باس مۇفتيمەن كەزدەستى

0 17

كەشە ەلوردا اكىمى التاي كولگىنوۆ قمدب باس ءمۇفتيى ناۋرىزباي قاجى تاعانۇلىمەن كەزدەسىپ، كارانتين رەجيمى جاعدايىندا وتەتىن قۇربان ايتتى اتاپ ءوتۋ ماسەلەسىن تالقىلادى.

ەلدەگى سانيتارلىق-ەپيدەميولوگيالىق احۋالعا بايلانىستى ادامداردىڭ كوپتەپ جينالۋىنا، ءبىر جەرگە شوعىرلانۋىنا بولمايدى. 5 شىلدەدەن باستاپ ەنگىزىلگەن قاتاڭ كارانتين رەجيمىنە سايكەس، بارلىق ءراسىم ونلاين وتكىزىلۋى قاجەت. وسىعان سايكەس بيىل قۇرباندىق شالۋ راسىمدەرى دە ونلاين-فورماتتا وتەدى. وسى ورايدا، العاش رەت قاشىقتان قۇربان شالۋدى ۇيىمداستىرۋ ماقساتىندا qurban2020.kz سايتى ىسكە قوسىلدى. اتالعان سايتتا كەز كەلگەن ازامات ونلاين تۇردە قۇربان شالۋعا تاپسىرىس بەرە الادى. كەزدەسۋدە قالا اكىمى ۆيرۋستىڭ تارالۋ قاۋپىنىڭ الدىن الۋ ماقساتىندا قاۋىپسىزدىك شارالارىنا ءمان بەرىلەتىنىن اتاپ ءوتىپ، ەلوردالىق مەشىتتەرگە ۇيىمداستىرۋ جۇمىستارى بويىنشا كومەك كورسەتىلەتىنىن اتاپ ءوتتى. ول ءۇشىن ەرىكتىلەر مەن IT-مامانداردان تۇراتىن قالالىق ارنايى شتاب قۇرىلدى. سونىمەن قاتار نۇر-سۇلتان قالاسىنىڭ ءدىن ىستەرى جونىندەگى باسقارماسى قازاقستان مۇسىلماندارى ءدىني باسقارماسىنىڭ ەلوردا بويىنشا وكىلدىگى جانە ءتيىستى مەملەكەتتىك مەكەمەلەرمەن بىرلەسە دايىندىق جۇمىستارىن جۇرگىزىپ جاتىر. رۇقسات ەتىلمەگەن جەرلەردە قۇرباندىق شالۋعا بولمايدى. وسى ماسەلەنى جانە ادامداردىڭ توپتاسپاۋىن قاداعالاۋ ءۇشىن اۋدان اكىمدىكتەرىندە شۇعىل ارەكەت ەتۋ توپتارى قۇرىلدى. بارلىق مەملەكەتتىك ورگاندار كۇشەيتىلگەن رەجيمدە جۇمىستار جۇرگىزەدى.

پىكىر جازۋ

پوچتاڭىز جاريالانبايدى

8 + one =