Nurjan KERMENBAEV: Bas kïimderden jeke kollekcïyam bar

0 135

Dästürli aydarımızdıñ bügingi qonağı – otandıq estrada änşisi Nurjan Kermenbaev. El arasında «Qara bala» atanıp ketken önerli jigittiñ sahnada jürgenine bïıl 10 jıl toldı. Osınaw mereyli waqïğağa oray keyipkerimiz gazet oqırmandarınıñ sawaldarına jawap berip, şığarmaşılıq josparlarımen bölisken edi.

2m0a8839

– Nurjan ağa, öner jolına qalay kelgeniñiz twralı äñgimelep beriñizşi.
Jambıl MUSTAFA, oqwşı

– Negizi, äw demeytin qazaq joq qoy. Äkem de, anam da, twıs ağa-äpkelerim de önerden quralaqan emes. Solardıñ tärbïesi me eken, bala kezimde toy-tomalaqtarğa bara qalsam, ortağa şığıp, än salğandı jaqsı köretinmin. «Bizdiñ ul än aytadı. Qane, Nurjan!» dep jaqındarım da meni qoldap-qolpaştağan sayın qanattanatınmın. Mektep tabaldırığın attağan soñ, änge qatıstı eşqanday jarıstan qalmadım. Awdandıq, oblıstıq bayqawlarda top jarğan soñ, täwekel etip «SuperStar.KZ» jobasına qatıstım. Onı uyımdastırwşı azamattarğa äli künge deyin alğısım şeksiz. Bälkim, sol konkwrs bolmasa, men bügingidey tanımaldılıqqa qol jetkizbes pe edim?!

– Dawsıñızdı qalay kütesiz? Ünemi jasap jüretin jattığwlarıñız bar ma?
Meyram KÖMEKOV, asaba

– Ïä, burın vokalğa qatısıp jürgenimde, oqıtwşım birdi-ekili kişigirim jattığwlardı üyretken-di. Jaqtı barınşa aşıp, tildi şığarıp, dawıstı dıbıstardı barınşa sozıp ändetw arqılı solardı orındap turamın. Biraq qattı kütinbeymin. Sonıñ kesirinen keyde än aytqan soñ, tamağım qarlığıp qaladı.

– Repertwarıñızda qanşa än bar? Än tañdawda qanday qağïdağa süyenesiz?
Aydana ZERMUHAMEDOVA, qarjıger

– Şınımdı aytsam, äzirge sanamappın. Allağa şükir, ol on emes, ol jïırma emes, ol otız emes, odan äldeqayda köp ekenin bilemin. Aldağı waqıtta da tıñdarmandarımdı jaña änderimmen jïirek qwantwğa tırısamın. Än tañdawda äweni men söziniñ üylesimdiligine basa män beremin. Men köbine jastardıñ talğamına say, ırğaqtı änder orındaymın ğoy. Munı keybirewler «dañğaza» dep jaqtırmawı mümkin. Biraq zamanawï änder qaşanda qoğamğa kerek. Äytpese, ul-qızdar onı bäribir şeteldiñ mwzıkasınan tabadı.

– Müsilim attı ulıñız bar. Sizdiñşe, äkelik mindetti atqarw qanşalıqtı qïın närse?
Jänïya JAMBILQIZI, bala kütwşisi

– «Bir äkeniñ tärbïesin jüz mektep te bere almaydı» deydi qazekem. «Balañdı tärbïeleme, balañ sağan qarap ösedi. Sondıqtan öziñdi tärbïele» degen de naqıl bar. Osı eki sözdi basşılıqqa alamın. Jalpı, eresekterdiñ özi balasına üyreterden burın özin tüzep, jaman ädetterden tıyılıp, aynalasına ülgi körsetse, nağız tärbïe sol bolar edi.

– Aldağı josparlarıñızben bölisseñiz…
Äsïya QOBLANOVA, esepşi

– Buyırsa, küzde 10 jıldıq mereytoyıma oray şığarmaşılıq keşimdi ötkizermin. Eñ ülken mindet te däl qazir osı bolıp otır.

– Öziñizdi önerden basqa qanday salada elestete alasız?
Ayan BAYTUYAQOV, qurılısşı

– Äkem – qurılısşı, ömiriniñ soñına qaray şahter bolıp eñbek etken. Änşilik jolğa tüspegenimde, men de Sätpaev qalasınıñ şahtasında jüretin edim dep oylaymın.

– Bas kïimge degen ayrıqşa mahabba­tıñızdı bayqaymız. Bul – özindik stïliñiz­diñ bölinbes bölşegi me?
Kädirhan MIRZAMURATOV, memlekettik qızmetker

– Osı komplïmentti köp estïmin. Bir jağınan, bas kïim kïyu – sünnet qoy. Ekinşi jağınan, özim de ayrıqşa äwespin. Bas kïimderden üyde jeke kollekcïyam bar. Ondağı telpek, şlyapa, kepkalardıñ sanı şamamen 50-den asıp qaldı-aw. «Erteñ urpaqtarıñ sağan arnap mwzey aşsa, eñ bas­tı eksponat – osı bas kïimderiñ bolatın şığar» dep äzildeydi anam.

– Şığarmaşılığıñızda qanday özgerister bolıp jatır?
Sımbat ŞAYJANOVA,  tarïhşı

– Jaqında Maqpal Ïsabekovamen birge «Ayta bermeşi» attı än jazdırdıq. Sözi – aqın Rïnat Zayıtovtiki, äweni – jas kompozïtor Danïyar Şeñgelbaevtiki. Endi alda Älï Oqapovpen dwet qurw josparda bar. Janar Duğalovamen de beynebayan tüsirip qalwımız mümkin.

– Qazirgi qazaq estradasınıñ «ättegen-ay» tustarı dep neni atar ediñiz?
Baqıt QUDAYBERDİ, oqıtwşı

– Toy änderiniñ taza önerdi umıt­tırıp bara jatqanına qarnım aşadı. Ärïne, toydıñ köp bolğanı, qwanıştıñ köbeygeni jaqsı ğoy. Äytkenmen, öner – özinşe sala. Ekewin şatastırmaw kerek. Ökinişke qaray, buqaranıñ basım böligi toy änderin öner retinde tüsinedi.

– Şäkirt tärbïelew oyıñızda bar ma? Jalpı, sizden qoldaw kütip, aldıñızğa barğan ini-qarındastarıñızğa kömektesesiz be?
Bawırjan ÄNWARBAY, stwdent

– Şäkirtterim bar, birazı aynalamda jür. Olarğa mümkindigimşe jol körsetip, jön silteymin. Neniñ durıs, neniñ burıs ekenin üyretemin. Qanşa degenmen, on jıldıq täjirïbemniñ arqasında sahnanıñ qır-sırın meñgerip qaldım ğoy. Aldıma kelgen ini-qarındastarımnıñ bärinen birdey mıqtı änşi şığaramın dep ayta almaymın. Biraq tıñdap, bayqap, kerekti kisilermen jolıqtırıp, säl-päl demew körsetwge dayınmın.

Dayındağan: Botagöz MARATQIZI

 

Pikir jazw

Poçtañız jarïyalanbaydı