Бас шаһардың болашағы баянды

0 139

IMG_9787

МӘДЕНИЕТІМІЗДІҢ МӘУЕЛІ ОРДАСЫ

IMG_6510

Астана – мәдениет пен өнердің ай­шығы. Астана – барлық қазақстан­дық­тардың үлгі тұтар шаһары. Астана – руханияттың ордасы.

Әр күн сайын өтіп жатқан мәдени шаралар елордалықтардың көз қуаны­шына айналуда. Сахна тағы­лы­мын қалаға табан тіреген қай қонақ та сезініп қайтады. Өйткені, театрлардан басқа да өнер ұжымдарының, ойын-сауық орталықтарының думанды күндері жиілеп келеді. Мұндай дәстүрдің қалыптасуына мәдени нысандардың қатары артуы да сеп­­тесті деп ойлаймын. Мәселен, Бей­­біт­­шілік және келісім сарайы, «Қазақстан» орталық концерт залы, «Тәуелсіздік» сарайы… төрлері көрер­меннен босамайтын орындар екені рас.

Былтыр ғана пайдалануға берілген «Астана Опера» театрының әлемде айтарлықтай орны бар. Мұндағы өнер ұжымының қойылымдары ше, кім-кімнің де ықыласын оятып, қошеметіне бөленеріне сенімдімін. Басқа да ірге қалаған нысандар көп ұзамай өнер мен мәдениетті, руханиятты жандандыра түсері тағы сөзсіз.

Астана басшылығының өнер мен мәдениетке деген қамқорлығы да ауыз толтырып айтарлықтай. Бұл сөзіме елордалық театр жетекшілерінің жақында ғана Еуропа елдеріне сапары дәлел болады. Біз батысқа сапар барысында көп нәрсені көңілге түйдік. Олардан артық тұстарымыз да жетерлік, кемшіліктеріміз де бар екеніне көз жеткіздік. Яғни, олардың бізден, біздің олардан үйренер үрдістеріміз көп екен. Осы ойды жүзеге асырмақ ниетпен Миландағы әріптестеріммен – Қуыршақ театрымен шығармашылық байланыс және ынтымақтастық жөніндегі келісімге қол жеткізгенімізді мақтанышпен айтамын. Осындай ілгері қадамдарымыз жиілей берсе, алар асуымыз бен белесіміз де арта береді. Әлем мәдениетімен иық тіресер күн де таяу.

Тоғжан ХАСАНҒАЛИЕВА,
Қуыршақ театрының директоры

БАЛА ҚАМЫН БАПТАҒАН

IMG_4376

Астана тұрғындарының қатары жыл өткен сайын қарқын­дап өсіп отыр. Осыған орай, балаларды балабақша және мектеппен қамту да қала тіршілігінің өзекті мәселесіне айналған.

Дәл осы мәселеге Елбасымыз Нұрсұлтан Назарбаев ерекше маңыз беретінін білеміз. Жыл сайын қала активімен өткізетін жиын­да осы жағдайға байланысты тапсырмалар береді. Осы ретте қала басшылығы бала­бақша және мектеп құры­лыс­та­рын жүргізуді басымды бағыт ретінде ұстанып отырғаны байқалады. Мәселен, былтырғы жылдың өзінде 8 балабақша пай­­да­лануға берілген екен. Ал, қазіргі таңда 17 балабақшаның құрылыс жұмыстары жүргізіліп жатыр. Тағы да 3 мектепке дейінгі мекеме құрылысы бас­тал­мақ.

Ал, енді мектеп мәселесін айтатын болсақ, соңғы мәліметтер бойынша бүгінде елордамызда 95 мыңға жуық оқушы бар. Олар 83 жалпы білім беретін мектептерде білім алып жүр. Қала бойынша бірнеше жыл бұрын мектепте орын жетіспеушілік проблемасы болғанын жоққа шығара алмай­мыз. Мемлекет басшысы осы орайда мектептерде үш ауы­сым­дық оқытуды қысқарту жөнінде нақты тапсырма жүк­те­ген болатын. Бүгінде қала бойынша бұл мәселе де шеші­мін тауып келе жатқандай. Мәсе­лен, өткен жылы қалада 3 мек­теп пайдалануға берілсе, биыл жазда 9 мектеп құрылысы аяқ­та­ла­тын болыпты. Ал, келесі жылы тағы да 3 мектеп салын­бақ. Осы нысандардың бәрі жүзеге асқанда Астанада үш ауы­сым­дық оқыту проблемасы тұтас­тай шешілмек.

Түптеп айтқанда, елордамызда балабақшалар мен мектептер құрылысы қарқынды жүргізілуде. Бұл өте құптарлық әрі қуанарлық жағдай дер едім.

Оспан СҮЛЕЙМЕНОВ,
ҚР білім беру ісінің үздігі, «Құрмет» орденінің иегері

 

КӨРІКТІ ЖЕРЛЕР КӨБЕЙДІ

IMG_0277

Қала тұрғындарының тіршілік ортасына қолайлы жағдайлар жасауда бірталай шаруа атқарылуда. Жаңа астананы жасыл желекке орап, көркін арттыру мәселелері үнемі қала әкімінің назарында ұстауы маңызды мәселенің шеші­міне әсер ететіні анық.

Мен – елорданың Алматы ауда­ны­ның тұрғынымын. Сүйікті қала­мызда, өз ауданымда болып жатқан жаңа­лық­тарға құлағымды түріп жүремін. Әсіресе, көгалдандыру мәсе­лелеріне жақсы қанықпын. Отыр­ғы­зыл­ған әрбір талдың, гүлдің бір шоғы қаламыздың «өкпесі» әрі қала тұрғындарының денсаулығына мол пайдасы барын түсінемін. Білуімше, ауданымыздағы аулалардың ұзын саны 560-тан асады. Олардың дені жыл сайын абаттандырылып, өз кезе­гі­мен жеңіл-желпі жөндеу жүр­гі­зіліп тұрады.

Бақтар мен саябақтардың көркін ендіріп, абаттандырылған сайын бос уақытымыз бен демалысымызды сонда өткізуге тырысамыз. Өткен жылдың ішінде кіші сәулет нысандары орнатылып, желегі майысқан, гүлі жайнаған 8 шағын бақ пайдалануға берілді. Бүгінгі таңда ауданда 500 гектарды құрайтын 35 шағын бақ пен 5 саябақ бар. Осы көктемде 20 мың шаршы метрден аса аумақта гүлзарлар бапталып, 61 мың шаршы метрден аса аумаққа гүл отырғызу көзделіп отыр екен.

Демек, көрікті көшелер мен жанға сая бақтарымыз қала тұрғындарын қуантып, жақсы демалыстың лайық­ты орнына айналады.

Сейсен БЕКБАЕВ,
Алматы ауданының тұрғыны

ҚАЛА ТЫНЫШТЫҒЫ ҚАДАҒАЛАУДА

ZAH_5426

Өркениетті мемлекеттің негізі ең алдымен қоғамдық тәртіп пен қауіпсіздіктен басталады. Елбасы өз Жолдауында Қазақстанның әлемде адамдар үшін қауіпсіз және тұруға жайлы елдің біріне айналуға тиіс екендігін ерекше атап өтті. Мемлекет басшысының тапсырмасын жүзеге асыру мәселесі Астана қаласы Ішкі істер департаментінің жіті бақылауында. Осы тарапта, ең бірінші кезекте бұқаралық ақпарат құралдарының көмегіне сүйеніп жұртшылық арасында түсіндірме жұмыстарын жүргізуден бастадық. Тұрақты түрде елорда тұрғын­дары мен қонақтарын қоғамдық тәр­тіпті бұзған жағдайдағы қандай әкімшілік жауапкершілік қарас­ты­рылғандығы жайында хабардар етуді жалғастырудамыз. Қазіргі таңда қоғамдық тәртіпті сақтауға бұқара халықты үндеп, олармен бірлесіп игі істер атқарылуда. Атап айтқанда, қала аумағында, әсіресе, халық көп жиылатын орындарда ІІД дайындаған бүктемелер таратылып, бейнероликтер көрсетіліп, құқық бұзушылықтардың алдын алу мақсатында түрлі акциялар өткізілді. «Біз құқық бұзушылыққа мүлде төзбеушілік танытамыз!» акциясының аясында «Жасыл ел» республикалық еңбек жасақтары халық арасында полиция дайындаған бүктемелерді көрнекті орындарда таратты. «Жас Отан» жастар қанаты мен «Біз темекіден тәуелсіз Қазақстанды қолдаймыз!» қоғамдық коалиция блогерлерімен бірлесіп шылым шегуге тыйым салынған көңіл көтеру орындарында алдын алу шарасын жүргіздік. Осы тарапта, «ұсақ» құқық бұзушылықтарға қатаң шаралар қолданудамыз. Ағымдағы жылы қоғамдық орындарды ластау мен ұсақ бұзақылықтың 49-дан астам дерегі тіркеліп, 300-ден астам азамат әкімшілік жауапкершілікке тартылды.

Білім беру мекемелерінде құқық бұзғандарға қатысты көшпелі сот отырыстарын өткізуді тәжірибемізге енгіздік. Мұндағы мақсат – студенттер мен жасөспірімдер назарына сот отырысын ұсыну арқылы тиімді түрде құқық бұзушылықтардың алдын алу. Ағымдағы жылы 11 көшпелі сот отырысы болып өтті. Жеке меншік күзет құрылымдарымен бірігіп көшелерді патрульдеу тәжірибесі нығайтылуда. Соның нәтижесінде, қоғамдық құрылымдардың көмегімен 7 мыңға жуық құқық бұзушылық анықталып, 227 қылмыс ашылды.

Дамыған шетел мемлекеттерінің тәжірибесін нысанға ала отырып, «Сынған терезелер», «Көрші бақылауы», «Қауіпсіз аула» жобалары бойынша профилактикалық шараларды өткізуге ден қойылған. Мысалы, «Қауіпсіз аула» бағдарламасы бойынша қалада 58 тұрғын үй кешені, 40 аула пәтер иелері кооперативінің қаржысына бейне бақылау жүйесімен қамтылды.

Аталған барлық шаралар адам өлтіру, өлімге әкеліп соқтырған денсаулыққа зиян келтіру, пәтер тонау сияқты ауыр және аса ауыр қылмыстардың санын біршама азайтуға серпін берді.

Елорда еліміздің жүрегі мен мақтанышы болғандықтан, ондағы тәртіп пен мәдениет тиісті талаптарға сай болуына өз тарапымыздан атсалысудамыз.

Батырлан ЕСЕНБАЕВ,
Астана қаласы ІІД бастығының орынбасары

ДЕНСАУЛЫҚТЫ ҚОРҒАУҒА ДЕН ҚОЮДА

Елорданы әрі қарай дамыту жөніндегі алқалы кеңесте Елбасы қаланың денсаулық саласына да бірқатар міндет жүктеді. Әсіресе, алғашқы медициналық-санитарлық көмек беру саласын дамытуға айрықша көңіл бөлінді.

Жалпы Астана еліміздің бас шаһары болғандықтан мұнда келімді-кетімді адам көп. Халық санының көбеюі емханаларға әжептәуір жүктеме екені белгілі. Айталық, амбулаторлық-емханалық кешендерге жыл сайын орта есеппен 35 мыңдай адам тіркеледі. Сондықтан бұл мәселені шешу үшін қаламызда көптеген денсаулық нысандары бой көтеруде. 2012-2013 жылдары мұнда екі аурухана мен екі емхана пайдалануға берілді. Атап айтқанда, 2012 жылғы желтоқсан айында Аманат көшесі бойында бір мезгілде 500 адамды қабылдай алатын №3 емханалық кешен ашылса, былтырғы желтоқсанда қаланың 65 мың тұрғынына қызмет көрсететін №10 емхана іске қосылды. Сонымен қатар, денсаулық нысандарын оңтайландыру және қайта құру аясында былтырғы қараша-желтоқсан айларында №1 Перинаталдық орталық пен №2 қалалық балалар ауруханасы базасында бір ауысымда 250 және 150 адамды қабылдай алатын Отбасылық денсаулық орталықтары іске қосылды. Бұл медициналық ұйымдар Есілдің сол жағалауы мен Пригородный, Тельман, Заречный және Промышленный тұрғындарына қызмет көрсетеді. Жаңа ғимараттардың іске қосылуы емханадағы жүктемені едәуір азайтты. Енді биылғы жылдың екінші жартысында Есілдің сол жағалауында бір мезгілде 500 адамды қабылдай алатын амбулаторлық-емханалық кешен, Ильинка елдімекенінде екінші емхана мен Досмұхамедұлы көшесінде тағы бір емханалық бөлім іске қосылғалы отыр. Жиында қала әкімі атап өткендей, 2016 жылға қарай Астанада 3 мамандандырылған денсаулық сақтау нысаны бой көтермек. Осылайша, елорданың медициналық мекемелері қалыпты деңгейде жұмыс істемек.

Бұл жұмыстар әрі қарай жалғаса беретін болады.

Сәбит ӘБДІРАЙЫМОВ,
Астана қаласы Денсаулық сақтау басқармасы басшысының орынбасары

АУЛА КЛУБТАРЫНЫҢ АДЫМДАРЫ

IMG_7905

Халықаралық сарапшылардың пікірінше, Қазақстан бүгінде жас­тар саясатын жүзеге асыру ісінде көп елдерге үлгі дегенді алға тартады. Оның дәлелі – жастардың ден­сау­лығы, сапалы білім алуы, жұмыс­пен қамтамасыз етілуі мемле­кет­тің жіті назарында. Астана қаласында да жастар саясатын дамытуға бағыт­­тал­ған бiрқатар iс-шаралар жүзеге асырылып жатыр. Олар еңбек нарығында сұранысқа ие жұмыс­шы мамандықтарды насихат­тау, кәсіби бағдар беру бойынша кешенді жұмыстар атқару, студент жастармен жұмыс жасау тағы басқалар. Сонымен қатар, елор­да­лық жастар мен балалар саны­ның артуына байланысты олар­дың қажеттіліктерін өтеуге бағыт­тал­ған жұмыстар атқарылуда.

Бүгінгі таңда қаламызда жасөспі­рім­дердің бос уақыттарын қамта­ма­сыз етуге арналған «Аула клубтары» әлеуметтік жобасы соңғы үш жылда жүйелі түрде жүзеге асырылып келеді.

2013 жылдың қорытындысы бойынша қала аумағында Астана қаласының жастар саясатын қол­дау мемлекеттік қорына қарас­ты 10 аула клубы жұмыс жасап келді. Олар «Абдукар», «Арман», «Арыстан», «Архат», «Асар», «Есіл», «Жеңіс», «Момышұлы», «Сұңқар», «Шағала» аула клуб­тары. Аталмыш аула клубтары жас елордалықтар үшін көп функцио­нал­ды мәдени-спорт орталық­тарына айналып отыр.

Бақытжан ЖҮНІСБЕКОВ,
Астана қаласы Жастар саясатын қолдау мемлекеттік қорының директоры

КӨЛІК ЖҮЙЕСІ ЖЕТІЛІП КЕЛЕДІ

Автобус -25

Жоғары дамыған, тұрақты жұмыс істейтін көлік жүйесін қалыптастыру – елдің өсіп-өркендеуінің алғышарттарының бірі. Қалалық жолаушылар көлігінің жүйесін жетілдіруде бірқатар жұмыстардың атқарылғанын айта кеткім келеді. Қала тұрғындары мен қонақтарының еркін қозғалысын қамтамасыз етудегі басты нәрсе – қоғамдық көлік санын арттыру. Бүгінде астаналықтарға 49 бағдар бойынша жүретін 951 автобусы бар 8 автокөлік кәсіпорны қызмет көрсетеді.

Жаңадан жоспарланып отырған коммуналды автобус паркінің құрылысы көлік инфрақұрылымын жетілдіруге арналған. Алдағы уақытта қалалық көлік парктерін ірілендіру жоспарланып отыр. Бұл – жолаушылар тасымалы басқару жүйесін орталықтандырып, қызмет сапасының артуына үлкен әсер етеді.

Әбдіхамит ТАМАБАЕВ,
Астана қаласы Жолаушылар көлігі және автомобиль жолдары басқармасы Жолаушылар тасымалы бөлімінің бастығы

 

Пікір жазу

Почтаңыз жарияланбайды

5 × three =