DARHAN MEN MEYİRHAN

0 140

Elordalıq egizder Darhan men Meyirhan Qazaq tehnologïya jäne bïznes wnïversïteti kolledjiniñ 2-kwrs stwdentteri. Twrïzm salasınıñ bolaşaq mamandarı.

Egizderdi jataqhana komendantı Ämïna apay arqılı sırttay tanïtınbız. Ana bir jolı jataqhanağa jolımız tüskende eki uldıñ jibektey minezi men ülgili tärtibin awzınıñ swı qurıp otırıp äñgimelep bergen. Bul jataqhananıñ özge jataqhanalardan ayırmaşılığı, baqanday bes jup egiz turadı. Bir qızığı, änşeyinde qatal körinetin komendant apay osı bes egiz jayında söz qozğasa, jibip sala beredi. Jigitterdi izdep barğan bizdi esik aldınan özi kütip aldı. «Darhan – sabırlı, ustamdı. Meyirhannıñ minezi jaydarı, ünemi külip jüredi. Jataqhanada eki jıldan beri turıp keledi. Ekewiniñ bir de bir artıq minezin, oğaş qılığın bayqağan joqpın», deydi apay. Dostarınıñ aytwınşa, ekewi de öte eñbekqor. Ata-anasına artıq salmaq salmawdı oylağan olar sabaqtan bos waqıttarında qaladağı «Sätti» meyramhanasında dayaşı bolıp qızmet etedi. Burındarı twğan-twıstarınıñ, qurbı-qurdastarınıñ ayıra almaytını azday, endi jaña qızmettesteri men kelgen qonaqtardıñ biraz bas qatırwlarına twra kelip tur. Meyramhana jumısınıñ qağïdası boyınşa är dayaşınıñ özine tïesili qonaq üsteli boladı. Ädettegidey jumıs küni bolatın. Öz şarwasımen jürgen Meyirhandı körşi üsteldegiler közimen tesip baradı. Arı ötse de, beri ötse de sıbır-kübir äñgime. Bir kezde şıday almay ketken bolwı kerek, arasındağı birewi atıp turıp «Äy, jigitim, sen özi bizdiñ tapsırısımızdı qaşan äkelesiñ? Bizdi attap arı ötesiñ, beri ötesiñ…» dep dawıs kötere söyledi. Jağdaydı birden tüsine qoyğan bul tapsırıstı alğan özi emes ekendigin aytıp edi, älgi jigit ağası: «Sen bizdi jartı sağattan astam küttirgeniñ azday, endi mazaq eteyin dep tursıñ ba?», dep tipti, aşwına mindi.

Älginiñ oñaylıqpen sözge qonaq bermesin bilip, ashanada jürgen Darhandı süyregendey bolıp alıp keldi. Swdıñ qos tamşısınday eki dayaşını körgende qonaqtıñ özi ne derin bilmey, sasqanınan küle bergeni.

Uqsastıqtıñ keyde paydası tïip jatatın tusı da bar. Mäselen, är oqw jılınıñ basında stwdentter medïcïnalıq tekserwden ötwi kerek. Mundayda därigerdiñ qabıldawına ekewi birdey barıp, äwre bolıp jatpaydı. Biriniñ qujatımen ekinşisi kirip, medïcïna kitapşasınıñ ekewine de därigerdiñ qolın qoydırıp alıp şığadı. Alayda , buğan deyingi egiz keyipkerlerimiz sekildi bul eki jigittiñ biriniñ ornına biri emtïhan tapsırıp, muğalimderdi aldap-soqqan kezi bolmaptı. Öytkeni, muğalimniñ qwlığı bulardan da asıp tüsse kerek, kez kelgen sınaqqa ekewin qatar kirgizedi. Qatar otırğızıp qoyıp suraq qoyadı. Alayda, üzdik ülgeriminiñ arqasında munday sınnan süringen kezderi joq. Egiz uldıñ endigi arman- maqsatı, nağız maman atanıp, ömir sınınan sürinbew…

Pikir jazw

Poçtañız jarïyalanbaydı

three × four =