باۋىرلاس ەلدەر – ستراتەگيالىق سەرىكتەستەر

0 72

قازاقستان پرەزيدەنتى ­قاسىم­-جومارت­ توقاەۆ وزبەكستان رەسپۋبليكاسىنا مەملەكەتتىك ساپارمەن باردى.

 

ساپار اياسىندا قاسىم-جومارت توقاەۆ الدىمەن وزبەكستان رەسپۋبليكاسىنىڭ پرەزيدەنتى شاۆكات ميرزيوەۆپەن شاعىن قۇرامدا كەلىسسوز وتكىزدى. كەزدەسۋ كەزىندە وزبەكستان باسشىسى قاسىم-جومارت توقاەۆتى قازاقستان رەسپۋبليكاسىنىڭ پرەزيدەنتى لاۋازىمىنا كىرىسۋىمەن قۇتتىقتاپ، ونىڭ قازاقستاننىڭ قازىرگى زامانعى دامۋىنا جانە شەت مەملەكەتتەرمەن كوپجاقتى بايلانىستارىنا لايىقتى ۇلەس قوسقان حالىق­ارالىق اۋقىمداعى ساياساتكەر جانە مەملەكەتتىك قايراتكەر رەتىندەگى مول تاجىريبەسىن اتاپ ءوتتى.
قوس مەملەكەت باسشىلارى قازاقستان رەس­پۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ ەكى ەل اراسىنداعى باۋىرلاستىق بايلانىستار مەن ستراتەگيالىق سەرىكتەستىكتى، ونىڭ ىشىندە ورتالىق ازياداعى بەيبىتشىلىكتى، تۇراقتىلىق پەن قاۋىپسىزدىكتى قامتاماسىز ەتۋدەگى ىنتىماقتاستىقتى دامىتۋعا قوسقان كورنەكتى ءرولىن ايرىقشا اتادى.
كەلىسسوزدەر بارىسىندا پرەزيدەنتتەر ءداستۇرلى دوستىق، ءوزارا سىيلاستىق، سەنىم مەن اشىق رۋحتا ەكى جاقتى قاتىناستاردىڭ نەگىزگى ماسەلەلەرىن، ءوزارا مۇددەلىلىك تانىتىلعان وزەكتى وڭىرلىك جانە حالىقارالىق پروبلەمالاردى ءسوز ەتىپ، ەكى ەل اراسىنداعى كەڭفورماتتى ىنتىماقتاستىقتى ودان ءارى تەرەڭدەتۋ مەن كەڭەيتۋدىڭ پەرسپەكتيۆالارىن تالقىلادى.
تاراپتار 2018 جىلى قازاقستانداعى وزبەكستان جىلىنىڭ ءساتتى وتكىزىلۋىن جانە 2019 جىلعى 15 ساۋىردەگى وزبەكستانداعى قازاقستان جىلىنىڭ سالتاناتتى اشىلۋىنا ريزاشىلىقتارىن ءبىلدىردى. مۇنداي ءىس-شارالار قازاق جانە وزبەك حالىقتارىنىڭ باۋىرلاستىعى مەن رۋحاني تۋىستىعىنىڭ، ەكى ەلدىڭ شىنايى دوستىعى مەن تاعدىرلارىنىڭ اجىراماس جاقىندىعىنىڭ نىشانى بولىپ تابىلاتىنىن، سونداي-اق حالىقتار اراسىنداعى تاتۋ كورشىلىك قاتىناستارىن نىعايتۋعا، ءوزارا تۇسىنىستىك پەن سەنىمدى، كورشىلىك قولداۋدى تەرەڭدەتۋگە جاردەمدەسەتىنىن اتاپ ءوتتى.

پىكىر جازۋ

پوچتاڭىز جاريالانبايدى

11 + 3 =