دارىگەر قاتەلىگى قالاي باعالانادى؟

0 23

ءماجىلىس حالىقتىڭ دەنساۋلىعى جانە دەنساۋلىق ساقتاۋ جۇيەسى تۋرالى كودەكسكە سەنات ەنگىزگەن دارىگەردىڭ قاتەلىگىن دەكريميناليزاتسيالاۋ تۋرالى تۇزەتۋلەرمەن كەلىستى. وسىدان كەيىن، رەگلامەنتكە سايكەس زاڭ جوباسى قابىلدانىپ، پرەزيدەنتتىڭ قول قويۋىنا جىبەرىلەدى.

سەناتور سەرىك بەكتۇرعانوۆ زاڭ جوباسىنداعى تۇزەتۋلەردى بىلايشا ءتۇسىندىرىپ بەردى: مەديتسينا قىزمەتكەرلەرىنىڭ كلينيكالىق زەرتتەۋلەر، اۋرۋدىڭ الدىن الۋ، دياگنوستيكا، ەم-دوم جاساۋ جانە مەديتسينالىق ايىقتىرۋ جۇرگىزۋ بارىسىندا اۋىر سالدارى بولسا نەمەسە ول زاڭ بۇزۋشىلىق لاۋازىمدى تۇلعانىڭ تاراپىنان جاسالعان بولسا قىلمىستىق كودەكستەگى جازا ءتۇرى بۇرىنعى كۇيىندە قالادى. «بۇعان قوسا، جوعارىداعىداي ءىس-قيمىلدار بارىسىندا اۋىر سالدارى بايقالماسا جانە لاۋازىمدى تۇلعانىڭ تاراپىنان زاڭ بۇزۋشىلىق جاسالماسا، ونى اكىمشىلىك-قۇقىق بۇزۋشىلىق كودەكسكە اۋىستىرۋدى ۇسىندىق» دەدى س.بەكتۇرعانوۆ.
سەنات ەنگىزگەن تۇزەتۋلەرگە سايكەس، دارىگەرلەردىڭ زاڭ بۇزۋ فاكتىلەرىنە قاتىستى قىلمىستىق ءىس قوزعاۋ ءۇشىن شاعىمعا ۋاكىلەتتى ورگان جۇرگىزگەن تەكسەرىس اكتىلەرى مەن رەۆيزيالىق قۇجاتتار قوسا بەرىلەدى. «قازىر مۇنداي ەرەجە جوق. سول سەبەپتەن، دارىگەرلەردىڭ ارەكەتىنە قاتىستى كەز كەلگەن شاعىمنان كەيىن قىلمىستىق ءىس قوزعالادى. قىلمىستىق ءىس قوزعالعاننان كەيىن، ءارتۇرلى تالداۋ، كۇدىكتىلەردەن جاۋاپ الۋ مەن كۋاگەرلەرگە ساۋالناما جۇرگىزۋ، ماتەريالداردى جيناپ الۋ جانە وزگە دە تەرگەۋ ءىس-شارالارى جۇزەگە اسىرىلادى. مۇنداي جاعدايدا تەرگەۋشىلەردىڭ جۇمىسى ەكى ەسەگە كوبەيۋمەن قاتار، دارىگەرلەردىڭ دە جۇمىسى توقتايدى. ولاردىڭ اينالاسىندا كۇدىك پەن سەنىمسىزدىك احۋال قالىپتاسادى. الايدا ءبىر عانا شاعىمنىڭ نەگىزىندە قوزعالعان قىلمىستىق ىستەردىڭ از عانا بولىگى سوتقا دەيىن جەتەدى» دەپ ءتۇسىندىردى سەناتور.

پىكىر جازۋ

پوچتاڭىز جاريالانبايدى

13 − 2 =