دەنساۋلىق ءتۋريزمى قايتسە داميدى؟

0 162

ەستۋىڭىز بولسا، ءتۋريزمنىڭ مۇنداي دا ءتۇرى بار. قاراپايىم انىقتاماسى «ساۋىقتىرۋ ماقساتىنداعى ساياحات» دەگەنگە سايادى.
قازىر، قالتالى قازاقستاندىقتاردىڭ شەتەلگە شىعىپ ەمدەلۋى بىلاي تۇرسىن، قۇرساعىنداعى ءسابيىن شەكارا اسىپ بوسانۋدى ءسان سانايتىندارى كوبەيىپ كەتتى.

جاسىراتىنى جوق، شەتەلدىك ەمدەۋ كلينيكالارىنىڭ جاعدايى دا، جارناماسى دا جاقسى جولعا قويىلعان.
ماسەلەن، بىزدەگىلەردى ماگنيتتەي تارتاتىن مالايزيا، سينگاپۋر ەلدەرىنىڭ دەنساۋلىق ساقتاۋ سالاسى ازيا اۋماعىنىڭ ەڭ ۇزدىك جۇيەسى رەتىندە تانىمال. سينگاپۋر مەديتسيناسى جوعارى ساپالى قىزمەت، بىلىكتى مامان، ۇزدىك تەحنولوگياسى جونىنەن الپاۋىت ەلدەردىڭ وزىنەن اسىپ تۇسەدى. مۇندا ەمدەلۋدىڭ قۇنى دا قولجەتىمدى. ناقتىراق ايتساق، اقش پەن گەرمانيا- دا ەمدەلۋدەن 40 پايىزعا، ۇلىبريتانيادا ەمدەلۋدەن 60 پايىزعا ارزان.
ونسىز دا تۋريستەرى تىنباي اعىلىپ جاتاتىن كورەيا، تۇركيا، تايلاند ەلدەرى دە بۇگىندە مەديتسينالىق ءتۋريزمدى دامىتۋعا بارىنشا كۇشىن سالۋدا. ويتكەنى، تۋريست دەمالعانى ءۇشىن ءبىر، ەم-دومى ءۇشىن ەكى تولەپ، ناتيجەسىندە مەملەكەت قازىناسى قىرۋار قارجىمەن تولىعىپ وتىر.
جالپى، دەنساۋلىق ءتۋريزمىن دامىتۋعا ءبىزدىڭ دە تالاسىمىز بار.
البەتتە، مۇنداي قىزمەتتi كورسەتۋ ءۇشىن الدىمەن، ماڭدايالدى مەديتسينا ورتالىعى بولۋى قاجەت.
بۇل جاعىنان كەلگەندە قۋ شوپپەن اۋىز سۇرتەتىندەي حالدە ەمەسپىز.
استانا قالاسىنىڭ مەديتسينالىق كلاستەرىنە كىرەتىن كلينيكالار جابدىقتالۋى جاعىنان الەمدىك دەڭگەيدەگى جوعارى تالاپتارعا جاۋاپ بەرەدى. ماسەلەن، رەسپۋبليكالىق نەيروحيرۋرگيا ورتالىعى بۇكىل ورتا ازياداعى بىردەن-ءبىر ورتالىق بولىپ ەسەپتەلەدى. ال، دياگنوستيكالىق ورتالىقتا ورناتىلعان اپپاراتتار ارقىلى قاتەرلى ىسىكتى باستاپقى ساتىسىندا-اق انىقتاۋعا مۇمكىندىك بار. كلاستەر قۇرامىنداعى ءاربىر كلينيكادا قولدانىلاتىن وسى تەكتەس تەحنولوگيالاردىڭ ارقاسىندا بۇرىن تەك شەتەلدەردە جاسالاتىن كۇردەلى وپەراتسيالاردى قازاقستاندىق دارىگەرلەر جاساي الاتىن كۇنگە جەتتى.
ستاتيستيكالىق ساندارعا سەنسەك، قازاقستاننىڭ جالپى دەنساۋلىق ساقتاۋ جۇيەسى ەشكىمنەن كەم ەمەس.
2005 جىلدان بۇگىنگى كۇنگە دەيىن مەديتسينانى تەحنولوگيامەن جابدىقتاۋ جاعى 2,5 ەسەگە جاقسارعان.
2004 جىلمەن سالىستىرعاندا، دەنساۋلىق سالاسىنا ءبولىنىپ جاتقان قارجى ءتورت ەسەگە ۇلعايعان.
دەنساۋلىق ساقتاۋ سالاسىن دامىتۋعا باعىتتالعان مەملەكەتتىك باعدارلاما اياسىندا سوڭعى بەسجىلدىقتا 400 مەديتسينالىق نىسان بوي كوتەرىپ، ءتورت مىڭعا جۋىق مەكەمە كۇردەلى جوندەۋدەن وتكەن.
سويتە تۇرا، دەرتىنە داۋا ىزدەپ، شەتەل اسۋشىلار لەگى تولاستار ەمەس. نەگە؟
قىرۋار قارجى كىم ءۇشىن قۇيىلىپ جاتىر؟
وسى ورايدا استاناداعى زاماناۋي وزىق تەحنولوگيالارمەن قارۋلانعان، وركەنيەت تالاپتارىنا ساي ساپالى قىزمەت كورسەتۋگە قاۋقارلى كلاستەر ارقىلى ەلوردانى دەنساۋلىق ءتۋريزمىنىڭ ورتالىعىنا اينالدىرۋعا تولىق مۇمكىندىك بار ەكەنىن ايتا كەتكەن ءجون.
جالپى، استانا تۋريستەردەن كەندە ەمەس. ولاردىڭ سانى جىل وتكەن سايىن ارتىپ كەلەدى. ماسەلەن، 2010 جىلى استاناعا كەلگەن تۋريستەر سانى 464403 ادامدى قۇراسا، 2011 جىلدىڭ قورىتىندىسى بويىنشا، بۇل كورسەتكىش 560923 ادامعا جەتكەن. الايدا ولاردىڭ جارتىسىنان كوبى، ياعني 76,2 پايىزى ىسكەرلىك ماقساتپەن كەلىپتى. تەك 21,2 پايىزى عانا دەمالۋ، ەمدەلۋ ماقساتىمەن تابان تىرەگەن. بۇل، از، ارينە. ەندىگى مىندەت وسى سوڭعى ماقساتتاعى توپتىڭ ۇلەس سالماعىن ارتتىرۋ بولماق.
ويتكەنى، استانانى ودان ءارى دامىتۋ جايىنداعى بيىلعى جيىندا نۇرسۇلتان نازارباەۆ «استانا جاقىن ۋاقىتتا مەديتسينالىق تۋريزم ورتالىعىنا اينالدىرۋ ءتيىس» دەپ جاۋاپتى جاندارعا ناقتى تاپسىرما جۇكتەدى.

شىنار دوسان

پىكىر جازۋ

پوچتاڭىز جاريالانبايدى

20 + 15 =