Болашақ — біздің қолымызда

Кеше «Жас Отан» жастар қанаты Астана қалалық филиалының ұйымдастыруымен елордадағы жұмыскер жастардың «Болашақ – біздің қолымызда» атты форумы өтті. Оған Парламент Мәжілісінің депутаты Майра Айсина, Астана қаласы мәслихатының хатшысы Сансызбай Есілов, «Нұр Отан» ХДП елордалық филиалы төрағасының орынбасары Мейрамбай Оралов және жастар қатысты.

Елбасы Нұрсұлтан Назарбаевтың Қазақ­стан хал­қына арнаған биыл­ғы­ Жолдауын насихаттап, ұлт Көш­­­­бас­­шы­сы­ның­ ал­ға қой­ған­ мін­­дет­те­рі­ мен­ басымдықтарына жас­­тарды жұмылдыруды мақсат ет­кен басқосу «Face of face» – «бет­пе-бет»­ қағидатымен жүргі­зіл­ді. Бұл форумға қа­ты­сушыларды сенімділік пен серпінділікке ша­қырды.

Жиында Астана қаласы Жастар саясаты­ мә­селелері басқармасының бастығы Талғат Рах­ман­берді сөз сөйледі. Ол басқарма жұмысының жас­тар мәселесін шешудегі маңы­зын, тек бо­лашақ мамандардың мүд­де­сіне қызмет ететіндерін жет­кізді. «Бүгінгі жоғары оқу орын­дарын бітірген түлектердің сек­сен пайызы гуманитарлық мамандықтарды тәмамдаған екен. Ал,­ Президентіміз соңғы кездері кәсіби кадрлар даярлауға қатты көңіл бөліп жатқанынан хабардармыз. Астанада да құрылыс қарқыны толастаған жоқ. Яғни, техникалық, инженерлік мамандықтарды игеруге жастарды шақыру қажет. Басқарма осы бағытта және жас­тардың проблемаларын шешуде жұмыс жасайды деп сендіремін» деді Талғат Рахманберді.

Басқосуда Лондон Олимпиа­дасының чемпионы Серік Сәпиев­тің «Денсаулық, салауатты өмір салты – болашақтың кепілі» атты баяндамасы тыңдалды. Содан кейін, бірқатар мекемелер мен ұйымдар өкілдері сөз сөйледі. «Еркін микрофон» алаңы арқылы залдағы жастар ұсыныс-пікірлерін білдіріп, ойларын ортаға салды. Бүгінгі буынның алдындағы түйткілді мәселелерді де әңгіме етті.

Форум соңында астаналық жұмыскер жас­­тар­­дың­ Қазақстан азаматтарына үндеуі оқылды. «Біздің әрқайсысымыз қол жеткізген жетіс­тіктерімізді бағалап, азаттығымызды қадірлеуге тиіспіз. Ел тәуелсіздігі әркімнің еншісіне түсе бер­мейтін аса қадірлі бостандықтың сино­ни­­­мі.­ Ал­дымызда қанша қиындықтар күтіп тұрса да, олардан сүрінбей өтіп, келешегі зор, ұрпағы бәсеке­лестікке қабілетті мемлекетті сақ­тап қалу біздің қастерлі борышы­мыз, ең басты мақсатымыз» деген жастар үндеуде отандастарын Қазақстанның жарқын болашағын қалыптастыруда күш-жігерімізді бірлесіп жұмсауға шақырады.

Асхат РАЙҚҰЛ