نۇرجان كەرمەنباەۆ: باس كيىمدەردەن جەكە كوللەكتسيام بار

0 170

ءداستۇرلى ايدارىمىزدىڭ بۇگىنگى قوناعى – وتاندىق ەسترادا ءانشىسى نۇرجان كەرمەنباەۆ. ەل اراسىندا «قارا بالا» اتانىپ كەتكەن ونەرلى جىگىتتىڭ ساحنادا جۇرگەنىنە بيىل 10 جىل تولدى. وسىناۋ مەرەيلى ۋاقيعاعا وراي كەيىپكەرىمىز گازەت وقىرماندارىنىڭ ساۋالدارىنا جاۋاپ بەرىپ، شىعارماشىلىق جوسپارلارىمەن بولىسكەن ەدى.

2m0a8839

– نۇرجان اعا، ونەر جولىنا قالاي كەلگەنىڭىز تۋرالى اڭگىمەلەپ بەرىڭىزشى.
جامبىل مۇستافا، وقۋشى

– نەگىزى، ءاۋ دەمەيتىن قازاق جوق قوي. اكەم دە، انام دا، تۋىس اعا-اپكەلەرىم دە ونەردەن قۇرالاقان ەمەس. سولاردىڭ تاربيەسى مە ەكەن، بالا كەزىمدە توي-تومالاقتارعا بارا قالسام، ورتاعا شىعىپ، ءان سالعاندى جاقسى كورەتىنمىن. «ءبىزدىڭ ۇل ءان ايتادى. قانە، نۇرجان!» دەپ جاقىندارىم دا مەنى قولداپ-قولپاشتاعان سايىن قاناتتاناتىنمىن. مەكتەپ تابالدىرىعىن اتتاعان سوڭ، انگە قاتىستى ەشقانداي جارىستان قالمادىم. اۋداندىق، وبلىستىق بايقاۋلاردا توپ جارعان سوڭ، تاۋەكەل ەتىپ «SuperStar.KZ» جوباسىنا قاتىستىم. ونى ۇيىمداستىرۋشى ازاماتتارعا ءالى كۇنگە دەيىن العىسىم شەكسىز. بالكىم، سول كونكۋرس بولماسا، مەن بۇگىنگىدەي تانىمالدىلىققا قول جەتكىزبەس پە ەدىم؟!

– داۋسىڭىزدى قالاي كۇتەسىز؟ ۇنەمى جاساپ جۇرەتىن جاتتىعۋلارىڭىز بار ما؟
مەيرام كومەكوۆ، اسابا

– ءيا، بۇرىن ۆوكالعا قاتىسىپ جۇرگەنىمدە، وقىتۋشىم ءبىردى-ەكىلى كىشىگىرىم جاتتىعۋلاردى ۇيرەتكەن-ءدى. جاقتى بارىنشا اشىپ، ءتىلدى شىعارىپ، داۋىستى دىبىستاردى بارىنشا سوزىپ اندەتۋ ارقىلى سولاردى ورىنداپ تۇرامىن. بىراق قاتتى كۇتىنبەيمىن. سونىڭ كەسىرىنەن كەيدە ءان ايتقان سوڭ، تاماعىم قارلىعىپ قالادى.

– رەپەرتۋارىڭىزدا قانشا ءان بار؟ ءان تاڭداۋدا قانداي قاعيداعا سۇيەنەسىز؟
ايدانا زەرمۇحامەدوۆا، قارجىگەر

– شىنىمدى ايتسام، ازىرگە ساناماپپىن. اللاعا شۇكىر، ول ون ەمەس، ول جيىرما ەمەس، ول وتىز ەمەس، ودان الدەقايدا كوپ ەكەنىن بىلەمىن. الداعى ۋاقىتتا دا تىڭدارماندارىمدى جاڭا اندەرىممەن جيىرەك قۋانتۋعا تىرىسامىن. ءان تاڭداۋدا اۋەنى مەن ءسوزىنىڭ ۇيلەسىمدىلىگىنە باسا ءمان بەرەمىن. مەن كوبىنە جاستاردىڭ تالعامىنا ساي، ىرعاقتى اندەر ورىندايمىن عوي. مۇنى كەيبىرەۋلەر «داڭعازا» دەپ جاقتىرماۋى مۇمكىن. بىراق زاماناۋي اندەر قاشاندا قوعامعا كەرەك. ايتپەسە، ۇل-قىزدار ونى ءبارىبىر شەتەلدىڭ مۋزىكاسىنان تابادى.

– ءمۇسىلىم اتتى ۇلىڭىز بار. سىزدىڭشە، اكەلىك مىندەتتى اتقارۋ قانشالىقتى قيىن نارسە؟
ءجانيا جامبىلقىزى، بالا كۇتۋشىسى

– «ءبىر اكەنىڭ تاربيەسىن ءجۇز مەكتەپ تە بەرە المايدى» دەيدى قازەكەم. «بالاڭدى تاربيەلەمە، بالاڭ ساعان قاراپ وسەدى. سوندىقتان ءوزىڭدى تاربيەلە» دەگەن دە ناقىل بار. وسى ەكى ءسوزدى باسشىلىققا الامىن. جالپى، ەرەسەكتەردىڭ ءوزى بالاسىنا ۇيرەتەردەن بۇرىن ءوزىن تۇزەپ، جامان ادەتتەردەن تىيىلىپ، اينالاسىنا ۇلگى كورسەتسە، ناعىز تاربيە سول بولار ەدى.

– الداعى جوسپارلارىڭىزبەن بولىسسەڭىز…
ءاسيا قوبلانوۆا، ەسەپشى

– بۇيىرسا، كۇزدە 10 جىلدىق مەرەيتويىما وراي شىعارماشىلىق كەشىمدى وتكىزەرمىن. ەڭ ۇلكەن مىندەت تە ءدال قازىر وسى بولىپ وتىر.

– ءوزىڭىزدى ونەردەن باسقا قانداي سالادا ەلەستەتە الاسىز؟
ايان بايتۇياقوۆ، قۇرىلىسشى

– اكەم – قۇرىلىسشى، ءومىرىنىڭ سوڭىنا قاراي شاحتەر بولىپ ەڭبەك ەتكەن. انشىلىك جولعا تۇسپەگەنىمدە، مەن دە ساتپاەۆ قالاسىنىڭ شاحتاسىندا جۇرەتىن ەدىم دەپ ويلايمىن.

– باس كيىمگە دەگەن ايرىقشا ماحاببا­تىڭىزدى بايقايمىز. بۇل – وزىندىك ءستيلىڭىز­دىڭ بولىنبەس بولشەگى مە؟
كادىرحان مىرزامۇراتوۆ، مەملەكەتتىك قىزمەتكەر

– وسى كومپليمەنتتى كوپ ەستيمىن. ءبىر جاعىنان، باس كيىم كيۋ – سۇننەت قوي. ەكىنشى جاعىنان، ءوزىم دە ايرىقشا اۋەسپىن. باس كيىمدەردەن ۇيدە جەكە كوللەكتسيام بار. ونداعى تەلپەك، شلياپا، كەپكالاردىڭ سانى شامامەن 50-دەن اسىپ قالدى-اۋ. «ەرتەڭ ۇرپاقتارىڭ ساعان ارناپ مۋزەي اشسا، ەڭ باس­تى ەكسپونات – وسى باس كيىمدەرىڭ بولاتىن شىعار» دەپ ازىلدەيدى انام.

– شىعارماشىلىعىڭىزدا قانداي وزگەرىستەر بولىپ جاتىر؟
سىمبات شايجانوۆا،  تاريحشى

– جاقىندا ماقپال يسابەكوۆامەن بىرگە «ايتا بەرمەشى» اتتى ءان جازدىردىق. ءسوزى – اقىن رينات زايىتوۆتىكى، اۋەنى – جاس كومپوزيتور دانيار شەڭگەلباەۆتىكى. ەندى الدا ءالي وقاپوۆپەن دۋەت قۇرۋ جوسپاردا بار. جانار دۇعالوۆامەن دە بەينەبايان ءتۇسىرىپ قالۋىمىز مۇمكىن.

– قازىرگى قازاق ەستراداسىنىڭ «اتتەگەن-اي» تۇستارى دەپ نەنى اتار ەدىڭىز؟
باقىت قۇدايبەردى، وقىتۋشى

– توي اندەرىنىڭ تازا ونەردى ۇمىت­تىرىپ بارا جاتقانىنا قارنىم اشادى. ارينە، تويدىڭ كوپ بولعانى، قۋانىشتىڭ كوبەيگەنى جاقسى عوي. ايتكەنمەن، ونەر – وزىنشە سالا. ەكەۋىن شاتاستىرماۋ كەرەك. وكىنىشكە قاراي، بۇقارانىڭ باسىم بولىگى توي اندەرىن ونەر رەتىندە تۇسىنەدى.

– شاكىرت تاربيەلەۋ ويىڭىزدا بار ما؟ جالپى، سىزدەن قولداۋ كۇتىپ، الدىڭىزعا بارعان ءىنى-قارىنداستارىڭىزعا كومەكتەسەسىز بە؟
باۋىرجان ءانۋارباي، ستۋدەنت

– شاكىرتتەرىم بار، ءبىرازى اينالامدا ءجۇر. ولارعا مۇمكىندىگىمشە جول كورسەتىپ، ءجون سىلتەيمىن. نەنىڭ دۇرىس، نەنىڭ بۇرىس ەكەنىن ۇيرەتەمىن. قانشا دەگەنمەن، ون جىلدىق تاجىريبەمنىڭ ارقاسىندا ساحنانىڭ قىر-سىرىن مەڭگەرىپ قالدىم عوي. الدىما كەلگەن ءىنى-قارىنداستارىمنىڭ بارىنەن بىردەي مىقتى ءانشى شىعارامىن دەپ ايتا المايمىن. بىراق تىڭداپ، بايقاپ، كەرەكتى كىسىلەرمەن جولىقتىرىپ، ءسال-ءپال دەمەۋ كورسەتۋگە دايىنمىن.

دايىنداعان: بوتاگوز ماراتقىزى

 

پىكىر جازۋ

پوچتاڭىز جاريالانبايدى

one × 2 =