылып қалған кезі кемде-кем.Елбасының Астананы эко­ло­гиялық таза қалалардың қата­рына қосу мақсатында құзырлы органдарға бірнеше тапсыр­ма­лар бергенін де білеміз. Сол мақсаттағы ауаға зиянды қал­дық­тар шығармайтын жолаушылар көліктері туралы жоспар дер уақы­тында қолға алынып отыр. Бұдан ешкім ұтылмайды. Халық денсаулығы да, экология да» деді Әділхан Жақыпбеков.

Сондай-ақ, біз елордамызда 18 жанармай құю стансасы бар екенін білдік. Ал, оларға 5 ірі компанияны есепке алмағанда тағы да бірнеше шағын компаниялар газ жеткізу жұмыстарымен айналысады екен.

Қазіргі уақытта жаңа көліктерге тапсырыс беріле қоймапты. Себебі, оның бәрі инвесторларға бай­ланыс­ты екенін білдік. Бірақ, қала ішінде 100 эко-таксидің елдің ойынан шығып жүргеніне өзіміз куәміз. Бұл туралы бұрын да айтқанбыз.

Кейін бізге эко-такси жүргі­зу­шілерінің бірімен сөйлесетін мүмкіндік туды. Оның айтуынша, кез келген тұтынушы әр бесінші шақырымға өз қалтасынан шамамен 750-800 теңге көлемдегі ақша шығындайды екен. Арнайы тапсырыс болған уақытта жүр­гі­зу­шілердің мойнына діттеген жерге 10 минут ішінде жету міндеттелген. Ал егер бұл көліктерді жолдан тоқтатар болсаңыз, көлікке отыр­ғаныңыз үшін 200 теңге ұсынып, одан кейінгі әр шақырымға белгілі бір тарифпен есептелген ақша жұмсап отырасыз.

Бүгінгі күні таксидің қала ішін­дегі қозғалысы 10 секторға бөлініп қойған. Ереже бойынша, көліктер тұтынушыға кезекпен қызмет көрсетеді. Бұның бәрі бір орталықтан рет­теліп отырғандықтан, басқа такси­лер­де­гідей әріптестердің алдын орап кететін жағдайға мүлде жол жоқ. Нұсқаушыдан жеткен тап­сы­рысқа бірінші таксиден бір минут ішінде жауап берілмесе, байланыс екіншісімен орнатылады. Кейде бір тәулік ішінде «Эко-таксидің» көмегіне жүгінген жолау­шы­лардың саны 600-ге дейін жетеді екен. Ал солардың бар­лы­ғына 70 шамалы такси қызмет көрсетеді. Жүргізушілер екі ауысыммен жұмыс істейді. Күндізгі бөлімдегілер таңғы сағат 5-тен түнгі 10-ға дейін еңбектенеді.

Күн өткен сайын жолаушылардың көңілін тауып келе жатқан «Эко-таксиге» жүргізушілік қызметке орналасқысы келетіндердің де қата­ры көбейген. Бір тәулік ішінде орташа есеппен 10-20 адам қажетті құжат­тарын алып келіп жатады. Бірақ, бәріне бірдей оң қабақ танытыла бермейді. Өйткені, осы жұмысқа орналасу үшін арнайы күрделі медициналық тек­се­ріс­терден өтуі шарт. Дегенмен такси жүргізушісі болып жүргендердің арасында көп балалы әкелер де, жас жігіттер де жиі кездеседі екен.

Ал бұл көліктерді үйге шақыру үшін қызмет көрсету нөмірлерінен бөлек ұялы телефондарға лайық­тал­ған арнайы бағдарламалар арқылы тапсырыс беруге болады. Бұл жөнінен iPad, iPhone және андроид қолданушыларына ыңғайлы жағдай жасалған.

Нұрислам ҚҰСПАНҒАЛИ