بيۋدجەتكە قاتىسۋدىڭ بۇگىنى مەن بولاشاعى

0 72

مەملەكەت باسشىسى قاسىم-جومارت توقاەۆ بىلتىر شىلدە ايىندا وتكەن ۇكىمەتتىڭ كەڭەيتىلگەن وتىرىسىندا «حالىق اتسالىساتىن بيۋدجەت» جوباسىن قالىپتاستىرۋدى، ياعني بەلگىلى ءبىر ايماق بيۋدجەتىن ازىرلەگەندە تۇرعىنداردىڭ پىكىرى مەن سۇرانىسىنا قۇلاق اسۋدى تاپسىردى. پرەزيدەنتتىك جاستار كادر رەزەرۆىنە وتكەن ازاماتتارمەن كەزدەسۋىندە وسىنى تاعى ەسكە سالدى. وسى اپتا باسىندا ەل حالقىنا جولداعان «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا بۇل جوبانى دامىتۋدىڭ كەلەسى كەزەڭىنە ءوتۋ كەرەكتىگىن اتاپ ءوتتى.ەلوردانىڭ سارىارقا اۋدانىندا «بيۋدجەتكە قاتىسۋ» جوباسىن جۇزەگە اسىرۋ وتكەن جىلى باستالىپ، تابىستىلىعىن كورسەتتى. قالا باسشىلىعى تاراپىنان بيىل بۇل جوبانى باس شاھاردىڭ بارلىق اۋداندارىندا قولعا الۋعا تاپسىرما بەرىلدى. وسى باعىتتا سارىارقا اۋدانى تاعى الدا كەلەدى. بىلتىر اتالمىش اۋداندا جوبا اياسىندا 14 اۋلا اباتتاندىرىلسا، وسى جىلى 13 اۋلا كوركەيتىلدى.
كەشە ەلوردادا قالالىق قوعامدىق كەڭەستىڭ باستاماسىمەن «نۇر-سۇلتان قالاسىندا «بيۋدجەتكە قاتىسۋ» جوباسىن جۇزەگە اسىرۋ: جيناقتالعان تاجىريبە مەن بولاشاعى» اتتى «دوڭگەلەك ۇستەل» ءماجىلىسى ءوتتى. باس قالا اۋداندارى اكىمدىكتەرىنىڭ باسشىلىعى، ۇكىمەتتىك ەمەس ۇيىم­دار وكىلدەرى، شاھار تۇرعىندارى قاتىسقان جيىندا كۇن تارتىبىندەگى ماسەلە جان-جاقتى تالقىلاندى.
سارىارقا اۋدانىنىڭ اكىمى ەرعالي ەگەمبەردى جوبانى ىسكە اسىرۋدا اۋدان تاجىريبەسىمەن ءبولىسىپ، وسى جوبا شەڭبەرىندە اباتتاندىرىلعان اۋلالارمەن تانىستىردى.
– اۋلالاردى اباتتاندىرۋ بو­يىنشا تۇرعىنداردان ۇسىنىستار جىلدان-جىلعا كوبەيىپ جاتىر. بىلتىر وسىنداي 22 ۇسىنىس كەلىپ تۇسسە، بيىل 68-گە جەتتى. ءبىز مۇمكىندىگىمىزگە، قارجىنىڭ بولىنۋىنە قاراي سونىڭ ون ءۇشىن تاڭداپ الدىق. بۇل ىستە ەسكەرەتىن ءبىر ماسەلە بار. وتكەن بەس جىلدا اباتتاندىرىلعان اۋلالاردى بۇل جوباعا قوسۋعا بولمايدى. 2019 جىلى ءبىز مۇنى ەسكەرمەدىك. وسى جىلى ەسەپكە الدىق. بىراق كەلەسى كەزەڭدە «بيۋدجەتكە قاتىسۋ» جوباسى اياسىندا اۋلالاردى اباتتاندىرۋمەن شەكتەلمەۋ كەرەك دەپ ەسەپتەيمىن. ەندىگى جىلى حالىقتىڭ تىلەگىمەن جولداردى ورتاشا جوندەۋگە، ايالدامالاردى، باعدارشامدارى ورناتۋعا كوشۋىمىز كەرەك دەپ ەسەپتەيمىن. ءىستى اۋدانداردىڭ اكىمدىكتەرىنە عانا جۇكتەمەي، بۇعان قالا باسقارمالارى دا اتسالىسۋى قاجەت، – دەدى ە.ەگەمبەردى.
قالالىق قوعامدىق كەڭەس توراعاسى سانسىزباي ەسىلوۆ جوبالاردى جۇزەگە اسىرۋدا اشىقتىقتى قامتاماسىز ەتۋ كەرەكتىگىنە نازار اۋداردى. ونىڭ پىكىرىنشە، مەردىگەرلەرمەن تىكەلەي قارىم-قاتىناستى دا مەيلىنشە ازايتۋ كەرەك. ول بۇل باعىتتا تسيفرلاندىرۋ جۇيەسىن قولدانۋعا بولادى دەپ ەسەپتەيدى. ارينە، ءار ءىستى باسىنان اياعىنا دەيىن باقىلاۋعا تۇرعىندار تارتىلۋى قاجەت.
وتكەن جىلى سارىارقا اۋدانىندا «سيتي مەنەدجەر» جوباسى دا ىسكە اسىرىلدى. بۇل جوبانى ونىڭ جەتەكشىسى ماكسيم نيكولايچۋك تانىستىردى. ونىڭ ايتۋىنشا، جوبا اكىمدىك پەن قاراپايىم حالىق اراسىندا كوپىر ورناتۋعا نەگىزدەلگەن.
– جوبانى باستاعاندا تۇرعىندار تىلەكتەرىن، ۇسىنىستارىن جيناقتاپ، اۋدان اكىمدىگىنە جەتكىزدىك. سونداي-اق، حالىق اراسىندا ءتۇسىندىرۋ جۇمىستارىن جۇرگىزدىك. ماسەلەن، كوپ ادام «اشىق اكىمدىك» پلاتفورماسى بارىنان حابارسىز بولدى. سونداي ادامدارعا بۇل الاڭ ارقىلى دا اكىمدىكپەن قارىم-قاتىناس جۇرگىزۋگە بولاتىنىن ايتتىق. ياعني بەلگىلى ءبىر ماسەلەنى شەشۋ ءۇشىن تانىستاردى سالۋدىڭ، اقشا بەرۋدىڭ قاجەتسىزدىگىن تۇسىندىردىك. «بيۋدجەتكە قاتىسۋ» جوباسىنىڭ جۇزەگە اسىرىلۋىنا دا اتسالىستىق. مۇنى باقىلاۋدا ۇستادىق. راس، تۇرعىندار بۇل جوبانىڭ جۇزەگە اساتىنىنا باستاپقىدا سەنبەدى. كەيىن بوس ءسوز ەمەس ەكەندىگىنە كوزدەرى جەتتى، – دەدى م.نيكولايچۋك.
قالالىق قوعامدىق كەڭەس «بيۋدجەتكە قاتىسۋ» جوباسىنىڭ جۇزەگە اسىرىلۋىنا مونيتورينگ جۇرگىزگەن. سونىڭ قورىتىندىلارىمەن كەڭەس مۇشەسى التىناي نۇركەەۆا تانىستىردى. ونىڭ مالىمەتىنشە، الەمدە بيۋدجەتتىڭ اشىقتىعىن ەسەپتەۋ يندەكسى بار. ول ءار ەكى جىل سايىن ەسەپتەلەدى. بۇل كورسەتكىش بويىنشا قازاقستان كەيىنگى ەسەپتەۋ­گە سايكەس 58 ۇپاي العان. ەكى جىل بۇرىن ەلىمىزدە اتالعان يندەكستە 53 ۇپاي بولعان ەدى.
– ءبىز «بيۋدجەتكە قاتىسۋ» جوباسى قالاي جۇزەگە اسىرىلىپ جاتقانىن ءبىلۋ ءۇشىن اۋدانداردىڭ اكىمدىكتەرىنە سۇرانىس حات جىبەردىك. الماتى اۋدانىندا 14 جوبادان بيىل 2 جوبا عانا ىسكە اسىرىلىپ جاتىر. قارجىلاندىرۋ جاعىنان ەش جەردە اقپارات جاريالانباعان. بايقوڭىر اۋدانىندا دا وسىنداي جاعداي. ەسىل اۋدانىندا 8 جوبا قولعا الىنعان. ءتيىستى اقپارات اكىمدىك سايتىندا جاريالانعان. بىراق ونى تابۋ قيىن. وتىنىشتەردى قابىلداۋ مەرزىمى 24 ءساۋىر-1 مامىر دەپ كورسەتىلگەن. ياعني وتە از ۋاقىت بەرىلگەن. سارىارقا اۋدانى 13 جوبانى جۇزەگە اسىرۋعا 200 ميلليون تەڭگە بولىنگەنىن كورسەتتى. اكىمدىك سايتىندا بۇل تۋرالى جان-جاقتى اقپارات ورنالاستىرىلعان. بىراق «بيۋدجەتكە قاتىسۋ» جوباسى بويىنشا قالا تۇرعىندارى ءبىلۋى ءتيىس اقپاراتتىڭ ءالى دە ازدىعى بايقالادى، – دەدى ا.نۇركەەۆا.
قوعامدىق كەڭەس مۇشەسى ­مارات مۇستافين شەتكى ايماقتاردى اباتتاندىرۋعا نازار اۋداردى. بۇل ىستە «جاستار» شاعىن اۋدانىن كوركەيتۋ ءىسىن مىسال رەتىندە كەلتىردى. ونىڭ ايتۋىنشا، وسى ماڭايدىڭ تۇرعىندارى وتە بەلسەندى. سوڭعى جىلدارى شاعىن اۋداندا اتقارىلعان جۇمىستاردىڭ ارقاسىندا اۋماق تانىماستاي بولىپ وزگەردى.

پىكىر جازۋ

پوچتاڭىز جاريالانبايدى

seventeen − ten =