DÄRİGER DÄREGEYİ

0 145

ERA_4629

Bir jerde taban awdarmay, uzaq jıldar boyı jumıs isteytin adamdar az. Äsirese, negizgi mindetine qosa, tabanınan tawsılıp, özine tïesili wçaskelerdi aralaytın terapevter üşin bul – nağız jankeştilik dewge boladı. Bizdiñ bügingi keyipkerlerimiz solardıñ qatarınan.

Qırıq jıldıq qızmet

Adam tänin emdeytin därigerlerdiñ jumısı oñay emes. Solardıñ işinde jalpı praktïka därigeri – wçaskelik terapevtiñ atqaratın şarwası bastan asadı. Soğan qaramastan №1 qalalıq emhananıñ därigeri Tat'yana Pïsarenko bir wçaskede 40 jıl boyı üzbey jumıs istep keledi. Kezindegi Celïnograd Memlekettik medïcïnalıq ïnstïtwtın bitirgen ol 1974 jılı ïnternatwranı sol kezdegi awrwhanağa biriktirilgen qazirgi №1 qalalıq emhana bazasında ötkizedi. Sonda aşılğan eñbek kitap­şasına äli künge jaña jazba tüsken emes.

Jalpı terapevtiñ jumısı tek adam emdewmen şektelmeydi. Olar qanday da bir älewmettik awrwlardı erte anıqtaw, ana men bala ölimine jol bermew, dïspanserlik emdewge waqıtılı joldama berw, jurtşılıqtı skrïnïngtik tekserwden ötkizw, salawattı ömir saltın saqtaw sekildi san qırlı mindetten turadı. «Biz nawqastardı aldın-ala jazılw boyınşa qabıldaymız. Bir qabıldaw kezinde 16 adam jazıladı. Biraq keletinderdiñ qarası köptigi sonşa, osı normatïvten äldeqayda asıp ketip jatamız. Bir wçaskede uzaq jıl jumıs istegennen keyin sonda turatın adamdar özimniñ jaqınımday bolıp ketken. Sondıqtan, köñilin qïmay, qabıldaytın kezder köp boladı» deydi däriger. Terapevtke bir adamdı qabıldawğa 15 mïnwt beriledi eken. Osı waqıttıñ işinde däriger nawqastı qarap, naqtı dïagnozın qoyıp, em-domın tağayındap ül­gerwi kerek. Bul üşin Tat'yana Vasïl'evnaday şïraq adam bolw qajet.

Tat'yana Pïsarenkonıñ wças­kesine Astanadağı Jeñis dañğılı, Jangeldïn, Jeltoqsan sekildi bayırğı köşeler kiredi. Munda turatındardıñ deni – awrw-sırqawı köp egde adamdar. Olardıñ üyge şaqırtwı da köp. Tat'yana Pïsarenko tört sağat boyı emhanada qabıldaw jürgizse, üş sağat boyı wçaskesin aralap, şaqırtw boyınşa me­dï­cïnalıq kömek kör­setedi. Bar biletini – jumısı bol­ğandıqtan şaqırtwdan qalğan emes. Birde şaqırtw boyınşa naw­qastıñ üyine kele jatıp jolda qulap, qolın şığarıp alğanı bar. Basqa birew bolsa, sol jerden keri qaytar edi. Biraq, Tat'yana Vasïl'evna öytken joq. Qolı qaqsap awırıp bara jatsa da özin tağatsızdana kütip otırğan nawqastı qarawğa bar­dı. Tïisti kömegin jasağannan keyin ğana ömirinde alğaş ret den­saw­lığına baylanıstı eñ­bekke jaram­sızdıq qağazın alıp, üyinde jattı.

Tat'yana Vasïl'evna jan ja­rı ekewi eki bala tärbïelep ösir­di. Biraq, qızdarı däriger analarınıñ jolın qwmaptı. Kündiz nawqastardı emdewmen aynalısıp, tünde qat-qabat qa­ğazdarmen otıratın anasınıñ jumısı oñay emestigin olar da bilse kerek. «Jumısınıñ qïın­dığına, aylığınıñ mar­dım­­­sızdığına qaramastan men ma­mandığımdı öte jaqsı köre­min. Men üşin adam janınıñ ara­şası bolwdan artıq märtebe joq» deydi Tat'yana Pïsarenko.

«Emhana – ekinşi üyim»

Bïıl 72 jasqa tolıp otırğan №1 qalalıq emhananıñ medbïkesi Marïya Korlyakovanıñ jumıs ötili 50 jılğa jwıqtaydı. Ol da uzaq jıl boyı osı emhanada eñbek etip keledi.

Emhanadağı №2 wçaskeniñ medbïkesi Marïya Ïvanovna jasına qaramastan özine tïesili köşelerdi aralap, naw­qastarğa däriger tağayındağan em-domdı jürgizedi. Küre tamırğa ïne salwdıñ şeberi. Onıñ eptiligine nawqastar da rïza bolıp, alğıstarın jawdırıp jatadı.

Özine tïesili wçaskelerdiñ adamdarın därigerliñ qabıldawına, skrïnïngtik tekserwge, flyuorografïyadan ötwge şaqırw, vakcïna salw da osı medbïkeniñ moynında. Arasında özinde tirkewde turğan jalğızilikti sırqat jandardıñ köñilin surap, hal-jağdayın bilwdi de umıtpaydı.

Marïya Ïvanovnanıñ bar medewi – jumısı. Özi emhananı – ekinşi üyim deydi. «№1 qalalıq emhana ujımı men jabıqqan kezde – jubattı, qïnalğan kezde – kömektesti. Munda 40 jıldan astam waqıt boyı taban awdarmastan jumıs istep jatqanımnıñ bir sırı da osında» deydi ol.

Marïya Korlyakovanı qınjıltatın bir mäsele – zeynetaqısınıñ azdığı. Ol 50 jılğa jwıq jumıs ötilimen 30 mıñnıñ üstinde ğana zeynetaqı aladı eken. 1998 jılı zeynetaqı jüyesi reformağa uşırağan kezde zeynetkerlikke şıqqan ol bul mäseleni alğa tartıp talay jerge barıptı. Äzirşe nätïje joq. Biraq, Marïya Ïvanovnanıñ ümiti üzilmek emes. Ol kezinde özi sïyaqtı zeynetkerlikke şıqqan zaman­das­tarınıñ köp jılğı eñbegi äytewir bir aqtalatınına senimdi.

Qımbat TOQTAMURAT

 

Pikir jazw

Poçtañız jarïyalanbaydı

three × two =