دەمالىس كۇندەرى سۋ نەگە توقتاپ قالادى؟

0 69

«پريگورود» تۇرعىن الابىن قارا كۇيە باسىپ كەتتى. بۇل ماسەلە ەسىل اۋدانىنىڭ اكىمى تولەگەن زاكاريانوۆتىڭ تۇرعىندار الدىنداعى ەسەپ بەرۋ جيىنىندا كوتەرىلدى.

اۋدان اكىمىنىڭ ءبىر جىل بويى اتقارىلعان جۇمىستار مەن ال­داعى جوسپارلارى تۋرالى بايان­داماسىنان كەيىن ءسوز العان «پريگورود» تۇرعىن الابىنىڭ تۇرعىنى ۆەنەرا فاتتاحوۆا بىرنەشە تۇيتكىلدى تارقاتتى.
– سەنبى-جەكسەنبى جانە مەرەكەلىك دەمالىس كۇندەرى بىزدە سۋ توقتاپ قالادى. «استانا سۋ ارناسىنا» تالاي مارتە حات جازدىق، بىراق جاۋاپ بولمادى. بۇل – ءبىر. سودان سوڭ جاڭادان سالىنعان قازاندىق مۇرجاسى بۇرىنعىسىنان تومەن بولعاندىقتان، ودان شىعاتىن تۇتىننەن كوشەنىڭ ءبارى قارا كۇيە بولىپ، ءۇيىمىزدىڭ دالىزىنە دەيىن لاستانىپ جاتىر. سونداي-اق بۇرىن جىل سايىن «پريگورودتا» بالالارعا ارنالعان مۇز قالاشىعى سالىناتىن. بيىل بۇل قاراستىرىلمادى، – دەدى ۆ.فاتتاحوۆا.
ساياجايدا تۇراتىن 6 بالانىڭ اناسى مانشۇك نامازبەكوۆا بالالارىن ءوز ۇيىنە تىركەتە الماي جاتقانىن ايتىپ قاپالاندى. اكىمنەن بۇل ماڭداعى ساياجاي ۇيلەرىنىڭ قاشان ءسۇ­رىلەتىنىن سۇراعان ول وسى ماسەلەنى شەشىپ بەرۋدى ءوتىندى. ال زاۋرەش حاليموۆا ەسىمدى تۇرعىن پاتەرىنىڭ تەرەزەسىن قۇرىلىس كومپانياسىنىڭ دۇرىس سالماۋىنىڭ كەسىرىنەن قىس ورتاسىندا قازىر ءۇيىنىڭ قابىرعاسىنا مۇز قاتقانىن ايتىپ شاعىمداندى. بۇدان بولەك تۇرعىندار جول مەن كوشە جارىعىنىڭ، كولىك تۇراقتارىنىڭ ماسەلەلەرىن ءسوز ەتتى. ءوز كەزەگىندە زەينەتكەر بولات قاجى بالتاباەۆ وسى اي­دا ەلەكتر ەنەرگياسى قىزمەت قۇنىنىڭ كۇرت قىمباتتاپ، كوممۋنالدىق تولەماقىعا 27 مىڭ تەڭگە تولەگەنىن ايتىپ، تاريفكە قاتىستى نارازىلىعىن ءبىلدىردى.


ءار تۇرعىننىڭ ساۋالىنا كەزەكپە-كەزەك جاۋاپ بەرگەن تولەگەن زاكاريانوۆ بارلىق ءوتىنىش-تىلەكتى نازاردان تىس قال­دىرمايتىنىن ايتا كەلىپ، كەيبىر ماسەلەنىڭ وڭدى شەشىمىن تاۋىپ جاتقانىن جەتكىزدى. ونىڭ ايتۋىنشا، بيىل مۇندا كوشەنى جارىقتاندىرۋ جۇمىستارى جۇرگىزىلەدى. بىردە جانىپ، تاعى بىردە ءسونىپ تۇراتىن توزىعى جەتكەن شامداردىڭ ورنىنا ەنەرگيا ۇنەمدەگىش جارىق ديودتى شامدار ورناتىلماق.
– ساياجايدى ءسۇرۋ جوسپاردا قاراستىرىلعان. بىراق ونىڭ ناقتى قاشان جۇزەگە اسىرىلاتىنى ازىرگە بەلگىسىز. ال تىركەۋ جونىندە قۇزىرلى ورگانداردان سۇراستىرىپ كورەيىك. بۇل ماسەلە باقىلاۋىمىزدا بولادى. سول سياقتى سۋ ماسەلەسى جايلى بۇدان بىلاي الاڭداماي-اق قويىڭىزدار. ول جاعى الداعى ۋاقىتتا شەشىلەدى. اۆتوتۇراق، بالاباقشا مەن مەكتەپ ماسەلەسى دە جوسپار بويىنشا رەتتەلەدى. جالپى، مەن مۇنداعى بارلىق ماسەلەدەن حاباردارمىن، – دەگەن اۋدان اكىمى «پريگورود» تۇرعىن الابىنىڭ جانىنداعى «ەسىل-نۇرا» ارناسىنا بىلتىر 7 ادامنىڭ اعىپ كەتكەنىن ەسكە سالىپ، اتالمىش ارناعا قورعان سالۋعا جاۋاپتى مامانداردىڭ سالعىرتتىق تانىتقانىن قاتاڭ سىنعا الدى.

پىكىر جازۋ

پوچتاڭىز جاريالانبايدى