Данышпанды дәріптеу дәрісі

0 171

Абайтанушылар мен елордадағы зиялы қауым «Абайтану» орталығы және «Абай нұры» клубы» атты дөңгелек үстел отырысында бас қосты. Жиынға жастар да қатысып, данышпан еңбектерінің маңызы мен тәрбиелік құндылықтарын әңгімеледі.

Отырыста Қазақстан-Ресей университетінің атқарушы директоры, профессор – Әбдіғали Жандығұлов сөз сөйлеп, клуб­тың белсенді мүшелеріне ри­за­шылығын білдірді. «Абай – телегей теңіз. Ол ешкімнің құшағына сыймайды. Ұлы Абай­дың өзі жинаған шексіз мұрасы арқылы бүгінгі жастардың елі­не, ұлтына деген рухани патриоттық сезімін ояту, қазақ этнографиясын жаңғырту мақсатында «Абайтану» ғы­лы­ми-танымдық орталығын құр­дық. Орталықтың Қазақстан-Ресей университеті жанынан ашылуының маңызы зор. Екі елдің арасындағы көптеген ба­ғыттағы келісім-шарттар бірегей экономикалық кеңістік біздің рухани байланыстарымызды да бекітеді. Л.Гумилев атындағы Еуразия ұлттық университетінің оқы­тушысы, филология ғылым­дарының кандидаты, доцент Сәруар Қамаева Абайдың заманындағы дәстүр, Құнанбай бейнесі туралы кеңірек тоқ­талды.

«Абайтану» орталығының директоры Алмахан Мұхамет­қалиқызы клуб мүшелері мен клуб жұмысының бағытын түсіндірді. «Кәусар» айдарымен ақындар бөлімі, «Руханият» айдарымен Абай тақырыбына қалам тербеп жүрген ғалымдар мен мәнерлеп оқу шеберлері бөлімі, «Саз сандық» айдарымен Абай әндерін орындаушылар мен дәстүрлі ән орындаушылар бөлімі жұмыс жасап жатқанын жеткізді. Оның айтуынша, «Тұсаукесер» айдарымен «Абай нұры» клубының та­лантты жастарының шығар­машылық кештері өткізіліп тұрмақ. «Қолтаңба» айдары бойынша белгілі қоғам қай­раткерлерімен, танымал тұлғалармен, Абайтанушы­лармен кездесулер ұйым­дастырылады екен.
Абайдың шығармашылық өнер мектебін қалыптастыруды басты мақсатқа қойған орталықтың бұл бастамасына жиналған жұртшылық ризашылығын білдірді.

Әсел
МҰРАТБЕКҚЫЗЫ

Пікір жазу

Почтаңыз жарияланбайды

10 − six =