ءبىلىم بەرۋدىڭ بەلەستەرى

0 129

DETAIL_PICTURE__93459877

استانا قالاسى ءماسليحاتىنىڭ زاڭدىلىق، قۇقىق ءتارتىبى جانە جۇرتشىلىقپەن جۇمىس ماسەلەلەرى جونىندەگى تۇراقتى كوميسسياسىنىڭ وتىرىسى ءوتتى. وندا قالالىق ءبىلىم باسقاراماسىنىڭ باسشىسى ەلميرا سۋحانبەرديەۆا بالالاردىڭ زاڭدى مۇددەلەرىن قورعاۋ جانە قۇقىقتارىن ساقتاۋ بارىسىندا اتقارىلعان جۇمىستاردىڭ بارىسىمەن تانىستىردى.

ءبىلىم باسقاراماسى جاسوسپىرىمدەردىڭ قۇقىقتارىن قورعاۋ، ولاردىڭ الاڭسىز وسۋىنە قولايلى جاعداي تۋعىزىپ، الەۋمەتتىك جەتىمدىك پەن زورلىق-زومبىلىقتىڭ الدىن الۋ ءۇشىن كەشەندى جۇمىستار جۇرگىزۋدە. بۇگىندە ەلوردادا 292 ءبىلىم بەرۋ مەكەمەسى بار، ونىڭ ىشىندە 173 مەكتەپ جاسىنا دەيىنگى سابيلەرگە ارنالعان. ورتا مەكتەپتەردىڭ سانى – 84 بولسا، 35 وقۋ ورنى تەحنيكالىق-كاسىپتىك ءبىلىم بەرۋگە باعىتتالعان. ۇزىن سانى 33 164 بالدىرعان بالا باقشالارعا بارىپ، 94 712 وقۋشى مەكتەپتە ءبىلىم الادى. استانالىق 29 859 ءجاسوسپىرىم تەحنيكالىق-كاسىپتىك ءبىلىم الىپ جاتىر. بيىلعى جىلدىڭ ساۋىرىنەن باستاپ، وقۋشىلاردىڭ 79,5 پايىزىنا ىستىق تاعام بەرىلەتىن بولدى. ال 20,5 پايىزى بۋفەتتەن تاماقتانادى. وقۋشىلاردىڭ جالپى سانىنىڭ 65 پايىزىنىڭ، ياعني، الەۋمەتتىك جاعدايى تومەن وتباسىلاردان شىققان بالالاردىڭ تەگىن تاماقتانۋىنا تولىق جاعداي جاسالعان. ول ءۇشىن 2 ملرد 024 ملن 614 مىڭ تەڭگە جەرگىلىكتى بيۋدجەتتەن ءبولىنىپتى.

ينكليۋزيۆتى ءبىلىم بەرۋ جۇيەسىن دامىتۋدا ەلوردانىڭ وقۋ ورىندارىنىڭ ۇزدىك تاجريبەسىن ايتۋعا بولادى. جىل سايىن وسى ماقساتتاعى مەكتەپتەردىڭ سانى ارتىپ كەلەدى، قالاداعى 47 مەكتەپتە مۇمكىندىگى شەكتەۋلى بالاردىڭ ءبىلىم الۋىنا مۇمكىندىك جاسالىپ، ءجۇز پايىز قامتىلىپ وتىر.

وقۋشىلاردىڭ جازعى دەمالىسىن ۇتىمدى ۇيىمداستىرۋ ماقساتىندا جەرگىلىكتى بيۋدجەتتەن 220 ملن 778 مىڭ تەڭگە بولىنگەن.

جاسوسپىرىمدەر مەن سابيلەردىڭ قۇقىقتارىن ءتۇسىندىرۋ جۇمىستارى دا جولعا قويىلىپ، ولاردىڭ قۇقىقتىق مادەنيەتىن تاربيەلەۋگە ارنالعان ءتۇرلى شارالار جۇيەلى تۇردە وتكىزىلۋدە.

– مەملەكەت قامقورلىعىنان، قوعام يگىلىكتەرىنەن تىس قالعان ءبىر بالانىڭ دا جوق ەكەنىن ايتا الامىن. جىل سايىن وتەتىن «مەكتەپكە جول» جانە «قامقورلىق» اكتسيالارى وسى تۇرعىداعى جۇمىسىمىزدى جانداندىرادى. بۇگىندە 23 245 وقۋشى ورنى تاپشىلىعى بار. دەگەنمەن،سالىنىپ جاتقان 8 مەكتەپ پەن ءبىر كوللەدجدىڭ قۇرىلىسى بۇل ماسەلەلەردىڭ ءتۇيىنىن تارقاتادى – دەدى ەلۆيرا امانگەلدىقىزى.

ايگۇل ۋايسوۆا

پىكىر جازۋ

پوچتاڭىز جاريالانبايدى

3 × 4 =