ءبىلىم بەرۋ ۇدەرىسى ۇزىلمەيدى

0 82

نۇر-سۇلتان قالالىق ءبىلىم باسقارماسىنىڭ باسشىسى شولپان قادىروۆا مەكتەپكە دەيىنگى ءبىلىم بەرۋ ۇيىمدارىنىڭ، ورتا جانە ارناۋ­لى ورتا ءبىلىم مەن قوسىمشا ءبىلىم بەرۋ ۇيىمدارىنىڭ كارانتين كەزىندەگى جۇمىس بارىسىن بايان ەتتى.ەلورداداعى 117 مەكتەپتە وقيتىن 182279 بالا بۇگىندە تۇگەلدەي قاشىقتان وقۋمەن قامتىلعان. ونىڭ ىشىندە 91 مەملەكەتتىك، 22 جەكەمەنشىك مەكتەپ، 1 رەسپۋبليكالىق فيزيكا-ماتەماتيكا مەكتەبى جانە 3 نازارباەۆ زياتكەرلىك مەكتەبى بار. وسى ءبىلىم بەرۋ ورىندارىندا 10302 پەداگوگ جۇمىس جاسايدى. ءبىلىم بەرۋ ۇدەرىسىندە قاشىقتان وقىتۋ تەحنولوگيالارىن قولدانۋ بويىنشا مۇعالىمدەردىڭ بارلىعى دا ارنايى كۋرستان ءوتتى. سونىمەن قاتار www.academia.kz سايتىندا پەداگوگيكالىق شەبەرلىكتىڭ ۆيرتۋالدى زەرتحاناسى ارقىلى ونلاين-كۋرس ۇيىمداستىرىلدى.
وقۋشىلار ونلاين رەجيمدە Google Classroom, Microsoft Teams, Google meet, Hangouts Meet, Zoom سياقتى قولجەتىمدى پلاتفورمالاردا ءبىلىم السا، كەي وقۋشى وفلاين تۇردە Kundelik, Daryn Online, Bilimland, WhatsApp, Telegram, Google Disc, ەلەكتروندىق پوشتا ارقىلى ساباق وقىدى.
«بالاپان»، «ەلارنا» تەلەارنالارىنىڭ بەينەساباقتارى ەلوردانىڭ عانا ەمەس، ەلىمىزدىڭ تۇكپىر-تۇكپىرىندەگى بالالارعا ادىستەمەلىك كومەك بولعانىن مىسالعا العان باسقارما باسشىسى قاشىقتان وقىتۋ كەزىندە قولداۋ كورسەتۋ ءۇشىن 6 قىزمەتكەردەن تۇراتىن call-ورتالىق جۇمىس ىستەپ تۇرعانىن، سونداي-اق ءار مەكتەپتە جوبالىق كەڭسەلەر جۇمىس ىستەيتىنىن دە ايتىپ ءوتتى.
قاشىقتان وقىتۋدا وقۋشى مەن ۇستازعا كەدەرگى كەلتىرىپ جاتقان جايلار دا رەتكە كەلتىرىلدى. قالا بويىنشا مەكتەپ بالانسىنداعى 7118 كومپيۋتەر 6500 وقۋشىعا، 618 مۇعالىمگە ۋاقىتشا پايدالانۋعا بەرىلگەن.

شولپان قادىروۆا، نۇر-سۇلتان قالالىق ءبىلىم باسقارماسىنىڭ باسشىسى:

– ءبىلىم باسقارماسىنىڭ call-ورتالىعىنا ءبىلىم بەرۋ ماسەلەلەرى بويىنشا 520 ءوتىنىش ءتۇستى، ونىڭ ىشىندە قاشىقتان وقىتۋ جونىندە 177 ءوتىنىش-ساۋال بار. اسىرەسە، ينتەرنەت جىلدامدىعىنىڭ تومەندىگى، تەحنيكالىق قىزمەت كورسەتۋ جانە 111 ءوتىنىش كەڭەس بەرۋ سيپاتىنداعى ماسەلەلەر، قاشىقتان وقىتۋدى ساپالى ۇيىمداستىرعانى ءۇشىن پەداگوگتارعا العىس ايتقان 66 حات كەلدى. سونداي-اق قر ءبىلىم جانە عىلىم مينيسترلىگىنىڭ فرونت-كەڭسەسىنە 2 شاعىم ءتۇستى. ونىڭ ءبىرى جەكەمەنشىك كوللەدجدەگى ەڭبەكاقى ماسەلەسى بولسا، ەكىنشى شاعىم №19 مەكتەپتەن «Kundelik» جۇيەسى بويىنشا كەلگەن. ماسەلەلەر قارالىپ، شەشىمىن تابۋدا.

جالپى، جەرگىلىكتى بيۋدجەت ەسەبىنەن كومپيۋتەرسىز وتىرعان وقۋشىلارعا تەحنيكا 100 پايىز جەتكىزىلدى. باسقارما باسشىسىنىڭ ايتۋىنشا، 529 ملن تەڭگەگە 2613 كومپيۋتەر، 218 ملن تەڭگەگە ينتەرنەتپەن قامتاماسىز ەتۋ ءۇشىن 5200 فلەش-كارتا الىنعان. بۇل قاراجات 1-4-سىنىپتاردىڭ تاماقتانۋىن ۇيىمداستىرۋعا ۇنەمدەۋ ەسەبىنەن پايدالانىلدى، سونداي-اق قالعان قارجى – 600 ملن تەڭگە بەينەباقىلاۋدى قامتاماسىز ەتۋگە باعىتتالعان.
بۇگىننەن باستاپ مەكتەپ وقۋشىلارى ءۇشىن ءبولىم بويىنشا جيىنتىق باعالاۋ باستالدى (بجب). اپتاسىنا ەكى ساعات جانە ودان دا كوپ جۇكتەمەمەن وقۋ پاندەرى بويىنشا بولىمدىك جيىنتىق باعالاۋ 11 مامىرعا دەيىن وتەدى.
توقسان بويىنشا جيىنتىق باعالاۋ 1 رەت 18-22 مامىر ارالىعىندا وتكىزىلەدى. 1-4-سىنىپ وقۋشىلارى ءۇشىن بجب جانە تجب وتكىزۋ ۋاقىتى شەكتەلمەيدى. بولىمدىك تە، توقساندىق تا جيىنتىق باعالاۋ ءبىر كۇندە ءۇش جيىنتىق جۇمىستان اسپاۋى ءتيىس. ايتا كەتەيىك، ءبىلىم ءمينيسترىنىڭ بۇيرىعىنا سايكەس، اعىمداعى جىلى قورىتىندى اتتەستاتتاۋ بولمايدى. قورىتىندى باعالار جىلدىق ناتيجەلەر بويىنشا قويىلادى.
بۇگىندە 4 مامىردان باستاپ كەيبىر جۇمىس ورىندارى ىسكە قوسىلدى. بالاباقشا قاجەتتىلىگى دە سەزىلۋى مۇمكىن. ال قازىر 18 ناۋرىزدان باستاپ بارلىق مەكتەپكە دەيىنگى ءبىلىم بەرۋ ۇيىمدارى ۋاقىتشا دەمالىستا. سول سەبەپتى ەلوردادا بالاباقشاعا باراتىن 55708 بالا ۇيدە وتىر. قالاداعى 377 مەكتەپكە دەيىنگى ۇيىمنىڭ 94-ءى – مەملەكەتتىك، 237-ءسى جەكەمەنشىك بالاباقشا بولسا، ورتا ءبىلىم بەرۋ ۇيىمدارىنىڭ مەكتەپالدى سىنىپتارىندا 3485 بالا وقيدى. الايدا مەكتەپكە دەيىنگى ۇيىمداردىڭ قىزمەتى توتەنشە جاعداي رەجيمى اياقتالعانعا دەيىن توقتاپ تۇر. باسقارما باسشىسى كۇشەيتىلگەن رەجيم سايابىرسىعانمەن، بالاباقشا جۇمىسى مەن تاربيەشىلەردىڭ قىزمەتىنە قاشان كىرىسەتىنىن ۋاقىت كورسەتەتىنىن ايتتى.
ادەتتە مامىر ايىنىڭ اياعى – 5 جاسقا تولعان تاربيەلەنۋشىلەردىڭ بالاباقشامەن قوشتاسۋ ءداستۇرى. بيىلعى بالالار سۇيىكتى بالاباقشالارىمەن ۇيىندە وتىرىپ-اق قوشتاسادى.
ال ازىرگە باسقارما مەكتەپكە دەيىنگى ۇيىم­دارداعى بوساعان ورىندار مەن تۇلەكتەردىڭ سانىنا مونيتورينگ جۇرگىزۋدە. بالاباقشا كەزەگىندەگى بالالاردى شاقىرۋ مەرزىمى تۋرالى شەشىم توتەنشە جاعداي رەجيمى الىنعاننان كەيىن قابىلدانادى.
ءساۋىر ايىنىڭ باسىندا قوسىمشا ءبىلىم بەرۋ ۇيىمدارى دا قاشىقتان ءوز جۇمىستارىن باستادى. وسى ماقساتتا جالپى ءبىلىم بەرۋ مەكتەپتەرى، كوللەدجدەر، قوسىمشا ءبىلىم بەرۋ ۇيىمدارىنىڭ سايتتارىندا الدىن الا دايىندالعان تاقىرىپتىق بەينەسيۋجەتتەر، ونلاين-سايىستار، شەبەرلىك سىنىپتار، چەللەندجدەر، بەينەساباقتار، ونلاين-ەكسكۋرسيالار ورنالاستىرىلعان، «قاشىقتان وقىتۋ» رۋبريكاسى اشىلعان.
6-30 ءساۋىر ارالىعىندا 29865 ساباق وتكىزىلگەن. اتا-انالاردى كۇپتى قىلعان ساۋال – قاشىقتان وقىتۋ كەزىندە قوسىمشا ءبىلىم بەرۋ قىزمەتتەرىنىڭ قۇنى. ەلوردانىڭ قوسىمشا ءبىلىم بەرۋ ۇيىمدارى قىزمەتتەرىنىڭ قۇنى قالا اكىمدىگىنىڭ شەشىمىمەن بەكىتىلەدى. وسىعان بايلانىستى ءۇيىر­مەلەردىڭ تولەماقىسىندا ازىرگە وزگەرىس بولمايدى.
– سونداي-اق قازىرگى كەزدە مۋزىكالىق مەكتەپ تۇلەكتەرىنىڭ اتا-انالارى، مەملەكەتتىك ەمتيحاندار قانداي نىساندا وتەدى، بالالار مەكتەپ ءبىتىرۋ سەرتيفيكاتتارىن ۋاقىتىلى الا ما دەپ الاڭداۋشىلىق بىلدىرۋدە. ەگەر توتەنشە جاعداي الىنىپ تاس­تالسا، ەمتيحاندار جوسپارلى تۇردە وتكىزىلەدى. ەگەر كارانتين ۇزارتىلسا، وندا قوسىمشا ءبىلىم بەرۋ ۇيىمدارى ءار ماماندىقتىڭ ەرەكشەلىكتەرىن ەسكەرە وتىرىپ، ونلاين-ەمتيحانداردى ۇيىمداستىرۋعا ءماجبۇر بولادى، – دەدى شولپان ماراتقىزى.
باسقارما باسشىسى وقۋشىلاردىڭ جازعى دەمالىسىن ۇيىمداستىرۋ بويىنشا، توتەنشە جاعدايدىڭ رەجيمى توقتاتىلعان جاعدايدا 1-4-سىنىپ وقۋشىلارىنا ارنالعان مەكتەپ جانىنداعى لاگەرلەردىڭ جۇمىسىن ۇيىمداستىرۋ جوسپارلاناتىنىن دا ايتىپ ءوتتى. 5-9-سىنىپ وقۋشىلارى ءۇشىن وقۋشىلار سارايىنداعى جازعى دەمالىس اكادەمياسى، «ديدارلى جاز» سپورتتىق ويىندارى مەن سپورت الاڭدارى ۇيىمداستىرىلماق.

پىكىر جازۋ

پوچتاڭىز جاريالانبايدى

16 − sixteen =