БЮДЖЕТКЕ ӨЗГЕРІСТЕР ЕНГІЗІЛДІ

0 117

ZAH_4566

Қалалық мәслихаттың кезекті отыз екінші сессиясына Астана әкімі Иманғали Тасмағамбетов пен оның орынбасарлары, аудан әкімдері, ведомство басшылары мен бұқаралық ақпарат құралдарының өкілдері қатысты.

Күн тәртібіндегі алғашқы мәселе бойынша қалалық сайлау комиссиясының төрағасы М.Әубәкіров сөз сөйлеп, Астана қаласының №2 сайлау округі бойынша қалалық мәслихаттың депутаты болып елордадағы №59 мектеп-лицейдің директоры, «Нұр Отан» партиясының мүшесі Зәуре Жүсіпованың сайланғанын жеткізді. Сайлаушылардың 85 пайыз дауысымен жеңіске жеткен Зәуре Ғинаятқызы өзіне ғана емес, барша елорда ұстаз­дарына артылған зор сенімді ақтау үшін бар күш-жігері мен білімін, білі­гін жұмсайтынын айта отырып, сайлау барысында өзін қолдағандарға алғысын білдірді.

Одан әрі Астана қаласындағы Экономика және бюджеттік жос­парлау басқармасының бастығы Ж.Нұрпейісов «Астана қаласының 2014-2016 жылдарға арналған бюджеті туралы» Астана қаласы мәслихатының 2013 жылғы 13 жел­тоқсандағы № 194/28-V шешіміне өзгерістер мен толықтырулар енгізу туралы баяндай келе, «2013-2015 жылдарға арналған республикалық бюджет туралы» Қазақстан Респуб­ликасының Заңына өзгерістер мен толықтырулар енгізу туралы» 2014 жылғы 31 наурыздағы №182-V Қа­зақстан Республикасының За­ңына сәйкес, Астана қаласының бюд­жетіне республикалық бюджеттен 20 936 582 мың теңге сомасында трансферттер қарастырылғанын және қайта бөлінгенін жеткізді. Сондай-ақ, Қазақстан Республикасы Президентінің тапсырмасына сәйкес, 2014 жылдың 1 сәуірінен бастап азаматтық қызметшілердің еңбекақысын лауазымдық жалақы­сына 10 пайызға, атаулы әлеуметтік көмек мөлшерін 12 пайызға, мемле­кеттік білім беру тапсырысы шегінде оқытылатын студенттерге шәкіртақы мөлшерін 10 пайызға көтеру мақса­тында республикалық бюджеттен 1 354 432 мың теңге сомасында трансферттер қарастырылды. Оның айтуынша, қала бюджеті жеке кірістер бойынша биылғы қаңтар-наурыз айларында есепті кезең жоспарынан 105,9 пайызға орындалды немесе бюджетке 33 993 841,0 мың теңге түсіп, өткен жылдың тиісті кезеңімен салыстырғанда түсімдер 4 488 956,0 мың теңгеге ұлғайған.

Сессия барысында Астана қаласы әкімдігінің жанындағы мемлекеттік рәміздер жөніндегі комиссияның құрамы өзгертіліп, Астана қаласы мәслихатының 2013 жылғы 10 қыр­күйектегі «Астана қаласында жер учаскелерін беру жөніндегі комис­сияның құрамы туралы» шешіміне толықтырулар енгізілді.

Гүлбаршын ӨКЕШҚЫЗЫ

 

Пікір жазу

Почтаңыз жарияланбайды

5 + one =